ລາວ ແລະ ອົງການ UNCTAD ຫາລືການແກ້ໄຂສະຖານະພາບດ້ອຍພັດທະນາ
ກະຊວງການຕ່າງປະເທດ ຮ່ວມກັບ ອົງການສະຫະປະຊາຊາດເພື່ອການຄ້າ ແລະ ການພັດທະນາ (UNCTAD), ໄດ້ຈັດກອງປະຊຸມສຳມະນາດ້ານນະໂຍບາຍລະດັບຊາດ ກ່ຽວກັບການສ້າງຄວາມເຂັ້ມແຂງດ້ານການຜະລິດ, ຄວາມຫຼາກຫຼາຍໃນການສົ່ງອອກ ແລະ ການປັບປຸ່ງໂຄງສ້າງເສດຖະກິດ, ນະໂຍບາຍ ແລະ ຍຸດທະສາດ ເພື່ອການຫຼຸດພົ້ນອອກຈາກສະຖານະພາບດ້ອຍພັດທະນາແບບຍືນຍົງຂອງລາວ, ຂຶ້ນໃນວັນທີ 12–13 ມີນານີ້, ຢູ່ນະຄອນຫຼວງວຽງຈັນ, ໂດຍການເປັນປະທານຂອງທ່ານ ທອງຜ່ານ ສະຫວັນເພັດ ຮອງລັດຖະມົນຕີ ກະຊວງການຕ່າງປະເທດ ແລະ ມີຂະແໜງການອ້ອມຂ້າງສູນກາງທີ່ກ່ຽວຂ້ອງເຂົ້າຮ່ວມເປັນຈໍານວນຫຼາຍ.
ເພື່ອປຶກສາຫາລືກັນ ໃນການວາງແຜນຍຸດທະສາດ ແລະ ນະໂຍບາຍ ເພື່ອຊອກຫາວິທີໃນການແກ້ໄຂບັນດາສິ່ງທ້າທາຍທີ່ ລາວ ກຳລັງປະເຊີນ ແລະ ກຳນົດບູລິມະສິດ, ແນວທາງໃນຕໍ່ໜ້າຂອງລັດຖະບານ ແລະ ຍຸດທະສາດການຍາດແຍ່ງການຊ່ວຍເຫຼືອຈາກບັນດາຄູ່ຮ່ວມພັດທະນາໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ເພື່ອໃຫ້ສາມາດຫຼຸດພົ້ນອອກຈາກ ສະຖານະພາບດ້ອຍພັດທະນາແບບຍືນຍົງ ແລະ ປ້ອງກັນບໍ່ໃຫ້ຕົກຢູ່ໃນສະຖານະກຸ່ມປະເທດກຳລັງພັດທະນາທີ່ມີລາຍໄດ້ຕ່ຳ ແລະ ເພື່ອເປັນການກຽມພ້ອມຮັບມືກັບສະພາບການພາຍຫຼັງການຫຼຸດພົ້ນອອກຈາກ ສະຖານະພາບດ້ອຍພັດທະນາຂອງລາວ. ພ້ອມທັງ ແລກປ່ຽນຄໍາຄິດຄໍາເຫັນ ແລະ ປຶກສາຫາລືກ່ຽວກັບ ບັນດາສິ່ງທ້າທາຍດ້ານນະໂຍບາຍທີ່ລາວ ໄດ້ປະເຊີນໃນການກຽມພ້ອມສຳລັບ ການຫຼຸດພົ້ນອອກຈາກສະຖານະພາບດ້ອຍພັດທະນາ ແລະ ການສ້າງຄວາມເຂັ້ມແຂງໃຫ້ແກ່ກຳລັງການຜະລິດ, ການສົ່ງອອກສິນຄ້າໃຫ້ມີຄວາມຫຼາກຫຼາຍຂຶ້ນ ທັງຢູ່ໃນຂົງເຂດພາກພື້ນ ແລະ ສາກົນ ແລະ ການປັບປ່ຽນໂຄງສ້າງເສດຖະກິດ ເພື່ອການເຕີບໃຫຍ່ຂະຫຍາຍຕົວທີ່ຍືນຍົງ ແລະ ທົ່ວເຖິງ ພາຍຫຼັງຈາກການຫຼຸດພົ້ນ. ພ້ອມນີ້, ຍັງໄດ້ສົນທະນາກ່ຽວກັບ ຜົນປະໂຫຍດ ແລະ ຜົນເສຍຂອງການຫຼຸດພົ້ນອອກຈາກສະຖານະພາບດ້ອຍພັດທະນາ-ນະໂຍບາຍ ແລະ ຍຸດທະສາດທີ່ຈຳເປັນ ເພື່ອສ້າງຜົນປະໂຫຍດສູງສຸດ, ຄວາມເຂົ້າໃຈຕໍ່ສະພາບແວດລ້ອມພາຍຫຼັງຈາກການຫຼຸດພົ້ນອອກຈາກສະຖານະພາບດ້ອຍພັດທະນາ ແລະບັນດາມາດຕະການສະໜັບສະໜູນທີ່ຈຳເປັນຈາກທັງພາຍໃນ ແລະສາກົນ, ບັນດາບົດຮຽນປະສົບການຂອງປະເທດທີ່ໄດ້ຫຼຸດພົ້ນອອກຈາກ ສະຖານະພາບດ້ອຍພັດທະນາໃໝ່.
ທ່ານຮອງລັດຖະມົນຕີ ກະຊວງການຕ່າງປະເທດ ກ່າວວ່າ: ລັດຖະບານລາວ ແມ່ນມີຄວາມໝາຍໝັ້ນທີ່ຈະຮ່ວມມືກັບບັນດາອົງການຈັດຕັ້ງສາກົນ ແລະ ບັນດາຄູ່ຮ່ວມພັດທະນາອື່ນໆ ເພື່ອບັນລຸເປົ້າໝາຍໃນການພັດທະນາແບບຍືນຍົງ (SDGs) ໂດຍເລັ່ງໃສ່ການແກ້ໄຂຄວາມທຸກຍາກ ແລະ ສ້າງເງື່ອນໄຂໃຫ້ແກ່ການຫລຸດພົ້ນອອກຈາກສະຖານະພາບດ້ອຍພັດທະນາໃນອະນາຄົດ. ສຳລັບ ສປປ ລາວ ໄດ້ບັນລຸເກນການຫລຸດພົ້ນອອກຈາກສະຖານະພາບດ້ອຍພັດທະນາເປັນຄັ້ງທໍາອິດໃນປີ 2015 ໂດຍການປະເມີນຂອງໜ່ວຍງານກ່ຽວຂ້ອງຂອງສະພາເສດຖະກິດ-ສັງຄົມ ສປຊ (ECOSOC) ແລະ ຈະຖືກປະເມີນອີກເປັນຮອບທີ 2 ໃນປີ 2021. ການປະເມີນໃນປີ 2015 ລາວເຮົາສາມາດບັນລຸໄດ້ 2 ໃນ 3 ເງື່ອນໄຂຂອງເກນການຫລຸດພົ້ນຄື: ລວມຍອດຜະລິດຕະພັນແຫ່ງຊາດ (GNI) ແລະ ດັດສະນີຊັບສິນມະນຸດ (HAI), ສ່ວນດັດສະນີຄວາມບອບບາງທາງດ້ານເສດຖະກິດ (EVI) ລາວຍັງບໍ່ສາມາດບັນລຸໄດ້.
ສະນັ້ນ, ກອງປະຊຸມຄັ້ງນີ້, ຈຶ່ງມີຄວາມໝາຍສໍາຄັນ ແລະ ເປັນໂອກາດອັນດີໃຫ້ແກ່ ຂະແໜງການກ່ຽວຂ້ອງຂອງລາວ ເພື່ອປຶກສາລາຍລະອຽດການກະກຽມຄວາມພ້ອມດ້ານຕ່າງໆ ໂດຍສະເພາະແມ່ນການສຸມໃສ່ປຶກສາຫາລືວຽກທີ່ກ່ຽວຂ້ອງກັບເງື່ອນໄຂທີ່ລາວ ເຮົາຍັງບໍ່ທັນຜ່ານເກນການປະເມີນໃນປີ 2015 ເພື່ອແນໃສ່ໃຫ້ລາວ ສາມາດບັນລຸເກນການປະເມີນການຫລຸດພົ້ນຈາກ LDCsເປັນຄັ້ງທີ 2 ໃນປີ 2021.
