ສະຫະພັນກາແດງ ແລະ ຊີກວົງເດືອນແດງສາກົນ ມອບລົດ 2 ຄັນໃຫ້ແກ່ອົງການກາແດງລາ
ສະຫະພັນກາແດງ ແລະ ຊີກວົງເດືອນແດງສາກົນ ໄດ້ມອບລົດໂຕໂຍຕາແລນຄຸຍເຊີ (Toyota Landcruiser) 2 ຄັນ ມູນຄ່າຫຼາຍກວ່າ 5,26 ລ້ານເຢັນ (ສະກຸນເງິນຍີ່ປຸ່ນ) ໃຫ້ແກ່ອົງການກາແດງລາວ ເພື່ອເຄື່ອນໄຫວຮັບໃຊ້ປະຊາຊົນຜູ້ທີ່ປະສົບໄພພິບັດຕ່າງໆ ໂດຍສະເພາະຢູ່ເມືອງສະໜາມໄຊ ແຂວງອັດຕະປື ທີ່ໄດ້ຮັບຜົນກະທົບໜັກໜ່ວງຈາກໄພທໍາມະຊາດເມື່ອປີ 2018 ຜ່ານມາ, ເຊິ່ງພິທີ່ມອບ-ຮັບໄດ້ມີຂຶ້ນໃນທ້າຍອາທິດຜ່ານມາ, ຢູ່ແຂວງອັດຕະປື ລະຫວ່າງທ່ານ ມີຈານູ ຮາມັນ ຜູ້ຕາງໜ້າສະຫະພັນກາແດງ ແລະ ຊີກວົງເດືອນແດງສາກົນ ທັງເປັນຜູ້ບໍລິຫານໂຄງການຊ່ວຍເຫຼືອໄພພິບັດຢູ່ທີ່ອັດຕະປື ແລະ ທ່ານ ກາວີພອນ ສຸດທິ ຫົວໜ້າກອງຊ່ວຍເຫຼືອບັນເທົາທຸກອົງການກາແດງລາວ, ມີທ່ານ ຄຳຮຸ່ງ ເຮືອງວົງສີ ປະທານອົງການກາແດງລາວ ແລະ ພາກສ່ວນກ່ຽວຂ້ອງສອງຝ່າຍເຂົ້າຮ່ວມເປັນສັກຂີພິຍານນໍາດ້ວຍ.
ໃນໂອກາດດັ່ງກ່າວ, ທ່ານປະທານອົງການກາແດງລາວ ໄດ້ສະແດງຄວາມຂອບໃຈຢ່າງສູງຕໍ່ ສະຫະພັນກາແດງ ແລະ ຊີກວົງເດືອນແດງສາກົນ ທີ່ໄດ້ໃຫ້ການຊ່ວຍເຫຼືອອັນລໍ້າຄ່າດັ່ງກ່າວ ແລະ ຈະນຳໃຊ້ໃຫ້ເກີດຜົນປະໂຫຍດສູງສຸດແກ່ປະຊາຊົນຜູ້ປະສົບໄພພິບັດຕ່າງໆ.
