ລາວປາສະຈາກຝຸ່ນລະອອງ PM 2,5 ແລ້ວ
ເມື່ອຫລາຍວັນຜ່ານມານີ້, ຢູ່ນະຄອນຫລວງວຽງຈັນ ແລະ ບັນດາແຂວງໃກ້ຄຽງ ໄດ້ມີສະພາບໝອກຄວັນ ຫລື ຝຸ່ນລະອອງ PM 2,5 ປົກຫຸ້ມ ເຊິ່ງເລີ່ມແຜ່ຂະຫຍາຍແຕ່ວັນທີ 11 ມີນາ ນີ້ເປັນຕົ້ນມາ, ປັດຈຸບັນສະພາບດັ່ງກາວໄດ້ດີຂຶ້ນຫລາຍແລ້ວ.
ທ່ານ ນາງ ສີສຸພັນ ຫລວງລາດ ຫົວໜ້າກົມຄວບຄຸມມົນລະພິດ ກະຊວງຊັບພະຍາກອນ ແລະ ສິ່ງແວວດລ້ອມ ໃຫ້ຮູ້ວ່າ: ປັດຈຸບັນສະພາບໝອກຄວັນຢູ່ໃນປະເທດເຮົາເລີ່ມດີຂຶ້ນ ແລະ ໄຟປ່າກໍໄດ້ມອດລົງແລ້ວ, ຈາກສະພາບໝອກຄວັນທີ່ຮ້າຍແຮງໃນວັນທີ 11 ມີນາ ສູງເຖິງ 108,9 µg/m3, ໃນວັນທີ 12 ສູງຂຶ້ນເຖິງ 172,1 µg/m3 ແລະ ຈາກນັ້ນກໍໄດ້ຫລຸດລົງເປັນລໍາດັບຄື: ວັນທີ 13 ຫລຸດລົງ 140,6 µg/m3, ວັນທີ 15 ຫລຸດລົງ 118,4 µg/m3, ວັນທີ 16 ຫລຸດລົງເຖິງ 51,4 µg/m3 ແລະ ວັນທີ 17 ໄດ້ເພີ່ມຂຶ້ນຕື່ມອີກເລັກໜ້ອຍ ເນື່ອງຈາກວ່າສະພາບໝອກຄວັນມາຈາກບັນດາປະເທດອ້ອມຂ້າງ ແລະ ຄາດວ່າໃນມໍ່ໆນີ້ຖ້າມີຝົນຕົກລົງມາສະພາບໝອກດັ່ງກ່າວກໍຈະດີຂຶ້ນ.
ເຖິງແນວໃດກໍຕາມ, ຫົວໜ້າຄວນຄຸມມົນລະພິດກໍຂໍເຕືອນໃຫ້ສັງຄົມສືບຕໍ່ເອົາໃຈໃສ່ໃນການຮັກສາສຸຂະພາບ ແລະ ປ້ອງກັນພະຍາດທີ່ອາດຈະເກີດຂຶ້ນ ໂດຍສະເພາະພະຍາດທາງເດີນຫາຍໃຈ, ດັ່ງນັ້ນຕ້ອງເອົາໃຈໃສ່ອັດປະຕູ ແລະ ປ່ອງຢ້ຽມເພື່ອບໍ່ໃຫ້ໝອກຄວັນເຂົ້າມາສະສົມໃນເຮືອນ, ຜູ້ສູງອາຍຸທີ່ມີພະຍາດປະຈຳຕົວກ່ຽວກັບລະບົບຫົວໃຈເສັ້ນເລືອດ ແລະ ລະບົບຫາຍໃຈ, ພະຍາດຫອບຫືດ, ລວມທັງເດັກນ້ອຍທີ່ມີພູມຄຸ້ມກັນຮ່າງກາຍບໍ່ທັນແຂງແຮງບໍ່ຄວນອອກໄປເຄື່ອນໄຫວກິດຈະກຳຢູ່ນອກເຮືອນ, ຖ້າມີອາການຜິດປົກກະຕິໃຫ້ຮີບຮ້ອນໄປພົບທ່ານໝໍທັນທີ, ຖ້າອອກເຮືອນຄວນໃສ່ໜ້າກາກປະເພດ N95 ທີ່ສາມາດກັ່ນຕອງຝຸ່ນລະອອງຂະນາດນ້ອຍໄດ້, ຄວນໃຊ້ຜ້າຈຸ່ມນ້ຳອັດປາກ ແລະ ດັງເພື່ອຜ່ານກຸ່ມຄວັນອອກໄປຫາບ່ອນປອດໄພ, ໃຊ້ນ້ຳເກືອບ້ວນປາກ ແລະ ຄໍ ເພື່ອປ້ອງກັນການເຈັບຄໍ, ຫລີກລ້ຽງການອອກກຳລັງກາຍໃນໄລຍະທີ່ມີໝອກຄວັນຫລາຍ ເພາະວ່າຈະເປັນອັນຕະລາຍຕໍ່ລະບົບຫາຍໃຈ ແລະ ລະບົບຫົວໃຈເສັ້ນເລືອດ, ຫລີກລ້ຽງການຈູດຂີ້ເຫຍື້ອຊະຊາຍຢູ່ບໍລິເວນທີ່ຢູ່ອາໃສ ແລະ ການຈູດໄຮ່ຖາງປ່າ ເພື່ອບໍ່ໃຫ້ເພີ່ມມົນລະພິດທາງອາກາດ.
