ສາທາ ແນະນຳຂໍ້ມູນພະຍາດໝາກແດງໃຫ້ສື່ມວນຊົນ ຮັບຮູ້ເຂົ້າໃຈຕື່ມອີກ ເພື່ອນໍາໄປເຜີຍແຜ່ໃຫ້ສັງຄົມໄດ້ຖືກຕ້ອງ
ໃນວັນທີ 21 ມີນານີ້, ກົມອະນາໄມ ແລະ
ສົ່ງເສີມສຸຂະພາບ ຮ່ວມກັບກົມຄວບ ຄຸມພະຍາດຕິດຕໍ່ ກະຊວງສາທາລະນະສຸກ ໄດ້ອອກມາແນະນຳຂໍ້ມູນຂ່າວສານ ກ່ຽວກັບພະຍາດໝາກແດງ ໃຫ້ ສື່ມວນຊົນໄດ້ເຂົ້າໃຈຕື່ມ ເພື່ອສາມາດລົງເຜີຍແຜ່ໃຫ້ປະຊາຊົນບັນດາເຜົ່າໄດ້ຮັບຮູ້ຢ່າງ
ກວ້າງຂວາງ
ໂດຍສະເພາະແມ່ນກຸ່ມເປົ້າໝາຍ ທີ່ ມີຄວາມສ່ຽງຕໍ່ກັບການຕິດເຊື້ອພະຍາດດັ່ງກ່າວໃຫ້ມີຄວາມຮັບຮູ້, ເຂົ້າໃຈ ແລະ
ຮູ້ດູແລຮັກສາສຸຂະພາບ ແລະ ການປ້ອງກັນພະຍາດຂອງເຂົາເຈົ້າ, ຄອບຄົວ
ແລະ ຊຸມຊົນນັ້ນເອງ.
ທ່ານ ດຣ. ພອນປະເສີດ ອຸນາພົນ ຮອງຫົວໜ້າກມອະນາໄມ ແລະ ສົ່ງເສີມສຸຂະພາບ ກ່າວວ່າ: ປັດຈຸບັນພະຍາດໝາກແດງ ໄດ້ກາຍເປັນສິ່ງທ້າທາຍຕໍ່ສຸຂະພາບຂອງປະຊາຊົນ ແລະ ສ້າງ ຄວາມ ກັງວົນໃຫ້ແກ່ລັດຖະບານ ຂອງບັນດາປະເທດຕ່າງໆໃນທົ່ວໂລກ. ສປປ ລາວ ກໍເປັນໜຶ່ງໃນປະເທດ ທີ່ປະເຊີນໜ້າກັບການເກີດຂຶ້ນຂອງພະຍາດດັ່ງກ່າວ. ໃນໄລຍະຜ່ານມາກໍໄດ້ ມີການລາຍງານຂອງພະຍາດ ໝາກແດງຢູ່ບາງແຂວງຄື: ນັບແຕ່ວັນທີ 1 ມັງກອນ ມາຮອດທ້າຍເດືອນ ມີນາ ນີ້ໄດ້ມີກໍລະນີ ເປັນ ພະຍາດໝາກແດງ 333 ຄົນ ແລະ ເສຍຊີວິດ 1 ຄົນ, ສະເພາະ ນະຄອນຫລວງວຽງຈັນ ມີ 311 ຄົນ, ແຂວງວຽງຈັນ 20 ຄົນ ແລະ ແຂວງຄຳມ່ວນ 2 ຄົນ.
ຕໍ່ບັນຫາດັ່ງກ່າວ ກະຊວງສາທາລະນະສຸກ ຈິ່ງໄດ້ສົມທົບກັບພາກສ່ວນກ່ຽວຂ້ອງຕ່າງໆ ເພື່ອວາງມາດຕະການໂຕ້ຕອບຢ່າງວ່ອງໄວ ເຮັດໃຫ້ບັນຫາດັ່ງກ່າວຫລຸດລົງ, ເປັນຕົ້ນ ໄດ້ກຳນົດເປົ້າ ໝາຍ ແລະ ພື້ນທີ່ ສຳລັບການສັກຢາກັນພະຍາດໝາກແດງໃຫຍ່, ສັກຢາກັນພະຍາດໝາກແດງໃຫຍ່ ເພື່ອຄວບຄຸມບໍ່ໃຫ້ແຜ່ລະບາດເປັນວົງກວ້າງ ເປັນຕົ້ນ ຢູ່ແຂວງ ບໍລິຄຳໄຊ, ໄຊສົມບູນ, ແຂວງວຽງຈັນ ແລະ ນະຄອນຫລວງວຽງຈັນ. ເພື່ອໃຫ້ບໍລິການປິ່ນປົວ ແລະ ສົ່ງຕໍ່ຄົນເຈັບໄປຍັງບ່ອນທີ່ມີເງື່ອນໄຂ.
ທ່ານ ດຣ. ພອນປະເສີດ ອຸນາພົນ ໃຫ້ຮູ້ຕື່ມວ່າ: ພະຍາດໝາກແດງໃຫຍ່ ເປັນອັນຕະລາຍຮ້າຍແຮງເຖິງຂັ້ນເສຍຊີວິດໄດ້, ໂດຍສະເພາະ ໃນກຸ່ມເດັກທີ່ ມີອາຍຸ 0-10 ປີ ທີ່ຂາດສານອາຫານ ແລະ ບໍ່ໄດ້ ຮັບການຮັກສາປິ່ນປົວທີ່ຖືກຕ້ອງ ພະຍາດັ່ງກ່າວ ມີອາການສະແດງອອກ ຄື: ອາການໄຂ້ສູງ ເຊິ່ງຈະ ເລີ່ມລະຫວ່າງມື້ທີ 10 ຫາມື້ທີ 12 ຫລັງຈາກສຳ ຜັດກັບເຊື້ອພະຍາດ ແລະ ຈະແກ່ຍາວເຖິງ 4-7 ວັນອີກ. ນອກນີ້ ຍັງມີອາການຂີ້ມູກຍ້ອຍ, ໄອ, ຕາ ແດງ ແລະ ຕາປຽກ ຫລັງຈາກປະມານ 3-4 ວັນ, ຕຸ່ມ ຜືນແດງຈະເລີ່ມອອກຢູ່ໃບໜ້າ, ລຳຄໍ ແລະ ຈະລາມໄປທົ່ວຕົນໂຕພາຍໃນປະມານ 3 ວັນ. ພະຍາດດັ່ງກ່າວນີ້ ສາມາດແຜ່ເຊື້ອໄດ້ສູງ ຈາກການ ໄອ, ຈາມ, ສຳຜັດໃກ້ຊິດ ກັບບຸກຄົນທີ່ຕິດເຊື້ອ ແລະ ອື່ນໆ. ສະນັ້ນ, ບໍ່ຄວນປິ່ນປົວດ້ວຍຕົວເອງຢູ່ບ້ານ ເພາະສ່ຽງທີ່ຈະເຮັດໃຫ້ຄົນເຈັບເສຍຊີວິດຢ່າງ ກະທັນຫັນໄດ້, ຊຶ່ງຕ້ອງພາໄປພົບແພດ ເພື່ອປິ່ນປົວດ່ວນ.
ສຳລັບ ວິທີປ້ອງກັນຈາກພະຍາດໝາກແດງ ຄວນຕັດເລັບມືໃຫ້ສັ້ນ ເພື່ອຫລີກລ້ຽງບໍ່ໃຫ້ຄົນເຈັບ ໄປຂູດເອົາຕຸ່ມຢູ່ບໍລິເວນນັ້ນ, ເມື່ອສຳຜັດກັບຄົນເຈັບຕ້ອງລ້າງມືໃສ່ສະບູ່ທຸກຄັ້ງ, ນຳເອົາລູກຫລານໄປ ສັກຢາກັນພະຍາດໃຫ້ຄົບ, ແລະ ໃຊ້ຜ້າປິດປາກທຸກຄັ້ງໃນເວລາໄອ, ຈາມ ເພື່ອປ້ອງກັນ ພະຍາ ດັ່ງກ່າວ.
