ຄະນະຜູ້ແທນລາວ​ເຂົ້າຮ່ວມກອງປະຊຸມສະມັດຊາໃຫຍ່ອົງການແຮງງານສາກົນ

- advert banner 728 90 728x90 - ຄະນະຜູ້ແທນລາວ​ເຂົ້າຮ່ວມກອງປະຊຸມສະມັດຊາໃຫຍ່ອົງການແຮງງານສາກົນ

ຄະນະຜູ້ແທນ ສປປ ລາວ ນຳໂດຍ ທ່ານ  ຄຳແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ​ໄດ້ເຂົ້າຮ່ວມກອງປະ ຊຸມສະມັດຊາໃຫຍ່ສະໄໝທີ 108 ຂອງອົງການແຮງງານສາກົນ ທີ່ຈັດຂຶ້ນ ໃນລະຫວ່າງວັນທີ 10- 21 ມິຖຸນານີ້ ທີ່ນະຄອນເຈນີວາ ປະເທດສະວິດ. ໃນກອງປະຊຸມ ໄດ້ຮັບຟັງບົດລາຍງານຂອງປະທານຄະນະບໍລິຫານງານ ແລະ ຜູ້ອຳນວຍການໃຫຍ່ອົງການແຮງງານສາກົນ ກ່ຽວກັບ​ໃນອະນາຄົດ, ​ເຊິ່ງສອດຄ່ອງກັບສະພາບການພັດທະນາເສດຖະກິດ-ສັງຄົມ ຂອງບັນດາປະເທດສະມາຊິກ ຂອງອົງການແຮງງານສາກົນ, ໂດຍສະເພາະ ການຮ່ວມມືສາມຝ່າຍ, ການພັດທະນາສີມືແຮງງານ, ການສ້າງວຽກເຮັດງານທຳ, ການເຂົ້າເຖິງຕະຫລາດແຮງງານ, ການປົກປ້ອງສັງຄົມ ແລະ ການລົງທຶນໃສ່ກ່ານພັດທະນາຊັບພະຍາກອນມະນຸດ. ພ້ອມນັ້ນ, ກອງປະຊຸມໄດ້ພິຈາລະນາ ລົງຄະແນນສຽງຕໍ່ຮ່າງສົນທິສັນວ່າດ້ວຍຄວາມຮຸນແຮງ ແລະ ການລ່ວງລະເມີດໃນສະຖານທີ່ເຮັດວຽກ, ພິຈາລະນາຮັບຮອງວຽກການເງິນ ແລະ ບັນຫາສຳຄັນອື່ນໆ.

- new3 - ຄະນະຜູ້ແທນລາວ​ເຂົ້າຮ່ວມກອງປະຊຸມສະມັດຊາໃຫຍ່ອົງການແຮງງານສາກົນ

​ໃນໂອກາດ​ນີ້, ທ່ານ ຄຳແພງ ໄຊສົມແພງ ​ໄດ້ຕາງໜ້າລັດຖະບານລາວ ໄດ້​ມີ​ຄຳເຫັນຕໍ່ກອງປະຊຸມ ໂດຍໄດ້ຍົກ​ໃຫ້​ເຫັນຜົນສຳເລັດໃນການຈັດຕັ້ງປະຕິບັດ ແຜນພັດທະນາວຽກແຮງງານ ແລະ ສະຫວັດດີການສັງຄົມ 5 ປີ ຄັ້ງທີ IV ຕິດພັນກັບແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII ແຕ່ປີ 2015-2020 ແລະ ເປົ້າໝາຍການພັດທະນາແບບຢືນຍົງຮອດປີ 2030 ໂດຍສະເພາະແມ່ນເປົ້າໝາຍທີ 1 ການລຶບລ້າງຄວາມທຸກຍາກ ທີ່ຕິດພັນກັບການສ້າງລະບົບປົກປ້ອງສັງ ຄົມ ແລະ ເປົ້າໝາຍທີ 8 ກ່ຽວກັບວຽກທີ່ມີຄຸນຄ່າ ແລະ ເປັນທຳສຳລັບໝົດທຸກຄົນ, ການຈ້າງງານທີ່ມີປະສິດທິພາບ ແລະ ການເຕີບໂຕທາງດ້ານເສດຖະກິດແບບມີສ່ວນຮ່ວມ ແລະ ຍືນຍົງ. ສປປ ລາວ ໄດ້ປັບປຸງກົດໝາຍວ່າດ້ວຍແຮງງານ, ກົດໝາຍວ່າດ້ວຍປະກັນສັງຄົມ ແລະ ນິຕິກຳລຸ່ມກົດໝາຍຫລາຍສະບັບ, ໄດ້ຕັ້ງໜ້າຈັດຕັ້ງປະຕິບັດແຜນວຽກທີ່ມີຄຸນຄ່າ ແລະ ເປັນທຳຮ່ວມກັບອົງການຈັດຕັ້ງສາມຝ່າຍ ໂດຍຮ່ວມມືກັບອົງການແຮງງານສາກົນ ແລະ ອົງການຈັດຕັ້ງສາກົນອື່ນໆ ໃນການສົ່ງເສີມການພັດທະນາສີມືແຮງງານ ແລະ ການສ້າງວຽກເຮັດງານທຳ ໃຫ້ສອດຄ່ອງກັບຄວາມຕ້ອງການຂອງຕະຫລາດແຮງງານ, ຈັດຕັ້ງປະຕິບັດມາດຕະການຂອງອົງການແຮງງານສາກົນ, ສ້າງຄວາມເຂັ້ມແຂງໃນລະບົບປົກປ້ອງສັງຄົມ, ເພີ່ມທະວີການຮ່ວມມືສາມຝ່າຍ ແລະ ຄູ່ຮ່ວມງານໃນສັງຄົມຢ່າງກວ້າງຂວາງ.

ພ້ອມກັນນີ້, ຍັງໄດ້ສ້າງຍຸດທະສາດການສ້າງວຽກເຮັດງານທຳໃນຊົນນະບົດ ແລະ ຍຸດທະສາດການປົກປ້ອງສັງຄົມ ​ເຊິ່ງມີຄວາມສຳຄັນໃນການພັດທະນາຊັບພະຍາກອນມະນຸດ ແລະ ການລຶບລ້າງຄວາມທຸກຍາກ ເພື່ອສ້າງວຽກເຮັດງານທຳທີ່ມີຄຸນຄ່າ, ເພີ່ມລາຍໄດ້ໃຫ້ຜູ້ອອກແຮງງານ ແລະ ກຸ່ມຄົນທີ່ດ້ອຍໂອກາດ ເພື່ອຍົກລະດັບຊີວິດການເປັນຢູ່ໃຫ້ດີຂຶ້ນ.

- lattana 1 - ຄະນະຜູ້ແທນລາວ​ເຂົ້າຮ່ວມກອງປະຊຸມສະມັດຊາໃຫຍ່ອົງການແຮງງານສາກົນ
error: Content is protected !!