ລະວັງຂີ້ເຫຍື້ອຖ້ວມໂລກ!
ຄົງຈະບໍ່ມີໃຜດອກກ້າຫາວ່າຜູ້ຂຽນ “ໂຍກ” ເກີນໄປ ທີ່ເວົ້າວ່າດຽວນີ້ຈຳນວນຂີ້ເຫຍື້ອພວມລາມຂຶ້ນເກືອບຖ້ວມຮູດັງຂອງຊາວໂລກ ແລະ ອີກບໍ່ເຫິງມັນກໍຈະຖ້ວມໂລກຖ້າປະຊາຄົມໂລກ ຫາກບໍ່ມີມາດຕະຖານຈິງຈັງ ແລະ ມີປະສິດທິພາບໃນການຈຳກັດ ແລະ ກຳຈັດມັນໃຫ້ໝົດໄປ. ເມື່ອເບິ່ງຕາມສະພາບຄວາມເປັນຈິງໃນປັດຈຸບັນ, ຂີ້ເຫຍື້ອ ບໍ່ເປັນພຽງບັນຫາທີ່ສົ່ງຜົນກະທົບຕໍ່ສິ່ງແວດລ້ອມ ແຕ່ມັນຍັງກາຍເປັນຮູບແບບອາຊະຍາກຳປະເພດໜຶ່ງທີ່ເປັນອັນຕະລາຍຕໍ່ຄວາມໝັ້ນຄົງຂອງແຕ່ລະປະເທດ, ເປັນສ້ຽນໜາມບັນທອນສາຍພົວພັນອັນດີງາມລະຫວ່າງປະເທດ ແລະ ສາກົນ.
ເຫດໃດຈຶ່ງວ່າຈັ່ງຊັ້ນ? ກໍເພາະວ່າມີປາກົດການເປັນຕົວຢ່າງຊີ້ອອກຢ່າງຈະແຈ້ງວ່າ ບາງປະເທດອຸດສາຫະກຳຂະຫຍາຍຕົວຂັ້ນຫົວແຖວ ໄດ້ໃຊ້ກົນອຸບາຍຫລາຍຫລ່ຽມເພື່ອຂົນເອົາກອງຂີ້ເຫຍື້ອຈາກປະເທດຂອງຕົນໄປຖິ້ມຢູ່ປະເທດອື່ນດ້ວຍວິທີຕົບຕາວ່າ ເພື່ອ“ແປຮູບນຳມາໃຊ້ຄືນໃໝ່” ຫລື “ຣີໄຊເຄີນ” ແຕ່ເວລາກວດກາເບິ່ງຄັກໆພັດເປັນຂີ້ເຫຍື້ອປົນເປື້ອນສານເຄມີທີ່ເປັນອັນຕະລາຍສຸດໆ.
ຕົວຢ່າງຫວ່າງບໍ່ດົນມານີ້, ສ. ອາເມລິກາ ໄດ້ສົ່ງຕູ້ຄອນເທນເນີບັນຈຸຂີ້ເຫຍື້ອທີ່ອ້າງວ່າ “ເປັນມິດຕໍ່ສິ່ງແວດລ້ອມ” ໄປຖິ້ມຢູ່ອິນໂດເນເຊຍ ເພື່ອບຳບັດ ຣີໄຊເຄີນ ແຕ່ທາງ ອິນໂດເນເຊຍ ກໍບໍ່ຫລັບຕາເຊື່ອຈຶ່ງໄດ້ກວດສອບ ແລະ ພົບວ່າໃນນັ້ນມີ 5 ຕູ້ຄອນ
ເທນເນີທີ່ບັນຈຸຂີ້ເຫຍື້ອສານພິດອັນຕະລາຍ, ດັ່ງນັ້ນຈຶ່ງຈັດການສົ່ງຄືນສູ່ປະເທດຕົ້ນທາງ.
ບັນຫາທີ່ວ່ານີ້ ມາເລເຊຍ ກໍເຄີຍປະເຊີນກ່ອນໜ້າແລ້ວ ຄືຕູ້ຄອນເທນເນີ ບັນຈຸຂີ້ເຫຍື້ອ “ເປັນມິດຕໍ່ສິ່ງແວດລ້ອມ” ຈຳນວນ 60 ຕູ້, ນ້ຳໜັກ 3.000 ໂຕນ ຈາກ 14 ປະເທດຖືກຕີກັບໄປບັນດາປະເທດຕົ້ນທາງ ໃນນັ້ນລວມມີອົດສະຕາລີ, ການາດາ ແລະ ສ.ອາເມລິກາ.
ເລື່ອງຂີ້ເຫຍື້ອນີ້ໄດ້ກາຍເປັນບັນຫາບາດໝາງທາງການທູດຢ່າງໜັກ ລະຫວ່າງ ຟີລິບປິນ ແລະ ການາດາ ເມື່ອຟີລິບປິນ ປະກາດຕີກັບ 69 ຕູ້ຄອນເທນເນີ ບັນຈຸຂີ້ເຫຍື້ອຈາກ ການາດາ ຍ້ອນມັນເປັນຂີ້ເຫຍື້ອ ທີ່ບໍ່ສາມາດ ຣີໄຊເຄີນໄດ້, ແຕ່ ການາດາ ປະກາດບໍ່ຍອມຮັບຄືນຂີ້ເຫຍື້ອດັ່ງກ່າວ, ຟີລິບປິນ ຈຶ່ງໃຊ້ຄຳຂາດວ່າຮັບ ຫລື ບໍ່ຮັບບໍ່ສົນ, ຈະເອົາຂີ້ເຫຍື້ອທັງໝົດໄປເທລົງນານນ້ຳຂອງການາດາ.
ເມື່ອບັນຫາຂີ້ເຫຍື້ອລະຫວ່າງປະເທດໄດ້ພົບກັບທາງຕັນຄືແນວນີ້ ກໍເລີຍມີສຽງເຕືອນເພື່ອແນະນຳຈາກອົງການ ກຣີນພິສ ປະຈຳອາຊີຕາເວັນອອກສ່ຽງໃຕ້ ໃຫ້ໂລກຮູ້ວ່າ: ອາຊຽນ ບໍ່ແມ່ນຖັງຖິ້ມຂີ້ເຫຍື້ອຂອງໂລກ, 5 ປະເທດໃນອາຊຽນເອງ (ມາເລເຊຍ, ຫວຽດນາມ, ໄທ, ອິນໂດເນເຊຍ ແລະ ມຽນມາ) ກໍມີຂີ້ເຫຍື້ອເກືອບຖ້ວມຮູດັງແລ້ວ.
ເພື່ອປ້ອງກັນບໍ່ໃຫ້ກາຍເປັນຖັງຖິ້ມຂີ້ເຫຍື້ອຂອງໂລກ ອາຊຽນ ຕ້ອງປະຕິບັດມາດຕະການອັນຈຳເປັນດັ່ງລຸ່ມນີ້ຄື: ໜຶ່ງ ຕ້ອງມີລະບົບການຮ່ວມມືທີ່ເປັນຮູບປະທຳລະດັບພາກພື້ນ ແນໃສ່ຫ້າມນຳເຂົ້າຂີ້ເຫຍື້ອຈາກຕ່າງປະເທດທີ່ອ້າງວ່າ ເພື່ອນຳມາຜະລິດໃໝ່, ສອງ ຕ້ອງຮີບຮ້ອນໃຫ້ສັດຕະຍາບັນແກ່ສົນທິສັນຍາ ບາເຊວ ໃນສ່ວນທີ່ເປັນມາດຕະ
ການກຳນົດຫ້າມສົ່ງອອກສິ່ງເສດເຫລືອຕ່າງໆ ທີ່ເປັນອັນຕະລາຍ.
ປະເທດລາວເຮົາ ບໍ່ທັນຕິດລະດັບປະເທດຂີ້ເຫຍື້ອລົ້ນເມືອງຄືຫລາຍປະເທດໃນອາຊຽນ ແຕ່ກໍຢ່າຟ້າວດີໃຈ ເພາະຖ້າພວກເຮົາບໍ່ມີມາດຕະການປ້ອງກັນລ່ວງໜ້າໄວ້ດີໆ ແລ້ວ ປະເທດພວກເຮົາກໍຄົງຈະເປັນຖັງຖິ້ມຂີ້ເຫຍື້ອພາຍໃນ ແລະ ຈາກພາຍນອກຢ່າງແນ່ນອນ.
