ຈັດກອງປະຊຸມຄະນະກໍາມະການລະດັບຊາດເພື່ອມໍລະດົກໂລກເພື່ອສະເໜີເຂດທໍາມະຊາດຫີນໜາມໜໍ່ເຂົ້າເປັນມໍລະດົກໂລກອີກແຫ່ງໜຶ່ງຂອງສປປ ລາວ
ໃນຕອນເຊົ້າວັນທີ 29 ສິງຫານີ້, ກະຊວງຖະແຫລງຂ່າວວັດທະນະທໍາ ແລະ ທ່ອງທ່ຽວ ໄດ້ຈັດກອງປະຊຸມຂອງຄະນະກໍາມະການລະດັບຊາດເພື່ອມໍລະດົກໂລກ ເພື່ອຫາລືການສະເໜີເຂດທໍາມະຊາດຫີນຫນາມໜໍ່ເຂົ້າເປັນມໍລະດົກໂລກອີກແຫ່ງໜຶ່ງຂອງລາວຂຶ້ນທີ່ຫໍວັດທະນະທໍາແຫ່ງຊາດ, ພາຍໃຕ້ການເປັນປະທານຂອງທ່ານ ບໍ່ແສງຄໍາ ວົງດາລາ, ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ປະທານຄະນະກຳມະການລະດັບຊາດເພື່ອມໍລະດົກໂລກຂອງສປປ ລາວ ແລະ ມີຜູ້ແທນຈາກ ສສ.ຫວຽດນາມ, ອົງການປົກຄອງແຂວງຄໍາມ່ວນ, ອົງການ UNESCO, IUCN ແລະ GIZ ເຂົ້າຮ່ວມ.
ໃນພິທີ, ທ່ານລັດຖະມົນຕີ ບໍ່ແສງຄໍາ ວົງດາລາ ໄດ້ກ່າວວ່າ: ລັດຖະບານລາວ ຍາມໃດກໍ່ໄດ້ຫຼິງເຫັນຄຸນຄ່າທາງດ້ານວັດທະນາທຳ, ຈຶ່ງໄດ້ເອົາໃຈໃສ່ປົກປ້ອງ, ຟື້ນຟູ, ອະນຸລັກ, ສືບທອດ ແລະ ສົ່ງເສີມຢ່າງຕັ້ງໜ້າ ບັນດາມໍລະດົກດັ່ງກ່າວໃຫ້ຍືນຍົງຄົງຢູ່ຄູ່ກັບຊາດລາວ ແລະ ຄົນລາວ ຕະຫຼອດໄປ ແລະ ໄດ້ຖືເອົາທ່າແຮງທາງດ້ານນີ້ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ ບົນພື້ນຖານການປົກປັກຮັກສາ ແລະ ເຊີດຊູເອກະລັກທາງວັດທະນະທຳດ້ານວັດຖຸ ກໍ່ຄື ວັດທະນະທຳດ້ານຈິດໃຈ, ອັນໄດ້ແກ່ ພູມປັນຍາ, ຮີດຄອງປະ ເພນີ, ສິລະປະ-ຫັດຖະກຳພື້ນເມືອງ ແລະ ອື່ນໆທີ່ສືບທອດກັນມາຕັ້ງແຕ່ບູຮານນະການ, ຊື່ງທັງໝົດເຫຼົ່ານີ້ລ້ວນແຕ່ເປັນຊັບພະຍາກອນທາງດ້ານວັດທະນະທຳອັນລ້ຳຄ່າຂອງຊາດ, ແລະ ເປັນສະເນ່ດືງດູດນັກທ່ອງທ່ຽວ ທັງພາຍໃນ ແລະຕ່າງປະເທດ ໃຫ້ຫຼັ່ງໄຫຼກັນມາທ່ຽວຊົມ, ມາສຶກສາຮຽນຮູ້ ແລະ ມາສຳຜັດວັດທະນະທຳອັນອຸດົມຮັ່ງມີຂອງປະເທດລາວເຮົາ, ຕາມເປົ້າໝາຍຂອງການພັດທະນາແບບຍືນຍົງ.
ພາຍໃຕ້ຂອບຂອງອົງການອຸຍແນສໂກ, ສົນທິສັນຍາມໍລະດົກໂລກ ຊື່ງຖືກສ້າງຕັ້ງຂື້ນເມື່ອປີ 1972, ນັບວ່າເປັນສົນທິສັນຍາທີ່ມີບັນດາປະເທດໃນທົ່ວໂລກເຂົ້າຮ່ວມເປັນພາຄີຫຼາຍທີ່ສຸດເຖີງ 193 ປະເທດ. ໃນປີ 1987, ສປປ ລາວ ກໍ່ໄດ້ລົງນາມເຂົ້າຮ່ວມເປັນລັດພາຄີ ແລະ ມາເຖິງປະຈຸບັນນີ້, ສປປ ລາວ ກໍ່ມີມໍລະດົກໂລກທາງດ້ານວັດທະນະທຳທີ່ເປັນຮູບປະທຳເພີ່ມຂື້ນເປັນ 3 ແຫ່ງຄື: ນະຄອນປະຫວັດສາດຫຼວງພະບາງ, ວັດພູຈຳປາສັກ ແລະ ທົ່ງໄຫຫີນແຂວງຊຽງຂວາງ. ນອກຈາກນີ້, ພາຍໃຕ້ສົນທິສັນບຍາ 2003 ວ່າດ້ວຍການປົກປ້ອງມໍລະດົກທີ່ເປັນນາມມະທຳ ໃນທ້າຍປີ 2017, ສປປ ລາວ ກໍໄດ້ຮັບການຂື້ນທະບຽນ ສຽງແຄນເຊື້ອຊາດລາວ ເຂົ້າຢູ່ໃນບັນຊີຕົວແທນແຫ່ງມໍລະດົກວັດທະນະທຳນາມມະທຳຂອງມວນມະນຸດສະຍະຊາດອີກດ້ວຍ.
ນັ້ນຖືວ່າເປັນຜົນງານ ແລະ ຜົນສຳເລັດເບື້ອງຕົ້ນທີ່ໜ້າພາກພູມໃຈເປັນຢ່າງຍິ່ງ ຊຶ່ງສະທ້ອນໃຫ້ເຫັນເຖິງຄວາມມຸ່ງໝັ້ນ ແລະ ພັນທະສັນຍາຂອງລັດຖະບານລາວ ຕໍ່ວົງຄະນາຍາດສາກົນໃນການປົກປ້ອງ ແລະ ສົ່ງເສີມຄຸນຄ່າຂອງມໍລະດົກທາງດ້ານວັດທະນະທຳແຫ່ງຊາດ. ໄປຄຽງຄູ່ກັບການປົກປັກຮັກສາມໍລະດົກວັດທະນະທຳ, ມໍລະດົກທາງດ້ານທຳມະຊາດ ອັນເປັນບຸລິມະສິດໜຶ່ງທີ່ສຳຄັນຂອງຊາດ.
ປະຈຸບັນນີ້, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ພວມສົມທົບກັບບັນດາຂະແໜງການ ແລະ ອົງການ ຈັດຕັ້ງທີ່ກ່ຽວຂ້ອງ ເພື່ອຂຸ້ນຂ້ຽວກະກຽມເອກະສານຄຳຮ້ອງຕ່າງໆກ່ຽວກັບການນໍາສະເໜີປ່າສະຫງວນແຫ່ງຊາດຫິີນໜາມໜໍ່, ເມືອງບົວລະພາ ແຂວງຄຳມ່ວນ ແລະ ປະສານສົມທົບກັບລັດຖະບານ ສສ ຫວຽດນາມ ໃນການນຳສະເໜີຂຶ້ນເປັນມໍລະດົກໂລກທາງທຳມະຊາດຮ່ວມຊາຍແດນ ກັບປ່າສະຫງວນຟອງຍາແກບາງ ແຂວງກວາງບິງ, ຊື່ງຄາດວ່າ ປ່າສະຫງວນແຫ່ງຊາດຫີນໜານໜໍ່ ຈະໄດ້ກາຍເປັນມໍລະດົກໂລກທາງທຳມະຊາດແຫ່ງທຳອິດຂອງ ສປປ ລາວ, ທັງຈະເປັນມໍລະດົກໂລກທາງທຳມະຊາດຊາຍແດນແຫ່ງທຳອິດ ໃນພາກພື້ນນີ້ອີກດ້ວຍ.
