ຫລັງນ້ຳຖ້ວມມັກເກີດໂລຄາພະຍາດ
ໂດຍ: ທິດກ່ຳ
ຟ້າຝົນຊົນລະຫາຕົກລົງມາເກີນເຫດຈົນກາຍເປັນໄພພິບັດທຳລາຍຊີວິດ ແລະ ຊັບສິນ ຢ່າງໜັກໜ່ວງ ຢູ່ບັນດາແຂວງພາກກາງ ແລະ ພາກໃຕ້ເຊັ່ນ: ຄຳມ່ວນ, ສະຫວັນນະເຂດ, ສາລະວັນ, ເຊກອງ, ອັດຕະປື ແລະ ຈຳປາສັກ.
ມາຮອດໄລຍະນີ້ເຫັນວ່າສະພາບນ້ຳ ໄດ້ບົກແຫ້ງລົງຫລາຍເຕີບ ສິ່ງທີ່ເຫລືອປະໄວ້ໃຫ້ເຫັນກໍຄືຂີ້ຕົມ, ຊາກສະລັກຫັກພັງ, ເສດຂີ້ເຫຍື້ອໄມ້ນ້ອຍໄມ້ໃຫຍ່ ແລະ ວັດຖະພືດຕ່າງໆ ທັງມີກິ່ນເນົ່າເໝັນສາບຄາວກວ່າມັນຈະແຫ້ງກໍຕ້ອງໃຊ້ເວລາຫລາຍວັນຈິ່ງຈະກ້າວເຂົ້າສະພາບປົກກະຕິ. ແຕ່ຖ້າຫາກພາຍຸໜ່ຳລົງມາອີກຕື່ມຍິ່ງຈະສ້າງຄວາມລຳບາກກາກກຳແກ່ປະຊາຊົນ ໄດ້ຮັບເຄາະຮ້າຍຊ້ຳເຕີມບໍ່ເລີກ, ບໍ່ແລ້ວ.
ຖືວ່າປີນີ້, ເປັນປີໜຶ່ງທີ່ເກີດໄພພິບັດນ້ຳຖ້ວມເປັນບໍລິເວນກວ້າງໜັກໜ່ວງຫລາຍສົມຄວນ, ກວມພື້ນທີ 6 ແຂວງທາງພາກກາງ ແລະ ພາກໃຕ້ນັບແຕ່ຄຳມ່ວນ, ລົງໄປຮອດແຂວງໃຕ້ສຸດຂອງປະເທດ.
ໃນເບື້ອງຕົ້ນຮູ້ວ່າ 14 ຄົນ ເສຍຊີວິດ, ມີ 122.892 ກວ່າຄອບຄົວ, 224.600 ກວ່າຄົນ. ເນື້ອທີ່ນາເສຍຫາຍ 139.800 ກວ່າເຮັກຕາ, ສວນ 251 ກວ່າເຮັກຕາ, ໜອງປາ 1.922 ໜອງ, ສັດລ້ຽງຫລາຍກວ່າ 300 ໂຕ, ຊົນລະປະທານ 33 ແຫ່ງ, ຄອງເໝືອງ 64,000 ກວ່າແມັດ, ເສັ້ນທາງຄົມມະນາຄົມຖືກຕັດຂາດຫລາຍກວ່າ 250 ກິໂລແມັດ, ຂົວ 12 ແຫ່ງ. ໂຮງຮຽນ 215 ແຫ່ງຖືກນ້ຳຖ້ວມ, ໂຮງໝໍສຸກສາລາ 10 ກວ່າແຫ່ງນອກນີ້ກໍຍັງມີວັດຖຸຊັບສິນອື່ນໆ ຖືກເສຍຫາຍຢ່າງຫລວງຫລາຍພາຍມາກ.
ແນວໃດກໍຕາມ, ເທົ່າທີ່ໄດ້ຕິດຕາມແຫລ່ງຂ່າວຄາວສະພາບນ້ຳຖ້ວມນັບແຕ່ມື້ເລີ່ມຕົ້ນຈົນມາຮອດມື້ນ້ຳບົກແຫ້ງຖືວ່າການຈັດຕັ້ງພັກ-ລັດຖະບານກໍບໍ່ໄດ້ປ່ອຍປະລະໄລ, ບັນດາທ່ານການນຳນັບແຕ່ຂັ້ນສູນກາງລົງຮອດທ້ອງຖິ່ນກໍໄດ້ລົງພື້ນທີ່ເພື່ອຊ່ວຍເຫລືອປະຊາຊົນຜູ້ໄດ້ຮັບຜົນກະທົບ.
ພິເສດໄດ້ມີທ່ານນາຍົກລັດຖະມົນຕີ ທອງລຸນ ສີສຸລິດ ລົງໄປເຖິງຮາກຖານປະຊາຊົນເພື່ອຕິດຕາມກວດກາຄວາມສຸກທຸກ ແລະ ແຈກຢາຍວັດຖຸສິ່ງຂອງເງິນຄຳຊ່ວຍເຫລືອພໍ່ແມ່ປະຊາຊົນ ບ່ອນທີ່ມີຜົນກະທົບ. ນອກນັ້ນ, ກໍຍັງມີທ່ານເຈົ້າແຂວງ, ເຈົ້າເມືອງ, ອຳນາດ ການປົກຄອງທ້ອງຖິ່ນຕະຫລອດຮອດບໍລິສັດ, ຫ້າງຮ້ານ, ການຈັດຕັ້ງສັງຄົມ, ບຸກຄົນ, ລວມໝູ່ກໍພ້ອມກັນສຸມໃສ່ຊ່ວຍເຫລືອຢ່າງສຸດຂັ້ນສຸດຂີດ.
ອັນທີ່ພິເສດອີກນັ້ນ, ຕ້ອງຂໍຊົມເຊີຍອ້າຍນ້ອງທະຫານກອງທັບ ປະຊາຊົນລາວທີ່ໄດ້ປະເຊີນໜ້າກັບໄພພິບັດຊ່ວຍເຫລືອປະຊາຊົນຢູ່ແຕ່ລະທ້ອງຖິ່ນທີ່ມີຜົນກະທົບດ້ວຍຄວາມເສຍສະຫລະຢ່າງຈິງຈັງສົມກັບວ່າທະຫານຄືຮົ້ວຂອງຊາດ, ທະຫານກັບປະຊາຊົນຄືປາກັບນ້ຳ.
ຕາມປົກກະຕິແລ້ວ, ເວົ້າສະເພາະຢູ່ບ້ານເຮົາສິ່ງທີ່ຄວນໃສ່ໃຈໃນຂັ້ນຕໍ່ໄປນັ້ນຖ້າຫາກເກີດໄພພິບັດນ້ຳຖ້ວມເມື່ອມັນບົກແຫ້ງລົງກໍມັກຈະເກີດໂລຄາພະຍາດຕາມມາເຊັ່ນ: ພະຍາດຕາແດງ, ໂຣກອະຫິວາ, ທ້ອງບິດ, ຖອກທ້ອງ ຫລື ເກີດມີພະຍາດບາດເຍົາຊະນິດອື່ນໆ ເຊິ່ງໃຜໆກໍບໍ່ເພິ່ງປາດຖະໜາ. ທີ່ມາຂອງພະຍາດຕ່າງໆ ເຫລົ່ານີ້ກໍແມ່ນມາຈາກອາກາດ ຊ່ວງຍາມຝົນ, ນ້ຳເປີະເປື້ອນ ແລະ ສິ່ງໂສໂຄກເປັນຕົ້ນເຫດຈາກບັນຫາອຸທົກກະໄພ.
ເພື່ອເປັນການຕ້ານ ແລະ ສະກັດກັ້ນໂລຄາພະຍາດຕ່າງໆ ທີ່ຈະຕາມມາຫລັງນ້ຳບົກແຫ້ງ ດີແທ້ຄວນມີທິມງາມແພດໝໍຈາກສູນກາງ ແລະ ທ້ອງຖິ່ນຈັດຕັ້ງກັນລົງໄປຕິດຕາມ, ກວດກາ, ກວດການເພື່ອຫາວິທີຕອບຕ້ານບໍ່ໃຫ້ ພະຍາດຕ່າງໆ ລະບາດຂຶ້ນ ກ່ອນມັນຈະມາອາລະວາດສັງຫານຊີວິດຂອງຄົນເພີ່ມຕື່ມ.
ເທົ່າທີ່ທິດກ່ຳ ໄດ້ຕິດຕາມແຫລ່ງຂ່າວສະພາບນ້ຳຖ້ວມຢູ່ຈຸດເຕົ້າໂຮມປະຊາຊົນໜີຕາຍນັ້ນບໍ່ປາກົດເຫັນທີມງານແພດໝໍໄປຕັ້ງແຄ້ມຫລືຈຸດບໍລິການປິ່ນປົວ ປະຊາຊົນ ທີ່ເຈັບເປັນສຸກເສີນ, ດີແທ້ບໍ່ຄວນລໍຖ້າແຕ່ຜູ້ໃດເຈັບເປັນຢູ່ໃກ້ ຫລື ໄກ ຈຶ່ງແກ່ກັນໄປໂຮງໝໍໃນກໍລະນີຖືກຜູ້ເປັນໜັກການໄປມາຫຍຸ້ງຍາກຊ້ຳພັດຕາຍໃນເວລາເດີນທາງຢ່າງໜ້າສົມເພດຈະເປັນບໍ່?./.
