ທູດມາເລຊສະຫລອງວັນຊາດຄົບຮອບ 62 ປີ
ໃນວັນທີ 13 ກັນຍານີ້ ສະຖານທູດມາເລເຊຍປະຈຳລາວ ໄດ້ຈັດງານລ້ຽງສະຫລອງວັນຊາດຂອງຕົນຄົບຮອບ 60 ປີຂຶ້ນທີ່ນະຄອນຫລວງວຽງຈັນ ພາຍໃຕ້ຄຳຂວັນທີ່ວ່າ: “ ຮັກປະເທດມາເລເຊຍຂອງຂ້ອຍ ມາເລເຊຍຂາວສະອາດ” ເປັນຄຳຂວັນທີ່ເນັ້ນເຖິງຄວາມສຳຄັນຂອງຄວາມສາມັກຄີ ແລະ ຄວາມຮັກຊາດ ເພື່ອຄວາມເປັນຢູ່ທີ່ດີ ແລະ ຄວາມຈະເລີນຮຸ່ງເຮືອງຂອງປະເທດ. ນອກນີ້, ຍັງເປັນພາບທີ່ສະແດງໃຫ້ເຫັນເຖິງ ຄວາມມີຄຸນນະທຳ ຂອງຊາວມາເລເຊຍທຸກຄົນ ໂດຍປາສະຈາກການສໍ້ລາດບັງຫລວງ ແລະ ສຳລັບປີນີ້ ເປັນປີຄົບຮອບ 53 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ລາວ ແລະ ມາເລເຊຍ, ເຊິ່ງໄດ້ຮັກສາສາຍພົວພັນ ບົນພື້ນຖານຄວາມໄວ້ວາງໃຈ, ແລະ ຄວາມເຂົ້າອົກເຂົ້າໃຈເຊິ່ງກັນ ແລະ ກັນ. ນອກຈາກສົ່ງເສີມການພົວພັນສອງຝ່າຍ ລະຫວ່າງສອງປະເທດແລ້ວ, ລັດຖະບານ ມາເລເຊຍ ຍັງໄດ້ເນັ້ນໃສ່ການສົ່ງເສີມສາຍພົວພັນ ລະຫວ່າງປະຊາຊົນກັບປະຊາຊົນນຳດ້ວຍ ໂດຍໄດ້ສະແດງອອກໃນ 7 ເດືອນຕົ້ນປີ 2019 ນີ້ ສະຖິຕິຊາວລາວເດີນທາງໄປທ່ອງທ່ຽວ ປະເທດມາເລເຊຍ ຫລາຍກວ່າ 15.800 ເທື່ອຄົນ ເພີ່ມຂຶ້ນ 11,4% ເມື່ອທຽບກັບປີຜ່ານມາ.
ທ່ານ ທູດມາເລເຊຍ ກ່າວໃນງານສະເຫລີມສະຫລອງວັນປະຫວັດສາດສຳຄັນດັ່ງກ່າວຕື່ມວ່າ: ດ້ານການຄ້າການລົງທຶນຂອງນັກລົງທຶນມາເລເຊຍ ຢູ່ ສປປ ລາວເຫັນວ່າມີການຂະຫຍາຍຕົວສົມຄວນ ຈັດເປັນອັນດັບທີ 4 ຂອງນັກລົງທຶນຕ່າງປະເທດຢູ່ ສປປ ລາວ ໃນປີ 2018 ຜ່ານມາ ເປັນຕົ້ນໂຄງການໄຟຟ້າພະລັງງານນໍ້າ, ເຂດເສດຖະກິດພິເສດ ແລະ ເຂດເສດຖະກິດສະເພາະ, ການທະນາຄານ ແລະ ການທ່ອງທ່ຽວອື່ນໆຄື: ນັບແຕ່ປີ2018 ມາເລເຊຍໄດ້ຊ່ວຍພັດທະນາຊັບພະຍາກອນມະນຸດໃຫ້ແກ່ລາວມີ 1.500 ກວ່າຄົນ ແລະ ສະເພາະປີ2019 ນີ້ມີ 35 ຄົນ ພາຍຝໃຕ້ໂຄງການຮ່ວມມືທາງດ້ານວິຊາການຂອງມາເລເຊຍ(MTCP).
