ຫລາຍເຂດຂອງນະຄອນຫລວງວຽງຈັນ ພົບວິກິດນ້ຳປະປາບໍ່ມາ
ທ່ານ ນາງ ເພື່ອນແສງ ໄຊນາຄຳ ຮອງຜູ້ອຳນວຍການລັດວິສາຫະກິດ ນ້ຳປະປານະຄອນຫລວງວຽງຈັນ ໃຫ້ຮູ້ວ່າ: ປັດຈຸບັນ ຫລາຍເຂດ ຢູ່ ນະຄອນຫລວງວຽງຈັນ ໂດຍສະເພາະແມ່ນ ເຂດເມືອງ ໄຊທານີ, ໄຊເສດຖາ ຈັນທະບູລີ ໄດ້ຮັບຜົນກະທົບຈາກນ້ຳປະປາບໍ່ມາ ຫລື ມາກໍບໍ່ພຽງພໍ, ພາຍຫລັງ ໂຮງງານຜະລິດນ້ຳປະປາດົງໝາກຄາຍ ບໍ່ສາມາດຜະລິດນ້ຳປະປາໄດ້ ຍ້ອນສະພາບນ້ຳງື່ມແຫ້ງຜິດປົກກະຕິ, ຊຶ່ງເລີ່ມແຕ່ວັນທີ 20 ຕຸລາ ເປັນຕົ້ນມາ ແລະ ປັດຈຸບັນພວມເລັ່ງແກ້ໄຂດ້ວຍການຕິດຕັ້ງຈັກສູບນ້ຳເພີ່ມໃນປະລິມານ 20 ພັນແມັດກ້ອນຕໍ່ມື້, ເພື່ອໃຫ້ສະໜອງນ້ຳເປັນປົກກະຕິ.
ຮອງຜູ້ອຳນວຍການລັດວິສາຫະກິດ ນ້ຳປະປານະຄອນຫລວງວຽງຈັນ ໃຫ້ຮູ້ວ່າ: ປັດຈຸບັນ ສະພາບນ້ຳງື່ມໄດ້ບົກແຫ້ງລົງຜິດປົກກະຕິ ແລະ ຫລຸດຈາກ ປາກທໍ່ດູດນ້ຳ, ຈົນເຮັດໃຫ້ໂຮງງານນ້ຳປະປາທ່າງ່ອນ ບ້ານ ພູຄຳ ເມືອງ ໄຊທານີ ບໍ່ສາມາດສູບນໍ້າຂຶ້ນມາຜະລິດໄດ້ ແລະ ສົ່ງຕໍ່ໃຫ້ ໂຮງງານ ນ້ຳປະປາດົງໝາກຄາຍ ທີ່ມີກຳລັງການຜະລິດນໍ້າແຕ່ລະມື້ຫລາຍກ່ວາ 80 ພັນແມັດກ້ອນ, ກໍບໍ່ສາມາດຜະລິດໄດ້ ຈຶ່ງ ເຮັດໃຫ້ສັງຄົມໄດ້ຮັບຜົນກະທົບ. ຕໍ່ສະພາບດັ່ງກ່າວ, ກໍໄດ້ເລັ່ງແກ້ໄຂໃຫ້ທ່ວງທັນ ແລະ ຄາດວ່າ ຈະຕິດຕັ້ງຈັກສູບນ້ຳໃຫ້ສຳເລັດພາຍໃນ 3 ວັນຂ້າງໜ້ານີ້, ເພື່ອຮັບປະກັນໃນການຊົມໃຊ້ນ້ຳທົ່ວເຖິງ ແລະ ພຽງພໍ
ແລະ ໃນວັນທີ 22 ຕຸລາ ນີ້, ຄະນະອຳນວຍການລັດວິສາຫະກິດນ້ຳປະປາ ນະຄອນຫລວງວຽງຈັນ ໄດ້ລົງຕິດຕາມສະພາບນ້ຳງື່ມ ຢູ່ໂຮງງານນ້ຳປະປາທ່າງ່ອນ, ໄດ້ຕີລາຄາວ່າ: ສະພາບນ້ຳງື່ມແຫ້ງເທື່ອນີ້ ເກີດຈາກໄພທຳມະຊາດຄື ສະພາບຝົນຕົກຂາດໄລຍະ ແລະ ປັດຈຸບັນ ການຊົມໃຊ້ນ້ຳປະປາ ຢູ່ ນະຄອນຫລວງວຽງຈັນ ມີຫລາຍກ່ວາ 2 ແສນແມັດກ້ອນຕໍ່ມື້, ຊຶ່ງໂຮງງານຜະລິດນ້ຳປະປາ ຢູ່ ນະຄອນຫລວງວຽງຈັນ ມີພຽງ 7 ແຫ່ງ, ພ້ອມນັ້ນ ຈັກສູບນ້ຳບາງໂຮງງານ ກໍເປ່ເພ ຈຶ່ງເຮັດໃຫ້ການຜະລິດນ້ຳປະປາ ບໍ່ໄດ້ທ່ວງທັນ, ຈຶ່ງຮຽກຮ້ອງໃຫ້ສັງຄົມ ໃຊ້ນ້ຳຢ່າງປະຫຍັດ, ພ້ອມທັງກະກຽມພາຊະນະເພື່ອໂຕ່ງນ້ຳໃຊ້ໃນໄລຍະນີ້.
