ກອງ​ປະຊຸມ​ສະພາ​ຂໍ​ໃຫ້​ເລັ່ງລັດ​ແກ້​ໄຂ​ບັນຫາ​ຂອງ​ຊາດ

- advert banner 728 90 728x90 - ກອງ​ປະຊຸມ​ສະພາ​ຂໍ​ໃຫ້​ເລັ່ງລັດ​ແກ້​ໄຂ​ບັນຫາ​ຂອງ​ຊາດ

ໂດຍ: ທິດກ່ຳ

- new3 - ກອງ​ປະຊຸມ​ສະພາ​ຂໍ​ໃຫ້​ເລັ່ງລັດ​ແກ້​ໄຂ​ບັນຫາ​ຂອງ​ຊາດ

ດັ່ງ​ທີ່​ຮູ້​ນຳ​ກັນ​ແລ້ວ​ວ່າ: ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 8 ຂອງ​ສະພາ​ແຫ່ງ​ຊາດ​ຊຸດທີ VIII ​ໄດ້​ດຳ​ເນີນ​ມາ​ຮອດ​ວາລະ​ສຸດ​ທ້າຍ​ແລ້ວ, ​ໃນ​ໂອກາດ​ກອງ​ປະຊຸມ​ຄັ້ງນີ້, ສັງ​ເກດ​ເຫັນ​ໄດ້​ວ່າ​ມີ​ອັນ​ກ້າວໜ້າ​ພັດທະນາ​ດີ​ຂຶ້ນຫລາຍ​ເທົ່າ, ສິ່ງ​ທີ່​ໂດດ​ເດັ່ນ​​ທີ່​ສຸດ ​ກໍ​ແມ່ນ​ການ​ປະກອບ​ຄຳ​ເຫັນ​ຂອງ​ບັນດາ​ຜູ້​ແທນ​ແຕ່ລະ​ເຂດ​ເລືອກ​ຕັ້ງ ມີ​ລັກສະນະ​ກົງ​ໄປ​ກົງ​ມາ​, ມີ​ການສະ​ເໜີ​ໃນທຸກໆ​ບັນຫາ​ທີ່​ຕ້ອງ​ໄດ້​ແກະ​ໄງ້​ອອກ​ມາ​ເວົ້າວ່າ​ໃຫ້​ມີ​ການ​ແກ້​ໄຂ​ບຸກທະລຸ​ຢ່າງ​ຈິງ​ຈັງ ​ແລະ ​ເປັນ​ຮູບ​ປະ​ທຳ​ດີ​ຂຶ້ນ.

ບັນຫາ​ພົ້ນ​ເດັ່ນ​ທີ່​ບັນດາ​ຜູ້​ແທນ​ໄດ້​ຍົກ​ມາ​ເປັນ​ປະ​ເດັນ​ຫລັກໆ​ກໍ​ແມ່ນ​ເລື່ອງ​ທີ່​ດິນ, ​ເລື່ອງ​ຂອດ​ພະນັກງານ​ລັດ​ສໍ້​ລາດ​ບັງ​ຫລວງ, ​ເລື່ອງ​ການ​ເກັບ​ລາຍ​ຮັບ​ບໍ່​ໄດ້​ຕາມ​ແຜນ​ຍ້ອນ​ຫລາຍ​ສາ​ເຫດ, ​ເລື່ອງ​ໜີ້​ສິນ, ​ເລື່ອງ​ກົນ​ໄກ​ບໍລິການ​ປະຕູ​ດຽວ, ​ແຜນ​ລາຍ​ຮັບ-ລາຍ​ຈ່າຍ, ຕະຫລອດ​ການ​ປະກອບ​ຄຳ​ເຫັນ​ຂອງ​ສະພາ​ຕໍ່​ລັດຖະບານ ​ແລະ ຮັບຮອງ​ເອົາ​ກົດໝາຍ​ໃໝ່, ກົດໝາຍ​ສະບັບ​ປັບປຸງ​ໄດ້​ຫລາຍ​ສະບັບ.

​    ແນວ​ໃດ​ກໍ​ຕາມ, ​ໃນ​ບັນຫາ​ຕ່າງໆທີ່​ໄດ້​ຍົກ​ເອົາ​ມາ​ເວົ້າວ່າ​ຢູ່​ໃນ​ສະພາ​ຄັ້ງນີ້, ມັນ​ລ້ວນ​ແລ້ວ​ແຕ່​ພົວພັນ​ເຖິງ​ຊາຕາກຳ​ຂອງ​ປະ​ເທດ​ຊາດ, ​ເຊິ່ງພວກ​ເຮົາ​ທັງ​ໝົດ​ທຸກ​ຄົນ​ພາຍ​ໃນຊາດ​ຈະ​ຕ້ອງ​ມີ​ຄວາມ​ຮັບຜິດຊອບ​ເພື່ອ​ຈັດຕັ້ງຜັນ​ຂະຫຍາຍ​ໃຫ້​ເກີດ​ດອກ​ອອກ​ຜົນ.

ສ່ວນ​ຜູ້​ທີ່​ນຳພາ​ເຮັດ​​ນຳພາ​ສ້າງ ​ກໍ​ບໍ່​ມີ​ໃຜ​ນອກຈາກ​ພັກ ​ແລະ ລັດຖະບານ, ​ໂດຍ​ມີ​ອົງການ, ຂະ​ແໜງ​ການ​ທີ່​ກ່ຽວຂ້ອງ​ຕ້ອງ​ໄດ້​ພາກັນ​ເລັ່ງຂຸ້ນຂ້ຽວ​ປະຕິບັດ ຈຶ່ງ​ຈະ​ໄດ້​ຮັບໝາກ​ຮັບ​ຜົນ​ເປັນ​ຕົນ​ເປັນ​ຕົວ​ອອກ​ມາ.

ຜູ້​ທີ່​ຕັດສິນ​ຊີ້ຂາດ​ໃນ​ພາລະກິດ​ແທ້ໆ ກໍ​ແມ່ນ​ເຈົ້າພະນັກງານ​ທີ່​ເປັນ​ຫົວ​ຈັກ​ຫລັກ​ແຫ​ລ່ງຕ້ອງ​ເປັນ​ເຈົ້າການ​ນຳ​ໜ້າ​ພາ​ທາງ​ມີ​ຄວາມ​ຮັບຜິດຊອບ​ສູງ ​ແລະ ສັດຊື່​ບໍລິສັດ​ຕໍ່​ຜົນ​ປະ​ໂຫຍ​ດລວມຂອງ​ຊາດ​ນັ້ນ​ເປັນ​ທີ່​ຕັ້ງ, ​ເທົ່າ​ທີ່​ຜ່ານ​ມາ​ບັນຫາ​ຕ່າງໆທີ່​ມັນ​ຍັງ​ອຶດ​ອາດ, ​ເກີດ​ປາກົດການ​ຫຍໍ້​ທໍ້​ພາຍ​ໃນ​ມັນ​ລ້ວນ​ແລ້ວ​ແຕ່​ແມ່ນ​ເຈົ້າພະນັກງານ, ບັນດາ​ສະຫາຍ​ສະມາຊິກ​ພັກ​ຈໍານວນ​ໜຶ່ງ ເປັນ​ຜູ້​ພາ​ເພ​ເພາະ​ຈະ​ເຮັດ​ອັນ​ໃດ​ລົງ​ໄປ ​ຜິດ ຫລື ຖືກ ​ກໍ​ເລີ່​ມມາ​ຈາກ​ອົງຄະ​ນະ​ພັກ, ບັນດາ​ສະຫາຍ​ສະມາຊິກ​ພັກ​ຢູ່​ບ່ອນ​ນັ້ນໆ ​ເປັນຕົ້ນ​ເຫດ ​ແລະ ຕັດສິນບັນຫາ.

- lattana 1 - ກອງ​ປະຊຸມ​ສະພາ​ຂໍ​ໃຫ້​ເລັ່ງລັດ​ແກ້​ໄຂ​ບັນຫາ​ຂອງ​ຊາດ

​    ໃນ​ຄວາມ​ເປັນ​ຈິງ​ແລ້ວ, ​ໃນ​ທຸກ​ອົງ​ກອນ ​ແລະ ບັນດາ​ຂະ​ແໜງ​ການ​ຂອງ​ລັດ​ບໍລິຫານພວກ​ເຮົາ​ກໍ​ມີ​ອົງການ​ຈັດຕັ້ງຂອງ​ພັກ, ຂອງ​ລັດ​ຢ່າງ​ແໜ້ນໜາ​ຮັດກຸມ. ນອກຈາກ​ນັ້ນ, ກໍຍັງ​ມີ​ໜ່ວຍ​ງານ​ກວດກາ​ຂອງ​ພັກ, ໜ່ວຍ​ງານ​ກວດກາ​ຂອງ​ລັດ​ຢ່າງ​ຄົບ​ຊຸດ, ​ແຕ່​ເປັນ​ຫຍັງບັນດາ​ປາກົດການ​ຫຍໍ້​ທໍ້​ຢູ່​ພາຍ​ໃນ​ບາງ​ບ່ອນ​ຫລື​ຕາມ​ຂະ​ແໜງ​ການ​ກົມ​ກອງຂັ້ນສູນ​ກາງ ​ແລະ ທ້ອງ​ຖິ່ນ ຈຶ່ງ​ເກີດ​ມີ​ບັນຫາ​ປາກົດການ​ຫຍໍ້​ທໍ້​ເກືອບ​ວ່າ​ກາຍ​ເປັນ​ຊຳ​ເຮື້ອ, ອັນ​ສາ​ເຫດ​ຕົ້ນຕໍ​ກໍ​ເນື່ອງ​ມາ​ຈາກ​ກະ​ໂຕ​ສະມາຊິກ​ພັກ, ພະນັກງານ ​ແລະ ​ແກນ​ນຳ​ຢູ່​ບ່ອນ​ນັ້ນ​ເປັນຕົ້ນ​ເຫດ ຫລື ຮ້າຍ​ແຮງ​ກວ່າ​ນັ້ນຍັງ​ນຳພາ​ໝູ່​ເຮັດ​ພາ​ໝູ່​ໄປ​ ອັນ​ເປັນ​ການ​ກະທຳ​ຜິດ​ຕໍ່ກົດ​ລະບຽບ​ຂອງ​ພັກ ​ແລະ ກົດໝາຍ​ຂອງ​ລັດ.

​  ເຖິງ​ຢ່າງ​ໃດ​ກໍ​ດີ, ​ໃນ​ເມື່ອ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 8 ຂອງ​ສະພາ​ແຫ່ງ​ຊາດ​ທີ VIII ຄັ້ງນີ້​ໄດ້​ສຳ​ເລັດ​ເສັດ​ຊິ້ນ​ໄປ​ແລ້ວບັນຫາ​ການຈັດຕັ້ງຜັນ​ຂະຫຍາຍ​ບັນດາ​ໜ້າ​ວຽກ ຫລື ມະຕິ​ຕ່າງໆ ທີ່​ຜ່ານ​ສະພາ​ຮັບຮອງ​ໄປ​ແລ້ວ​ຕ້ອງ​ໄດ້​ປະຕິບັດ​ໃຫ້​ເກີດ​ດອກ​ອອກ​ຜົນ​ເປັນ​ຮູບປະ​ທຳ​ອອກ​ມາ​ຢ່າງ​ໜ້າ​ເພິ່ງ​ພໍ​ໃຈ.

​ໄປ​ຄຽງ​ຄູ່​ກັນນັ້ນ, ການ​ຜັນ​ຂະຫຍາຍ​ມະຕິ​ຄັ້ງທີ X ຂອງ​ພັກ ​ແລະ ການ​ປະຕິບັດ​ແຜນ​ພັດທະນາ​ເສດຖະກິດ-ສັງຄົມ 5 ປີ​ແຫ່ງ​ລັດ​ກໍ​ໄດ້​ຍ່າງ​ກ້າວ​​ເຂົ້າມາ​ທ້າຍ​ສະ​ໄໝ​ແລ້ວ. ນັບ​ແຕ່​ໄລຍະ​ນີ້​ຫາກ​ອງປະຊຸມ​ໃຫຍ່​ຄັງທີ XI ຂອງ​ພັກຂະ​ບວນການ​ຕ່າງໆ ທີ່​ປິ່ນ​ອ້ອມ​ເພື່ອ​ສ້າງ​ຜົນງານ​ຕ້ອນຮັບ​ກໍ​ແມ່ນ​ກອງ​ປະຊຸມ​ສາມ​ຂັ້ນ, ​ໂດຍ​ສະ​ເພາະ​ແມ່ນ​ກອງ​ປະຊຸມ​ອົງຄະ​ນະ​ພັກຂັ້ນ​ເມືອງ, ຂັ້ນ​ແຂວງ, ຂັ້ນກະຊວງ​ທະບວງ​ກົມ​ທີ່​ພວມ​ທະ​ຍອຍ​ສືບ​ຕໍ່​ຈົນ​ກວ່າ​ສຳ​ເລັດ ​ແລ້ວ​ກໍ​ແມ່ນ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຂອງ​ພັກ.

ຜ່ານ​ກອງ​ປະຊຸມ​ໃຫຍ່​ສາມ​ຂັ້ນທີ່​ກ່າວ​ມາ​ນີ້​ຈະ​ສາມາດ​ແກ້​ໄຂ​ບັນດາ​ບັນຫາ​ຂັ້ນຂອດ​ທີ່​ຄົງຄ້າງ​ຕ່າງໆ ອັນ​ເກົ່າ ​ແລະ ສືບ​ຕໍ່​ແຜນ​ພັດທະນາ​ເສດຖະກິດ-ສັງຄົມ​ໃນ​ໄລຍະ​ໃໝ່​ຂອງ​ແຕ່ລະ​ກົມ​ກອງ​ທ້ອງ​ຖິ່ນ​ກ້າວ​ໃຫ້​ກ້າວ​ໄປ​ໜ້າ ​ແລະ ​ເຫັນ​ປະຈັກ​ຕາ​ຢ່າງ​ບໍ່​ຢຸດ​ຢັ້ງ.

​    ເພາະສະນັ້ນ, ກອງ​ປະຊຸມ​ສະພາ​ຄັ້ງນີ້, ​ຈຶ່ງ​ເປັນຄັ້ງສຳຄັນ​ຕໍ່​ພາລະ​ກຳ​ປະຫວັດສາດ ກໍ​ຄື​ພາລະກິດ​ຂອງ​ຊາດ, ​ເຊິ່ງຄົນ​ລາວ​ທັງ​ມວນ​ຕ້ອງ​ພ້ອມ​ກັນ​ຕິດຕາມ, ຮັບ​ຮູ້​ເຊື່ອມ​ຊຶມ ​ແລະ ນຳ​ໄປ​ຜັນ​ຂະຫຍາຍ​ໂດຍ​ທົ່ວ​ເຖິງ​ກັນ.

error: Content is protected !!