ລັດຖະບານຊີ້ນຳຫລາຍບັນຫາໃຫ້ສູນກາງ ແລະ ທ້ອງຖິ່ນເອົາໃຈໃສ່ຈັດຕັ້ງປະຕິບັດໃຫ້ມີປະສິດທິຜົນ
ກອງປະຊຸມລັດຖະບານເປີດກວ້າງ ຄັ້ງທີ II ປີ 2019 ໄດ້ອັດລົງໃນວັນທີ 20 ທັນວານີ້ ພາຍຫລັງດຳເນີນມາເປັນເວລາ 2 ວັນ ໂດຍການເປັນປະທານຂອງທ່ານນາຍົກລັດຖະມົນຕີ ທອງລຸນ ສີສຸລິດ, ມີສະມາຊິກລັດຖະບານ, ເຈົ້າຄອງນະຄອນຫລວງ, ເຈົ້າແຂວງ, ອົງການຈັດຕັ້ງພັກ, ສະພາແຫ່ງຊາດ, ອົງການໄອຍະການ, ສານປະຊາຊົນສູງສຸດ, ແນວລາວສ້າງຊາດ ແລະ ອົງການຈັດຕັ້ງມະຫາຊົນເຂົ້າຮ່ວມ.
ກອງປະຊຸມໄດ້ເປັນເອກະພາບຊີ້ນຳໃຫ້ບັນດາຂະແໜງການຂັ້ນສູນກາງ ແລະ ທ້ອງຖິ່ນເອົາໃຈໃສ່ຫລາຍຂຶ້ນ ເພື່ອຕິດຕາມກວດກາການຈັດຕັ້ງປະຕິບັດ ແລະ ມີມາດຕະການເຂັ້ມງວດຂຶ້ນ ໂດຍສະເພາະສືບຕໍ່ປັບປຸງຮ່າງດຳລັດວ່າດ້ວຍການຈັດຕັ້ງແຜນພັດທະນາເສດຖະກິດ-ສັງຄົມແຫ່ງຊາດ ແລະ ແຜນງົບປະມານແຫ່ງລັດ ປະຈຳປີ 2020 ໃຫ້ມີເນື້ອໃນກະທັດຮັດ, ເຂົ້າໃຈງ່າຍ ແລະ ແທດເໝາະກັບສະພາບຕົວຈິງ, ພ້ອມທັງສອດຄ່ອງກັບມະຕິຂອງກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ເພື່ອໃຫ້ແຕ່ລະຂະແໜງການນຳໄປຈັດຕັ້ງຜັນຂະຫຍາຍໃຫ້ເປັນແຜນການ, ໂຄງການລະອຽດ ແລະ ສາມາດປະຕິບັດໄດ້ແຕ່ເດືອນມັງກອນ ປີ 2020 ເປັນຕົ້ນໄປ, ສືບຕໍ່ເອົາໃຈໃສ່ຈັດສັນງົບປະມານຈາກທຸກແຫລ່ງທີ່ມີ ສຳລັບແກ້ໄຂໄພພິບັດ ແລະ ໃຫ້ສາມາດນຳໃຊ້ໄດ້ຢ່າງທັນການ. ພ້ອມນີ້ ໃຫ້ບັນດາຂະແໜງການ ແລະ ທ້ອງຖິ່ນກະກຽມ ແລະ ຂຶ້ນງົບປະມານແກ້ໄຂໄພພິບັດໃຫ້ຖືກຕ້ອງສອດຄ່ອງກັບສະພາບຕົວຈິງ ເພື່ອໃຫ້ຮັບປະກັນການນຳໃຊ້ງົບປະມານທີ່ມີຈຳກັດມີປະສິດທິຜົນ.
ກອງປະຊຸມໄດ້ເຫັນດີມອບໃຫ້ຄະນະສະເພາະກິດຂັ້ນສູນກາງ ສົມທົບກັບນະຄອນຫລວງ ສືບຕໍ່ປະຕິບັດໂຄງການສົ່ງເສີມການຜະລິດເປັນສິນຄ້າ, ການຄ້ຳປະກັນສະບຽງອາຫານ, ການຊົມໃຊ້ຜະລິດຕະພັນທີ່ຜະລິດໄດ້ພາຍໃນ ແລະ ຄຸ້ມຄອງການນຳເຂົ້າສິນຄ້າອຸປະໂພກ-ບໍລິໂພກໃຫ້ສຳເລັດ, ພ້ອມທັງຊີ້ນຳໃຫ້ທ້ອງຖິ່ນຕ່າງໆແຕ່ງຕັ້ງຄະນະສະເພາະກິດຂອງຕົນຂຶ້ນ ເພື່ອດຳເນີນການຊຸກຍູ້ສົ່ງເສີມການຜະລິດຂອງປະຊາຊົນໃຫ້ໄດ້ຮັບຜົນດີ ແລະ ມີຂະບວນການຟົດຟື້ນ ເພື່ອຫລຸດຜ່ອນການນຳເຂົ້າສິນຄ້າຈາກຕ່າງປະເທດ. ກອງປະຊຸມໄດ້ມອບໃຫ້ຄະນະສະເພາະກິດສືບຕໍ່ກວດກາໃນທົ່ວປະເທດ ແລະ ແກ້ໄຂບັນຫາການເຊົ່າ-ສຳປະທານທີ່ດິນລັດບໍ່ຖືກຕ້ອງໃຫ້ຫລຸດລົງ ໂດຍສອດຄ່ອງຕາມລະບຽບກົດໝາຍ, ພ້ອມທັງຊີ້ນຳໃຫ້ອຳນາດການປົກຄອງທ້ອງຖິ່ນເອົາໃຈໃສ່ໃນການຕິດຕາມກວດກາ ແລະ ແກ້ໄຂບັນຫາດັ່ງກ່າວໃຫ້ທັນການ, ບໍ່ແກ່ຍາວ ແລະ ໄດ້ຮັບຜົນດີ.
ກອງປະຊຸມໄດ້ຊີ້ນຳໃຫ້ບັນດາຂະແໜງການ ແລະ ທ້ອງຖິ່ນເອົາໃຈໃສ່ປະຕິບັດການສອບເສັງລັດຖະກອນໃຫ້ມີຄວາມໂປ່ງໃສ, ສະເໝີພາບ ແລະ ຍຸຕິທຳ, ການສັບຊ້ອນບັນຈຸຕ້ອງຜ່ານການສອບເສັງຕາມຫລັກການ ແລະ ຂັ້ນຕອນຢ່າງເຂັ້ມງວດ ບົນພື້ນຖານຄວາມຮູ້, ຄວາມສາມາດ, ສອດຄ່ອງກັບມາດຕະຖານຕຳແໜ່ງງານວ່າງ, ຫ້າມຮັບເອົາພະນັກງານອາສາສະໝັກ, ພະນັກງານຕາມສັນຍາເຂົ້າເປັນລັດຖະກອນ ໂດຍບໍ່ຜ່ານການສອບເສັງເດັດຂາດ. ນອກນີ້ ລັດຖະບານໄດ້ຊີ້ນຳໃຫ້ບັນດາຂະແໜງການ ແລະ ທ້ອງຖິ່ນເລັ່ງລັດປະຕິບັດດຳລັດວ່າດ້ວຍການສົ່ງເສີມວິສາຫະກິດຂະໜາດນ້ອຍ-ກາງ, ໃນນັ້ນ ກອງທຶນສົ່ງເສີມວິສາຫະກິດຕ້ອງປະສານສົມທົບກັບບັນດາທະນາຄານທຸລະກິດ ແລະ ພາກສ່ວນອື່ນໆ ເພື່ອຮັບປະກັນໃຫ້ຈຸນລິວິສາຫະກິດ, ວິສາຫະກິດຂະໜາດນ້ອຍ-ກາງ ສາມາດເຂົ້າເຖິງແຫລ່ງທຶນໄດ້ໄວ ແລະ ນຳໃຊ້ເຂົ້າໃນການຜະລິດ, ທຸລະກິດຢ່າງມີປະສິດທິຜົນ. ພ້ອມນີ້ກໍໄດ້ມອບໝາຍໃຫ້ກະຊວງແຜນການ ແລະ ການລົງທຶນ ສົມທົບກັບລັດຖະມົນຕີປະຈຳສຳນັກງານນາຍົກລັດຖະມົນຕີ ປັບປຸງຮ່າງຄຳສັ່ງຂອງນາຍົກລັດຖະມົນຕີ ວ່າດ້ວຍການບໍລິການປະຕູດຽວໃຫ້ສຳເລັດ ເພື່ອໃຫ້ທ່ານນາຍົກລັດຖະມົນຕີລົງນາມປະກາດໃຊ້.
