​ເລັ່ງສົ່ງ​ເສີມ​ການ​ຜະລິດ​ ເສດຖະກິດ​ຈຶ່ງ​ເຂັ້ມ​ແຂງ

- 7 - ​ເລັ່ງສົ່ງ​ເສີມ​ການ​ຜະລິດ​ ເສດຖະກິດ​ຈຶ່ງ​ເຂັ້ມ​ແຂງ
- Untitled design - ​ເລັ່ງສົ່ງ​ເສີມ​ການ​ຜະລິດ​ ເສດຖະກິດ​ຈຶ່ງ​ເຂັ້ມ​ແຂງ

ທິດ​ກໍ່າ:

     ຈາກ​ຕົວ​ເລກການ​ສົ່ງ​ອອກ​ຂອງ​ລາວ​ເຮົາ ນັບ​ແຕ່​ເດືອນ​ມັງກອນ​ຫາ​ເດືອນ​ພະຈິກ ປີ 2019 ບັນລຸ​ໄດ້ 372 ລ້ານ​ໂດ​ລາ​ສະຫະລັດ, ​ແຕ່​ວ່າການ​ນຳ​ເຂົ້າມີ​ເຖິງ 635 ລ້ານ​​ໂດ​ລາ​ສະຫະລັດ. ​ເມື່ອ​ເປັນ​ເຊັ່ນ​ນີ້ ກໍ​ສະ​ແດງ​ວ່າ​ຍັງ​ຂາດ​ດຸນ​ຢູ່ 263 ລ້ານ​ໂດ​ລາ​ສະຫະລັດ. ປະ​ເພດ​ສິນຄ້າ​ຫລັກ​ທີ່​ລາວ​ເຮົາ​ສົ່ງ​ອອກ​ມີ​ແຮ່​ທາດ, ຜົນ​ຜະລິດ​ກະສິກຳ ​ແລະ ​ເຄື່ອງ​ປ່າ​ຂອງ​ດົງ​ເປັນຕົ້ນຕໍ, ສ່ວນ​ສິນຄ້າ​ນຳ​ເຂົ້າຫລັກໆ​ປະກອບ​ມີ: ພາຫະນະ, ອາ​ໄຫລ່, ​ເຄື່ອງ​ກົນ​ຈັກ, ລົດ ​ແລະ ​ເຄື່ອງ​ໃຊ້​ສອຍ​ໃນ​ຊີວິດ​ປະຈຳ​ວັນ​ອື່ນໆ.

      ​​ເມື່ອ​ຕັ້ງ​ໂຈດ​ກັນ​ວ່າ: ດ້ວຍ​ສາ​ເຫດ​ໃດ ຕົວ​ເລກ​ການ​ຂາດ​ດຸນ​ຈຶ່ງ​ຍັງ​ຂ້ອນ​ຂ້າງ​ສູງ ? ມັນ​ກໍ​ບໍ່​ມີ​ຫຍັງ​ແປກ​ປະຫລາດ ​ໃນ​ເມື່ອ​ການ​ສົ່ງ​ອອກ​ໜ້ອຍ ການ​ນຳ​ເຂົ້າຫລາຍ​ກໍ​ຖື​ວ່າ​ມີ​ການ​ຂາດ​ດຸນ​ຫລາຍ. ກົງກັນຂ້າມ ຖ້າ​ມີ​ການ​ສົ່ງ​ອອກ​ຫລາຍ ການ​ນຳ​ເຂົ້າໜ້ອຍ​ກໍ​ຖື​ວ່າ​ຂາດ​ດຸນ​ໜ້ອຍ ຫລື ຖ້າ​ຫາກ​ການ​ສົ່ງ​ອອກ​ເກີນ​ກວ່າ​ການ​ນຳ​ເຂົ້າຢ່າງ​ຫລວງຫລາຍ​ກໍ​ເປັນ​ອັນວ່າ​ບໍ່​ມີ​ການ​ຂາດ​ດຸນ ​ເອີ້ນ​ວ່າ: ​ເກີນດຸນ ​ເມື່ອນັ້ນຈຶ່ງ​ຖື​ວ່າ​ລະບົບ​ເສດຖະກິດ​ຂອງ​ຊາດ​ມີ​ຄວາມ​ໝັ້ນຄົງ ​ແລະ ຍືນ​ຍົງ. ​ໃນ​ຫລາຍ​ສະຕະວັດ​ຜ່ານ​ມາ ຕ້ອງ​ຍອມຮັບ​ວ່າ​ເສດຖະກິດ​ການ​ຜະລິດ​ຂອງ​ບ້ານ​ເຮົາ​ບໍ່​ທັນ​ເຂັ້ມ​ແຂງ​ອີ່ຫລີ. ສາ​ເຫດ​ກໍ​ເນື່ອງ​ມາ​ຈາກ​ຫລາຍ​ປັດ​ໄຈ ຈົນ​ກາຍ​ເປັນ​ພື້ນຖານ​ອັດ​ຕະລັກ​ທາງ​ດ້ານ​ເສດຖະກິດ ​ແລະ ສັງຄົມ​ວັດທະນະທຳ​ຈົນ​ຈະ​ແກ້​ໄຂ​ໄດ້​ຍາກ. ​ໃນ​ປະຫວັດສາດ​ປະ​ເທດ​ພວກ​ເຮົາ​ເຄີຍ​ເປັນ​ຫົວ​ເມືອງ​ຂຶ້ນຂອງ​ສັກ​ດີ​ນາ ​ແລະ ຈັກກະພັດ​ເຂົ້າມາ​ຍຶດຄອງ​ຫລາຍ​ເຊັ່ນ​ຄົນ. ​ໃນ​ຍຸກ​ນັ້ນ ພວກ​ທີ່​ຍຶດຄອງ​ກຳ​ອຳນາດ ພວກ​ເຂົາ​ໄດ້​ກົດ​ໜ່ວງ​ບໍ່​ໃຫ້​ມີ​ການ​ຜະລິດ, ບໍ່​ສົ່ງ​ເສີມ​ການ​ຜະລິດ​ຈົນ​ວ່າ​ບໍ່​ມີ​ການ​ນຳ​ເຂົ້າ ​ແລະ ສົ່ງ​ອອກ​ສິນຄ້າ ​ເຊິ່ງອັນ​ໃດ​ກໍ​ມີ​ແຕ່​ເຂົາ​ເປັນ​ຜູ້​ຜູກຂາດ​ເຮັດ​ເອງ, ທຳ​ເອງ​ທັງ​ໝົດ, ຊ້ຳບໍ່​ໜຳ ຍັງ​ກອບ​ໂກຍ​ເອົາ​ຊັບ​ໃນ​ດິນ ສິນ​ໃນ​ນ້ຳຂອງ​ລາວ​ເຮົາ​ໄປ​ສ້າງ​ຮັ່ງ​ຄູນ​ມີ​ໃຫ້​ພວກ​ເຂົາ​ຈົນ​ນັບ​ບໍ່​ຖ້ວນ. ນີ້​ລະ​ຄື​ຊະ​ຕາ​ກຳ​ຂອງ​ປະ​ເທດ​ຊາດ​ໃນ​ຍຸກ​ເປັນ​ປະ​ເທດ​ຊະລາ​ດ. ນອກຈາກ​ນັ້ນ ພື້ນຖານ​ການ​ຜະລິດ​ຂອງ​ປະຊາຊົນ​ເຮົາ​ພັດ​ຂຶ້ນກັບ​ທຳ​ມະ​ຊາດ ປີ​ໃດ​ຟ້າ​ຝົນ​ດີ​ກໍ​ກຸ້ມ​ກິນ ປີ​ໃດ​ເກີດ​ແລ້ງ​ເກີດ​ຖ້ວມ​ກໍ​ເປັນ​ອັນວ່າ​ຂາດ​ຢູ່​ຂາດ​ກິນ. ​ເວົ້າ​ເລື່ອງ​ການ​ເຮັດ​ໄຮ່​ກໍ​ຖາງ​ປ່າ​ໄປ​ຕິກໆ ການ​ເຮັດ​ກໍ​ຍ່າງ​ຕາມ​ກົ້ນຄວາຍ. ​ເບິ່ງ​ຢ່າງ​ໜຶ່ງ​ຄື​ດຸ​ໝັ່ນ​ເຮັດ​ບໍ່​ຢູ່​ບໍ່​ເຊົາ ​ແຕ່​ປະ​ເທດ​ຊາດ​ພັດ​ຍັງ​ທຸກ​ຢູ່. ​ໃນ​ຫລາຍ​ສະຕະວັດ​ຜ່ານ​ມາ ອາດ​ເວົ້າ​ໄດ້​ວ່າ​ມີ​ແຕ່​ການ​ຜະລິດ​ກຸ້ມ​ຕົນ​ເອງ​ພໍ​ຢູ່​ພໍ​ກິນ​ກໍ​ແລ້ວ​ໄປ ຍັງ​ບໍ່​ທັນ​ໄດ້​ຄິດ​ເຖິງ​ຄວາມ​ຈະ​ເລີ​ນຮັ່ງມີ​ຂອງ​ຊາດ. ຈາກ​ພື້ນຖານ ​ແລະ ຄວາມ​ຊິນ​ເຄີຍ​ດັ່ງກ່າວ​ເກືອບ​ເວົ້າ​ໄດ້​ວ່າ​ມາ​ຮອດ​ປັດຈຸບັນ​ນີ້ ​ເບິ່ງ​ຄື​ພວກ​ເຮົາ​ຍັງ​ຕິດ​ນິດ​ໃສ​ອັນ​ເກົ່າ​ຄອງ​ເດີມ​ຈົນ​ເຂົ້າກະດູກ​ດຳ​ເກືອບ​ຈະ​ແກ້​ໄຂ​ໄດ້​ຍາກ.

      ​ເພາະສະນັ້ນ, ອີງ​ໃສ່​ແນວທາງ​ຂອງ​ພັກ ​ແລະ ລັດຖະບານ​ໃນ​ການ​ປົກຄອງ​ບ້ານ​ເມືອງ​ຍຸກ​ປັດ​ຈຸ​ບັນ​ໄດ້​ກຳນົດ​ທິດ​ທາງ​ເດີນ​ຂອງ​ຊາດ​ຢ່າງ​ຈະ​ແຈ້ງ ຄື​ໃຫ້​ມີ​ການ​ຜະລິດ​ເພິ່ງ​ຕົນ​ເອງ ກຸ້ມ​ຕົນ​ເອງ ກ້າວ​ໄປ​ເຖິງ​ຫັນ​ເປັນ​ອາຊີບ​ທີ່​ໝັ້ນຄົງ ຍືນ​ຍົງ​ເຂັ້ມ​ແຂງ​ໃນ​ຫລາກ​ຫລາຍ​ສາຂາ​ອາຊີບ ບໍ່​ວ່າ​ໃນ​ພາກ​ອຸດສາຫະກຳ, ກະສິກຳ​ຂະໜາດ​ນ້ອຍ​-ຂະໜາດ​ກາງ​ໃຫ້​ຫລາກ​ຫລາຍ​ເພື່ອ​ສົ່ງ​ອອກ ພວກ​ເຮົາ​ຈຶ່ງ​ຈະ​ສາມາດ​ຢູ່​ລອດ​ໃນ​ສັງຄົມ​ຍຸກ​ພັດທະນາ​ໄດ້.

     ຕາມ​ເຮົາ​ຄິດ, ຕະຫລາດ​​ໃຫຍ່​ສົ່ງ​ອອກ​ສິນຄ້າ​ຂອງ​ລາວ​ໃນ​ປັດຈຸບັນ ​ແລະ ອະນາຄົດ​ແມ່ນ ສປ ຈີນ ທີ່​ຈະ​ຊ່ວຍ​ໃຫ້​ປະ​ເທດ​ຊາດ​ຂອງ​ພວ​ກ​ເຮົາ​ຮັ່ງມີ​ເຂັ້ມ​ແຂງ ບໍ່​ແມ່ນ​ປະ​ເທດ​ໄທ. ອັນ​ນີ້​ຂໍ​ຄວາມ​ຊື່, ​ແຕ່​ໄທ​ໄດ້​ຖື​ເອົາ​ລາວ​ເປັນ​ຍຸດ​ທະ​ສາດ​ຂອງ​ຕະຫລາດ​ຈຳໜ່າຍ​ສິນຄ້າ​ທຸກ​ປະ​ເພດ, ທຸກ​ວິທີ ​ແລະ ທຸກ​ຮູບ​ແບບ ນັບ​ແຕ່​ໃດ​ມາ​ຈົນ​ຮອດ​ຍຸກ​ປັດຈຸບັນ ຄົນ​ລາວ​ເຮົາ​ຕິດ​ພັນ​ກັບ​ເສດຖະກິດ​ຂອງ​ໄທ​ເກືອບ​ເວົ້າ​ໄດ້​ວ່າ​ຈົນ​ແກະ​ບໍ່​ອອກ. ​ເມື່ອ​ຕັ້ງ​ໂຈດ​ກັນ​ວ່າ ມີ​ອັນ​ໃດ​ແດ່​ທີ່​ໄທ​ໄດ້​ຊື້ສິນຄ້າ​ຈາກ​ລາວ​ເຮົາ, ສ່ວນ​ໃຫຍ່ໆ​ຄົງ​ບໍ່​ນອກ​ເໜືອ​ຈາກ​ກະ​ແສ​ໄຟຟ້າ ​ເຫລືອ​ນັ້ນ​ແມ່ນ​ເປິະ ຍ້ອນ​ວ່າ​ພວກ​ເພິ່ນ​ມີ​ການ​ພັດທະນາ​ດ້ານ​ອຸດສາຫະກຳ, ກະສິກຳ​ຂະໜາດ​ນ້ອຍ-ຂະໜາດ​ກາງ​ໄປ​ໄກ​ມາ​ຫລາຍ​​ເຊັ່ນ​ຄົນ​ແລ້ວ. ສະນັ້ນ ການ​ທີ່​ຈະ​ຊື້ສິນຄ້າ​ດ້ານ​ອຸດສາຫະກຳ, ກະສິກຳ​ຈາກລາວ​ແມ່ນ​​ເປັນ​ໄປ​ໄດ້​ຍາກ ນອກຈາກ​ຈະ​ທັ່ງ​ເທ​ສິນຄ້າ​ຂອງ​ໄທ​ເຂົ້າມາ​ລາວ​ຢ່າງ​ບໍ່​ອັ້ນ. ນີ້​ຄື​ຄວາມ​ຈິງ​ເປັນ​ສິ່ງ​ບໍ່​ຕາຍ​ທີ່​ພວກ​ເຮົາ​ຕ້ອງ​ໄດ້​ຍອມຮັບ ທັງ​ຊອກ​ຫາ​ວິທີ​ແກ້​ດ້ານ​ແນວ​ຄິດ ​ແລະ ພຶດຕິ​ກຳ.

- Wave100S AD to Website 2020 0 - ​ເລັ່ງສົ່ງ​ເສີມ​ການ​ຜະລິດ​ ເສດຖະກິດ​ຈຶ່ງ​ເຂັ້ມ​ແຂງ

      ອີກ​ບໍ່​ນານ​ ທາງ​ລົດ​ໄຟ ລາວ-ຈີນ ຈະ​ສຳ​ເລັດ. ​ເມື່ອ​ຕັ້ງ​ໂຈດ​ກັນ​ວ່າ ລາວ​ເຮົາ​ມີ​ຜະລິດ​ຕະພັນ​ຫຍັງ​ແດ່​ທີ່​ຈະ​ສົ່ງ​ໄປ​ຂາຍ​ໃຫ້​ຈີນ ທັງໆ​ທີ່​ຈີນ​ມີ​ຄວາມ​ຕ້ອງການ​ສິນຄ້າ​ຈາກ​ລາວ​ຢ່າງ​ຫລວງຫລາຍ​ເຊັ່ນ: ງົວ​ຫລາຍ​ສິບ​ພັນ​ໂຕ​ຕໍ່​ເດືອນ​ຕໍ່​ປີ, ພືດ​ຜັກ​ປອດ​ສານພິດ​ຊະນິດ​ຕ່າງໆ ​ເປັນຕົ້ນໝາກກ້ວຍ​ສົ່ງ​ໄປ​ແລ້ວ ​ແລະ ສິນຄ້າ​ຊະນິດ​ອື່ນໆ​ທີ່​ຈີນ​ສາມາດ​ຊ່ວຍ​ເຫລືອ​ໄດ້. ​ໃນ​ໂອກາດ​ປີ​ທ່ອງ​ທ່ຽວ ລາວ-ຈີນ ທີ່​ຫາ​ກໍ​ຜ່ານ​ພົ້ນ​ໄປ​ໃນ​ປີ 2019 ​ໄດ້​ມີ​ນັກ​ທ່ອງ​ທ່ຽວ​ຈີນ​ເຂົ້າມາລາ​ວ 1 ລ້ານ​ຄົນ ​ໄດ້​ຕາມ​ຕົວ​ເລກ​ທີ່​ກຳນົດ, ​ແຕ່​ສິ່ງ​ທີ່​ພວກ​ເຮົາ​ຍອມຮັບ ​ແລະ ໜ້າ​ຄິດ​ນັ້ນ ພວກ​ເພິ່ນ​ເຖິງ​ຂັ້ນ​ໄດ້​ສະ​ເໜີ​ຂໍ​ໃຫ້​ລາວ​ຜະລິດ​ສິນຄ້າ​ທີ່​ຫລາກ​ຫລາຍ​ພໍ​ໄດ້​ຊື້ກັບ​ບ້ານ​​ໃນ​ໂອກາດ​ມາ​ທ່ຽວ​ເມືອງ​ລາວ ວ່າ​ຊັ້ນ ! ຄັກ​ບໍ່. ຈີນ​ມີ​ພົນລະ​ເມືອງ​ເປັນຕື້ໆ ທັງ​ເປັນ​ເພື່ອນ​ຮ່ວມ​ຊະ​ຕາ​ກຳ​ອັນ​ດຽວ​ກັນ, ​ເປັນ​ເພື່ອນ​ມິດ 4 ດີ, ​ເປັນ​ປະ​ເທດ​ກອມ​ມູນິດ​ທີ່​ມີ​ອຸດົມ​ການ​ອັນ​ດຽວ​ກັນ ມີ​ການ​ແລກປ່ຽນ​ຊ່ວຍ​ເຫລືອ​ເຊິ່ງກັນ ​ແລະ ກັນ​ຕາມ​ແນວທາງ​ຂອງ​ພັກ ​ແລະ ລັດຖະບານ​ຂອງ​ສອງ​ປະ​ເທດ​ວາງ​ອອກ. ສິ່ງ​ສຳຄັນ​ທີ່​ສຸດ ​ໃນ​ປັດຈຸບັນ ກໍ​ຄື​ອະນາຄົດ​ ຄິດ​ວ່າ​ຈີນ​ຈະ​ເປັນ​ຕະຫລາດ​ໃຫຍ່​ສຳຄັນ​ຂອງ​ລາວ​ເພື່ອ​ການ​ສົ່ງ​ອອກປະ​ເທດ​ໜຶ່ງ​ໃນ​ພາກ ພື້ນ.

      ດ້ວຍ​ສາ​ເຫດ​ດັ່ງກ່າວ, ​ເພື່ອ​ໃຫ້​ເສດຖະກິດ​ການ​ຜະລິດ​ຂອງ​ລາວ​ເຂັ້ມ​ແຂງ​ເຕີບ​ໃຫຍ່​ໄວ ກໍ​ມີ​ແຕ່​ເລັ່ງສົ່ງ​ເສີມ​ໃຫ້​ຫລາກ​ຫລາຍ ​ເພື່ອ​ໃຫ້ການ​ນຳ​ເຂົ້າ​ໄດ້​ຫລຸດຜ່ອນ​ກ້າວ​ໄປ​ເຖິງ​ເກີນ​ດູ​ນ​ ເງິນ​ກີບ​ລາວ​ຈຶ່ງ​ຈ​ະ​ແຂງ​ຄ່າ. ຖ້າ​ເຮັດ​ບໍ່​ໄດ້​ຄື​ດັ່ງ​ວ່າ ຄົນ​ລາວ​ເຮົາ​ກໍ​ຈະ​ພາກັນ​ເຫີ່​ໄປ​ໄທ​ຢ່າງ​ບໍ່​ຂາດ​ໄລຍະ, ​ແຕ່​ລະມື້ພາກັນ​ຫລຸ​ຫລັ່ງ​ທັ່ງ​ເທ​ໄປ​ກິນ​ຂອງ​ໄທ, ຊື້ສິນຄ້າ​ໄທ, ​ໄປ​ທຳ​ງານ​ຢູ່​ໄທ, ສົ່ງ​ເສີມ​ເສດຖະກິດ​ໄທ​ໄດ້​ປະ​ໂຫຍ​ດ ມັນ​ກໍ​ຂອງ​ສົມ​ພໍ​ເງິນ​ບາດ​ໄທ​ແຂງ​ຄ່າ​ຕີ​ຖອຍ​ເງິນ​ກີບ​ລາວ​ໄປ​ຕິກໆ ກໍ​ແມ່ນ​ຍ້ອນ​ຄົນ​ລາວ​ເຮົາ​ເອງ​ບໍ່​ມີ​ສະຕິ​ຄວາມ​ເປັນ​ເຈົ້າຂອງ​ຄວາມ​ເປັນ​ຊາດ​ນັ້ນ​ເອງ ​ເສົາ​ວ່າ !.

- WhatsApp Image 2020 05 27 at 5 - ​ເລັ່ງສົ່ງ​ເສີມ​ການ​ຜະລິດ​ ເສດຖະກິດ​ຈຶ່ງ​ເຂັ້ມ​ແຂງ
- WhatsApp Image 2020 05 27 at 5 - ​ເລັ່ງສົ່ງ​ເສີມ​ການ​ຜະລິດ​ ເສດຖະກິດ​ຈຶ່ງ​ເຂັ້ມ​ແຂງ
error: Alert: ເນື້ອຫາຂ່າວມີລິຂະສິດ !!