ຄວບ​ຄຸມ​ສຽງ​ເນື່ອງ​ນັນ​ຕ້ອງ​ເຮັດ​ເດັດຂາດ​ຢ່າງ​ຈິງ​ຈັງ

ຄວບ​ຄຸມ​ສຽງ​ເນື່ອງ​ນັນ​ຕ້ອງ​ເຮັດ​ເດັດຂາດ​ຢ່າງ​ຈິງ​ຈັງ - 24 3 - ຄວບ​ຄຸມ​ສຽງ​ເນື່ອງ​ນັນ​ຕ້ອງ​ເຮັດ​ເດັດຂາດ​ຢ່າງ​ຈິງ​ຈັງ
ຄວບ​ຄຸມ​ສຽງ​ເນື່ອງ​ນັນ​ຕ້ອງ​ເຮັດ​ເດັດຂາດ​ຢ່າງ​ຈິງ​ຈັງ - Untitled design - ຄວບ​ຄຸມ​ສຽງ​ເນື່ອງ​ນັນ​ຕ້ອງ​ເຮັດ​ເດັດຂາດ​ຢ່າງ​ຈິງ​ຈັງ

ທິດ​ກໍ່າ:

     ​ໃນ​ວາລະ​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 8 ຂອງ​ສະພາ​ປະຊາຊົນ​ນະຄອນຫລວງ​ວຽງ​ຈັນ ຊຸດ​ທີ I ​ໃນ​ວັນ​ທີ 24 ມັງກອນ​ຜ່ານ​ມາ​ນີ້ ​ໄດ້​ຮັບຮອງ​ເອົາຮ່າງ​ຂໍ້​ຕົກລົງ​ວ່າ​ດ້ວຍ​ການ​ຄວບ​ຄຸມ​ສຽງ​ເນື່ອງ​ນັນ​ໃນ​ນະຄອນຫລວງ​ຢ່າງ​ເປັນ​ເອກະສັນ​ດ້ວຍ​ເຫດຜົນ​ທີ່​ວ່າ: ມາ​ຮອດ​ປັດຈຸບັນ​ມີ​ຄວາມ​ຈຳ​ເປັນ​ຢ່າງ​ສູງ ​ເນື່ອງ​ຈາກ​ວ່າ​ນະຄອນຫລວງ​​ໄດ້​ມີ​ການ​ພັດທະນາ​ດ້ວຍ​ຈັງຫວະ​ທີ່​ໄວ​ໃນ​ທຸກ​ດ້ານ ​ໂດຍ​ສະ​ເພາະ​​ເສດຖະກິດ-ສັງຄົມ ​ແລະ ການເປີດ​ກວ້າງດຶງ​ດູດ​ການ​ລົງທຶນ​ຈາກ​ຕ່າງປະ​ເທດ.

       ​ໄປ​ພ້ອມໆ​ກັບ​ດ້ານ​ຕັ້ງໜ້າ​ແລ້ວ ກໍ​ຍັງ​ມີ​ດ້ານ​ຫຍໍ້​ທໍ້​ທີ່​ເກີດ​ຂຶ້ນບໍ່ໜ້ອຍ ​ເຊິ່ງໜຶ່ງ​ໃນ​​ນັ້ນກໍ​ຄື​ມົນ​ລະ​ພິດ​ທາງ​ດ້ານ​ສຽງ​ເນື່ອງ​ນັນ​ກະທົບ​ໃສ່​ຊຸມ​ຊົນ ​ໂດຍ​ສະ​ເພາະ​​ແມ່ນສຽງ​ຈາກ​ການ​ບໍລິການ​ບັນ​ເທີ​ງຕາມ​ຮ້ານ​ອາຫານ, ຮ້ານ​ກິນ​ດື່ມ​ກາງ​ແຈ້ງ, ການ​ປຸກ​ສ້າງ ​ແລະ ການ​ຜະລິດ​ຕ່າງໆ ​ແລະ ຕາມ​ພາຫະນະ​ທີ່​ຖືກ​ດັດ​ແປງ, ສຽງ​ເນື່ອງ​ນັນ​ເກີດ​ຈາກ​ການ​ຊຸມ​ແຊວ, ງານ​ລ້ຽງ​ງານ​ດອງ, ງານ​ບຸນ ​ແລະ ງານ​ມຸງຄຸນ​ຕ່າງໆ. ​ໃນ​ຮ່າງ​ຂໍ້​ຕົກລົງ​ສະບັບ​ນີ້ ປະກອບ​ມີ 6 ໝວດ 32 ມາດຕາ ພາຍຫລັງ​ປະກາດ​ໃຊ້​ແລ້ວ​ຈະ​ມີ​ຜົນ​ດີ​ຕໍ່​ການ​ຄຸ້ມ​ຄອງ​ຄວາມ​ສະຫງົບ​ ສົມ​ກັບ​ວ່າ​ວຽງ​ຈັນ​ເປັນ​ນະຄອນຫລວງ​ຂອງ​ປະ​ເທດ. ​ໃນ​ຮ່າງ​ຂໍ້​ຕົກລົງ​ທີ່​ວ່າ​ນີ້ ຍັງ​ມີ​ການ​ກ່ຽວ​ພັນ​ເຊື່ອມ​ໂຍງ ​ແລະ ຮັບປະກັນ​ຕໍ່​ການຈັດຕັ້ງປະຕິບັດ​ການ​ຜັນ​ຂະຫຍາຍ​ຄຳ​ຂວັນ 6ສ ​ໂດຍ​ສະ​ເພາະ​ແມ່ນ ສ.ສະຫງົບ ທີ່​ໄດ້​ປະຕິບັດ​ກັນ​ມາ​ຫລາຍ​ປີ​ແລ້ວຄື: ສ.ສີວິ​ໄລ, ສ.ສະຫວ່າງ, ສ.ສີຂຽວ, ສ.ສະຫງົບ, ສ.ສະອາດ ​ແລະ ສ.ສະ​ເໜ່.

      ​ແນວ​ໃດ​ກໍ​ຕາມ, ກ່ຽວ​ກັບ​ເນື້ອ​ໃນ​ແຕ່​ລະ​ມາດຕາ ນັບ​ທັງ​ມາດ​ຕະການ​ຈັດຕັ້ງປະຕິບັດ​ຢ່າງ​ລະອຽດ ພວກ​ເຮົາ​ກໍ​ຍັງ​ບໍ່​ທັນ​ຮັບ​ຮູ້ ​ແລະ ບໍ່​ທັນ​ເຫັນ​ ຄາດ​ວ່າ​​ຈະ​ມີ​ການຈັດຕັ້ງ​ເຜີຍ​ແຜ່​​ໃຫ້​ກວ້າງຂວາງ​ທຸກ​ຊັ້ນຄົນ​ໄດ້​ຮັບ​ຮູ້​ເຊື່ອມ​ຊຶມ ​ແລະ ​ເປັນ​ບ່ອນ​ອີງ​ໃນ​ການຈັດຕັ້ງປະຕິບັດ​ຢ່າງ​ເປັນ​ເອກະ​ພາບ​ໂດຍ​ທົ່ວ​ເຖິງ​ກັນ. ດັ່ງ​ພວກ​ເຮົາ​ໄດ້​ເຫັນ​ຕົວ​ຈິງ ​ແລະ ຮັບ​ຮູ້​ມາ​ນຳ​ກັນ​ແລ້ວ​ວ່າ: ນັບ​ແຕ່​ມີ​ຄຳ​ຂວັນ 6ສ ​ເປັນຕົ້ນມາ ​ໄດ້​ສ້າງ​ເງື່ອນ​ໄຂ​ໃຫ້​ນະຄອນຫລວງ​ວຽງ​ຈັນ​ມີ​ສີສັນ ​ແລະ ມີ​ໃບ​ໜ້າ​ໃໝ່​ຂຶ້ນ​ເລື້ອຍໆ. ຫລ້າ​ສຸດ​ເມື່ອ​ບໍ່​ດົນ​ມາ​ນີ້ ນະຄອນ​ຫລວງ​ວຽງ​ຈັນ​ກໍ​ໄດ້​ຮັບ​ລາງວັນ​ເມືອງ​ທ່ອງ​ທ່ຽວ​ສະອາດ ​ເຊິ່ງ​ໄດ້​ປະກາດ​ການ​ຮັບ​ລາງວັນ​ໃນ​ວັນ​ທີ 16 ມັງກອນທີ່​ຜ່ານ​ມາ. ນອກຈາກ​ນັ້ນ ​ໃນ​ໂອກາດ​ງານ​ມະຫາ​ກຳ​ການທ່ອງທ່ຽວ​ທີ່​ຈັດ​ຂຶ້ນຢູ່​ປະ​ເທດ​ບຣູ​ໄນ ລະຫວ່າງ​ວັນ​ທີ 12 ຫາ​ວັນ​ທີ 16 ມັງກອນນີ້ ລາວ​ເຮົາ​ກໍ​ໄດ້​ຮັບ​ຫລາຍ​ລາງວັນ​ມາດຕະຖານ​ການ​ທ່ອງ​ທ່ຽວ​ໃນ​ລະດັບ​ອາ​ຊຽນ ​ເປັນຕົ້ນລາງວັນ​ມາດຕະຖານ​ສີຂຽວ​ອາ​ຊຽນ, ລາງວັນ​ມາດຕະຖານ​ສະຖານ​ທີ່​ຈັດ​ງານ​ປະຊຸມ​ອາ​ຊຽນ, ລາງວັນ​ມາດຕະຖານ​ເມືອງ​ທ່ອງ​ທ່ຽວ​ສະອາດ​ອາ​ຊຽນ ​ແລະ ລາງວັນ​ອື່ນໆ​ອີກ​ຫລາຍ​ລາງວັນ.

ຄວບ​ຄຸມ​ສຽງ​ເນື່ອງ​ນັນ​ຕ້ອງ​ເຮັດ​ເດັດຂາດ​ຢ່າງ​ຈິງ​ຈັງ - Wave100S AD to Website 2020 0 - ຄວບ​ຄຸມ​ສຽງ​ເນື່ອງ​ນັນ​ຕ້ອງ​ເຮັດ​ເດັດຂາດ​ຢ່າງ​ຈິງ​ຈັງ

      ​ແນວ​ໃດ​ກໍ​ຕາມ, ຄາດ​ວ່າ​ໃນ​ຕໍ່ໜ້າ ນະຄອນຫລວງ​​ເຮົາ​ຕ້ອງ​ມີ​ສີສັນ​ສວຍ​ງາມ​ຂຶ້ນນັບ​ມື້ ​ເພາະວ່າ​ໃນ​ອະນາຄົດ​ໄດ້​ມີ​ຫລາຍ​ໂຄງການ​ທີ່​ການ​ນຳ​ນະຄອນຫລວງ​ມີ​ແຜນການ ​ແລະ ​ໂຄງການ​ຈັດຕັ້ງປະຕິບັດ​ໃຫ້​ເກີດ​ດອກ​ອອກ​ຜົນ ​ເຊິ່ງ​ໃນ​ປີ 2020 ຄາດກະ​ໃຫ້​ເສດຖະກິດ​ເຕີບ​ໃຫຍ່​ເຖິງ 9,5% ​ຂອງ​ລວມຍອດ​ຜະລິດ​ຕະພັນ​ພາຍ​ໃນ. ​ໃນ​ໄລຍະ​ອັນ​ບໍ່​ດົນ​ນີ້ ​ໂຄງການ ສ.ສະຫວ່າງ ກໍ​ຈະ​ຖືກ​ຈັດຕັ້ງປະຕິບັດ ​ແລະ ທຸກ​ສິ່ງ​ທຸກ​ຢ່າງ​ໃນ 5 ​ເປົ້າໝາຍ​ສ້າງ​ນະຄອນຫລວງ​ວຽງ​ຈັນ​ໃຫ້​ເປັນສີຂຽວ​ກໍ​ຈະ​ປາກົດ​ຜົນ​ເປັນ​ຈິງ​ເຊັ່ນ​ວ່າ: ອັນ​ທີ​ໜຶ່ງ ​ເສັ້ນທາງ​ສີຂຽວ, ສອງ ສຳນັກງານ​ອົງການ, ​ເຄຫາ​ສະຖານ, ​ໂຮງຮຽນ, ​ໂຮງໝໍ ​ແລະ ວັດວາ​ສີຂຽວ, ສາມ ສວນສາທາລະນະ​ສີຂຽວ, ສີ່ ສວນ​ປູກ​ຕົ້ນ​ໄມ້ ​ແລະ ຟື້ນຟູ​ປ່າ​ທຳ​ມະ​ຊາດ​ສີຂຽວ ​ແລະ ຫ້າ ​ໂຮງ​ຈັກ​ໂຮງງານ​ສີຂຽວ.

      ​ເຖິງ​ຢ່າງ​ໃດ​ກໍ​ດີ, ສິ່ງ​ທີ່​ກ່າວ​ມາ​ຂ້າງ​ເທິງ​ນັ້ນມີ​ທັງ​ຜົນງານ​ທີ່​ເຮົາ​ເຮັດ​ໄດ້ ​ແລະ ມີ​ທັງ​ຄວາມ​ຫວັງ​ໃນ​ແຜນການ​ທີ່​ຄາດກະ ​ເຊິ່ງ​ເປັນ​ເປົ້າໝາຍ​ຂອງ​ຄວາມ​ມຸ້ງ​ມາດ​ປາຖະໜາ, ​ແຕ່​ສິ່ງ​ສຳຄັນ​ແມ່ນ​ເວົ້າ​ແລ້ວ​ຕ້ອງ​ເຮັດ​ຢ່າງ​ຈິງ​ຈັງ ​ເປັນຕົ້ນ​ໃນ​ການຈັດຕັ້ງປະຕິບັດ​ຂໍ້​ກຳນົດ​ການ​ຄວບ​ຄຸມ​ສຽງ​ເນື່ອງ​ນັນ​ຢູ່​ໃນ​ນະຄອນຫລວງ ​ເພາະ​ມັນ​ໄດ້​ເຊື່ອມ​ໂຍງ​ໄປ​ເຖິງ​ບຸກຄົນ, ກຸ່ມ​ຄົນ ​ແລະ ສັງຄົມ​ໃນ​ຂັ້ນຂະ​ແໜງ​ການ, ຂັ້ນທ້ອງ​ຖິ່ນ​ເມືອງ ​ແລະ ຂັ້ນບ້ານ. ຂໍ​ໃຫ້​ພາລະກິດ​ການ​ສ້າງ​ນະຄອນຫລວງ​ວຽງ​ຈັນ​ເປັນ​ຮູບ​ປະ​ທຳ​ຍິ່ງໆ​ຂຶ້ນ. ​ໃນ​ຄຳ​ຂວັນ ສ.ສະຫງົບ ​ໃຫ້​ເຮັດ​ເດັດຂາດ​ຈິງ​ຈັງ ກໍ​ຄື​ຂະ​ບວນການ​ຕ້ານຢາ​ເສບ​ຕິດ, ການ​ປຸ້ນ​ຈີ້, ຂີ້ລັກ​ງັດ​ແງະ​ໃນ​ຄຸ້ມ​ບ້ານ, ​ໃນ​ສັງຄົມ ​ແລະ ​ໃນ​ກຸ່ມ​ນັກ​ທ່ອງ​ທ່ຽວ​ທີ່​ໄດ້​ຮັບ​ຜົນ​ກະທົບ ອັນ​ເປັນການ​ເສຍ​ໃບ​ໜ້າ​ໃບ​ຕາ​ຂອງ​ປະ​ເທດ​ຊາດ ກໍ​ຄື​ນະຄອນຫລວງ​ວຽງ​ຈັນ​ນັ້ນ​ເອງ.

ຄວບ​ຄຸມ​ສຽງ​ເນື່ອງ​ນັນ​ຕ້ອງ​ເຮັດ​ເດັດຂາດ​ຢ່າງ​ຈິງ​ຈັງ - WhatsApp Image 2020 05 27 at 5 - ຄວບ​ຄຸມ​ສຽງ​ເນື່ອງ​ນັນ​ຕ້ອງ​ເຮັດ​ເດັດຂາດ​ຢ່າງ​ຈິງ​ຈັງ
ຄວບ​ຄຸມ​ສຽງ​ເນື່ອງ​ນັນ​ຕ້ອງ​ເຮັດ​ເດັດຂາດ​ຢ່າງ​ຈິງ​ຈັງ - WhatsApp Image 2020 05 27 at 5 - ຄວບ​ຄຸມ​ສຽງ​ເນື່ອງ​ນັນ​ຕ້ອງ​ເຮັດ​ເດັດຂາດ​ຢ່າງ​ຈິງ​ຈັງ
error: Alert: ເນື້ອຫາຂ່າວມີລິຂະສິດ !!