ຫັນເອົາການປະຢັດເປັນວາລະແຫ່ງຊາດ

- Untitled design - ຫັນເອົາການປະຢັດເປັນວາລະແຫ່ງຊາດ

ໂດຍ: ກ້ອງສ່ອງ ອິດສະຫລະ

ຫວ່າງຫລັງ​ໆ​ມາ​ນີ້, ທ່ານນາຍົກລັດຖະມົນຕີ ທອງ​ລຸນ ສີ​ສຸ​ລິດ ໄດ້​ມີ​ຄໍາ​ສັ່ງ​ໃຫ້​ແຕ່ງ​ຕັ້ງ​ຄະນະ​ຮັບຜິດຊອບ​ວຽກ​ງານ​ປະຢັດ​​ຢູ່​ໃນ​ແຕ່ລະ​ຂັ້ນ​ຂຶ້ນ ​ເພື່ອ​ເປັນ​ເຈົ້າ​ການ​ໃນ​ການ​ກວດກາຕິດຕາມການ​ນໍາ​ໃຊ້​ເງິນ​ຄໍາ ​ແລະ ​ວັດຖຸ​ຊັບ​ສິນ ​ຕະຫລອດ​ເຖິງ​ບັນດາ​ໂຄງການ, ກິດຈະການ​ຕ່າງໆ​ທີ່​ກ່ຽວ​ພັນ​ເຖິງ​ການ​ປະຢັດ. ການ​ແຕ່ງ​ຕັ້ງ​ຄະນະ​ຮັບຜິດຊອບວຽກ​ງານ​ດັ່ງກ່າວ​ກໍ​​ນັບ​ແຕ່​ຂັ້ນ​ສູນ​ກາງ​ລົງ​ໄປ​ຮອດ ທ້ອງ​ຖິ່ນ​ເຂດ​​ແຂວງ​ຕ່າງໆ​ໃນ​ທົ່ວ​ປະ​ເທດ. ຕາມ​ຜູ້​ຂຽນ​ຄິດ ​ເປັນ​ຫຍັງ​ເພິ່ນ​ຈຶ່ງ​ມີ​ຄໍາ​ສັ່ງ ແລະ​ ເອົາ​ຈິງ​ເອົາ​ຈັງກ່ຽວ​ກັບ​ເລື່ອງ​ນີ້ ? ​ຍ້ອນ​ວ່າວຽກ​ງານ​ປະຢັດ​ມັນ​ກວມ​ລວມ ​ແລະ ​ເຊື່ອມໂຍງ​ໄປ​ເຖິງ​ຫລາຍ​ຄົນ, ກຸ່ມ​ຄົນ ​ແລະ ຫລາຍຂົງ​ເຂ​ດວຽກງານ​ ເປັນຕົ້ນການ​ສໍ້​ລາດ​ບັງຫລວງ, ວິ​ໄນ​ການ​ເງິນ, ການ​ນໍາ​ໃຊ້​ວັດຖຸ​ພາຫະນະ ຕະຫຼອດ​ເຖິງ​ການບໍລິຫານຈັດ​ການ, ແຜນ​ງານ, ​ແຜນ​ເງິນ ​ແລະ ​ແຜນ​ຄົນ.​ ເວົ້າອີກ​ຢ່າງ​ໜຶ່ງ ​ການ​ປະຢັດ​ຄື​ຄວາມ​ເປັນ​ມາດຕະຖານ​ທີ່​ຄົນເຮົາ​ໄດ້ຜະລິດ​ ແລະ ​ນໍາ​ໃຊ້​ ຕະຫລອດ​ເຖິງ​ການ​ພົວພັນ​ລະ ຫວ່າງ​ຄົນ​ກັບ​ຄົນ, ​ຄົນ​ກັບ​ວັດຖຸ, ປະລິມານ ແລະ​ ຄຸນ​ນະພາ​ບ ເຊິ່ງມັນ​ແມ່ນ​ຄູ່​ມາ​ດຕະ​ເກນ​ທີ່ພວກ​ເຮົາ​ຈະ​ຕ້ອງ​ໄດ້​ຮັບ​ຮູ້ ​ແລະ ​ເຂົ້າ​ໃຈ​ໃນ​ການ​ບໍລິຫານຈັດການ. ​ເວົ້າ​ແຈ້ງ​ແລ້ວທຸກສິ່ງ​ຢ່າງ​ໃຫ້ກ້າວ​ໄປ​ສູ່​ຄວາມ​ເປັນ​ມາດຕະຖານ. ນີ້​ຄື​ເປົ້າ​ໝາຍ​ການ​ປ່ຽນ​ແປງ​ໃໝ່​ຢ່າງ​ມີ​ຫລັກການ​ຂອງ​ພັກ.

ຕາມ​ເຮົາ​ວ່າ, ການ​ປະຢັດ​ ຄົນ​ເຮົາ​ສ່ວນ​ໜຶ່ງ​ເຂົ້າ​ໃຈ​ວ່າ​ມີ​ແຕ່​ເວົ້າ​ເຖິງ​ການ​ກິນ​​ການ​ຢູ່ ​ແລະ ​ຍັງ​ບໍ່​ທັນ​ເຂົ້າ​ໃຈ​ເຖິງ​ທາດ​​ແທ້​ຢ່າງ​ເລິກ​ເຊິ່ງຂອງ​ຄໍາ​ວ່າ​ປະຢັດ. ການ​ປະຢັດ​ຍ່ອມ​ສະ​ແດງ​ອອກ​ຄື: ເຮັດ​ວຽກ​ຕົງ​ໂມງ​ຕົງ​ເວລາ, ໃຊ້​ຄົນ​ທີ່​ເກັ່ງ ແລະ​ ມີ​ຄວາມ​ຮູ້, ນໍາ​ໃຊ້​ວັດຖຸ​ທີ່​ມາດຕະຖານ, ກິນ​ໃຫ້​ອີ່ມ​ນຸ່ງ​ໃຫ້​ອຸ່ນ, ກິນ​ໃຫ້​ແຊບ​ນຸ່ງ​ໃຫ້​ງາມ, ​ເຮັດ​ວຽກ​ຢ່າງ​ມີຫລັກການ, ບໍ່​ໂກງ​ເວລາ, ບໍ່​ສໍ້​ລາດ​ບັງຫລວງ, ບໍ່​ໃຊ້​ຈ່າຍຫລິ້ນ​ກິນ​ຟຸມ​ເຟືອຍ, ບໍ່​ສວຍ​ໂອກາດ​ກິນ​ນ້ອຍ​ກິນ​ໃຫຍ່, ບໍ່​ສໍ້​ໂກງ​ເອົາ​ຊັບສິນ​ຂອງ​ລັດ​ໄປ​ໃຫ້​ຕົນ​ເອງ ​ແລະ ​ພວກ​ພ້ອງ. ທັງ​ໝົດ​ທີ່​ຍົກ​ມາ​ນີ້​ມັນກໍ​ນອນ​ຢູ່​ໃນຫລັກການ​ປະຢັດ.

​ໃນຫລາຍ​ປີຜ່ານມາ, ​ຖັນ​ແຖວ​ສະມາຊິກພັກ-ພະນັກງານ​ຂອງ​ພວກ​ເຮົາພາກັນ​ຄິດ ແລະ​ທັງ​ປະຕິບັດ​ທີ່​ໄຂ່​ວ​ເຂກັບຫລັກການ​ປະຢັດ.​ ຕົວຢ່າງ​ເຮັດ​ວຽກ​ບໍ່​ເຕັມ​ເວລາ​ຕາມ​ກົດໝາຍ​​ກໍານົດ, ການ​ນໍາ​ໃຊ້​ຄົນ, ​ຮັບ​ຄົນ​ເຂົ້າ​ເຮັດ​ວຽກ​ບໍ່​ມີ​ຄຸນນະພາບ ​ຍ້ອນ​ເຫັນ​ຄົນ​ເພິ່ນ​ຄົນ​​ໂຕ, ຄົນ​ເຈົ້າ​ຄົນ​ຂ້ອຍ, ມີ​ການ​ສໍ້​ລາດ​ບັງຫລວງຢ່າງ​ແຜ່​ລາມ, ນໍາ​ໃຊ້​ງົບປະມານ​ຂອງ​ລັດ​ບໍ່​ມີ​ປະສິດທິພາບ​ເທົ່າ​ທີ່ຄວນ,​ ໂຄງການ​ນອກ​ແຜນເກີດຂຶ້ນຫລວງຫລາຍ, ມີສະພາບປາກ​ໃຫຍ່ກວ່າທ້ອງ, ​ແກ່ຍາວ​ເວລາ, ​ເຮັດ​ວຽກ​ອັນ​ໃດ​ກໍ​ອາ​ໄສ​ກິນ​ນໍາ​ອັນ​ນັ້ນ ​ໂດຍ​ສະ​ເພາະ​ແມ່ນ​ຜູ້​ມີ​ອໍານາດ, ຜູ້​ເປັນນາຍ​ບໍ່​ທັນເປັນ​ແບບຢ່າງ​ທີ່​ດີ ​ແລະ ເດັດຂາດ​ເຄັ່ງຂັດ. ບັນ​ດາ​ປາກົດ​ການນີ້​ເກີດຂຶ້ນ ນັບແຕ່ຢູ່ຂັ້ນສູນກາງຮອດທ້ອງຖິ່ນ.

- Wave100S AD to Website 2020 0 - ຫັນເອົາການປະຢັດເປັນວາລະແຫ່ງຊາດ

ຈາກ​ສາ​ເຫດ​ທັງ​ໝົດ​ທີ່​ກ່າວ​ມາ​ນີ້, ມັນ​ກໍຈໍາ​ເປັນທີ່​ທ່ານນາຍົກລັດຖະມົນຕີ​ມີ​ຄໍາ​ສັ່ງ​ໃຫ້​ພາກັນ​ຈັດ​ຕັ້ງ​ຄະນະ​ຮັບຜິດຊອບ​ວຽກ​ງານ​ປະຢັດ ​ແລະ ​ເອົາ​ຈິງ​ເອົາ​ຈັງ​ກ່ຽວກັບ​ເລື່ອງ​ນີ້. ​ໃນ​ຫລາຍ​ປີຜ່ານມາ ​ເຮົາ​​ເສຍຜົນ​ປະ​ໂຫຍ​ດ​​ຍ້ອນ​ຄວາມບໍ່​ປະຢັດ​ຢ່າງ​ມະຫາສານ​ ແລະ ມາກ​ມາຍ​ກ່າຍກອງ​ຈົນ​ເຮັດ​ໃຫ້​ພາກ​ລັດ​ຕ້ອງ​ປະສົບ​ບັນຫາຫຍຸ້ງຍາກດ້ານ​ງົບປະມານ​ຢ່າງຫລວງຫລາຍ.

ສະ​ນັ້ນ, ຈຶ່ງ​ຂໍ​ໃຫ້​ທຸກ​ຄົນ​ຖື​ເອົາ​ການ​ປະຢັດ​ເປັນ​ພາລະກິດ​ໜຶ່ງ​ ແລະ ​ມາດຕະຖານ​ໜຶ່ງ​ ບໍ່​ວ່າບຸກຄົນ​ກໍ​ຄື​ຢູ່​ໃນ​ກົມ​ກອງ. ກົງກັນ ຂ້າມ​ຖ້າ​ມີ​ແຕ່​ເວົ້າ​ແຕ່​ຜົນ​ໄດ້​ຮັບ​ຂ້ອນ​ຂ້າງ “​ເປິະ”​ ​ນັ້ນ​ຄໍາ​ສັ່ງ​ຂອງ​ທ່ານນາຍົກລັດຖະມົນຕີກໍຈະກາຍ​ເປັນຄໍາ​ເວົ້າ​ໃນ​ເຈ້ຍ​ສໍ ​ແລະ ​ເປັນ​ອໍາມະພາດຂາດ​ປະສິດທິ​ຜົນ​ຄື​ດັ່ງ​ຫລາຍ​ປີ​​ຜ່ານ​ມາ.

- WhatsApp Image 2020 05 27 at 5 - ຫັນເອົາການປະຢັດເປັນວາລະແຫ່ງຊາດ
- WhatsApp Image 2020 05 27 at 5 - ຫັນເອົາການປະຢັດເປັນວາລະແຫ່ງຊາດ
error: Alert: ເນື້ອຫາຂ່າວມີລິຂະສິດ !!