ຂົມເປັນຢາ ! ມາເບິ່ງຂັ້ນຕອນຜະລິດ “ຢາແຜນຈີນ” ຢາວິເສດປິ່ນປົວຜູ້ປ່ວຍໂຄວິດ-19 ກວ່າ 6 ໝື່ນຊີວິດ
ພາມາເບິ່ງເບື້ອງຫລັງຂັ້ນຕອນການຜະລິດຢາແຜນຈີນ (TCM) ຢູ່ໂຮງໝໍແພດແຜນຈີນ ໃນມົນທົນອັນຮຸຍ ທາງຕາເວັນອອກຂອງຈີນ. ຢາສູດມະຫັນສະຈັນນີ້ມີບົດບາດສຳຄັນໃນການມີສ່ວນຮ່ວມປິ່ນປົວບັນດາຜູ້ປ່ວຍຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ທົ່ວຈີນ.
ຢາແຜນຈີນໄດ້ຮັບການຍອມຮັບຈາກບັນດາຜູ້ຊ່ຽວຊານຂອງອົງການອະນາໄມໂລກ (WHO) ນັບແຕ່ຕອນພວກເຂົາເດີນທາງມາຢ້ຽມຢາມໂຮງໝໍໃນນະຄອນອູ່ຮັ່ນ ສູນກາງການແຜ່ລະບາດຂອງໂຣກໃນມົນທົນຫູເປີຍທາງຕອນກາງຂອງຈີນ.
ການຜະລິດຢາແຜນຈີນແບ່ງອອກເປັນ 3 ຂັ້ນຕອນໄດ້ແກ່: ການກຽມສະໝຸນໄພ, ການຕົ້ມ ແລະ ການບັນຈຸຫໍ່ ເຊິ່ງຕ້ອງໃຊ້ເວລາປະມານ 2 ຊົ່ວໂມງ ຈົນໄດ້ຢາສຳລັບຮັບປະທານ.
ສະຖິຕິໃນເດືອນກຸມພາຊີ້ວ່າ: ຢາແຜນຈີນ
ແລະ ການປິ່ນປົວດ້ວຍແນວທາງແພດແຜນຈີນໄດ້ເຂົ້າໄປມີສ່ວນຮ່ວມໃນຂັ້ນຕອນການປິ່ນປົວຜູ້ປ່ວຍໂຄວິດ-19
ຫລາຍກວ່າ 60.000 ຄົນ ເຊິ່ງຄິດເປັນ 85% ຂອງຜູ້ປ່ວຍທັງໝົດ ແລະ ປັດຈຸບັນ ຢາແຜນຈີນໄດ້ຫວນກັບເຂົ້າສູ່ແຜນການບົ່ງມະຕິ
ແລະ ປິ່ນປົວໂຣກໂຄວິດ-19 ລະດັບຊາດຂອງຈີນແລ້ວ.
“ສຳລັບຜູ້ທີ່ມີຄວາມສ່ຽງໃນການຕິດເຊື້ອ ໂດຍສະເພາະເຈົ້າໜ້າທີ່ທາງການແພດນັ້ນ ການກິນຢາແຜນຈີນສາມາດເສີມພູມຄຸ້ມກັນ ແລະ ມີລິດປ້ອງກັນນຳອີກ” ທ່ານ ຢາງເຫວິນໝິງ ຜູ້ອຳນວຍການໂຮງໝໍແພດແຜນຈີນ ມົນທົນອັນຮຸຍ ກ່າວ.
“ສຳລັບຜູ້ປ່ວຍທີ່ອາການບໍ່ໜັກ ຢາແຜນຈີນຈະຊ່ວຍບັນເທົາອາການຕ່າງໆ ແລະ ຊ່ວຍຫລຸດໄລຍະເວລາເຂົ້າຮັບການປິ່ນປົວຢູ່ໂຮງໝໍໄດ້ ທັງຍັງມີລິດປ້ອງກັນບໍ່ໃຫ້ອາການທະວີຄວາມຮຸນແຮງຂຶ້ນ” ທ່ານ ຢາງ ກ່າວ.
“ຖ້າຜູ້ປ່ວຍອາການບໍ່ໜັກ
ຢາແຜນຈີນຈະຊ່ວຍຫລຸດອາການໄຂ້, ໄອ ແລະ ຄວາມຜິດປົກກະຕິໃນລະບົບທາງເດີນອາຫານໄດ້”
ທ່ານ ແບຣນດອນ ເນພໍ (Brandon Nepaul) ນັກສຶກສາຊາວຈາໄມກາໃນມະຫາວິທະຍາໄລແພດອັນຮຸຍ
ກ່າວ.
“ຂ້ອຍເຊື່ອວ່າຢາແຜນຈີນສາມາດຊ່ວຍຜູ້ປ່ວຍເຫລົ່ານີ້ໄດ້ ແລະ ອາດປິ່ນປົວໂຣກນີ້ໄດ້ນຳອີກ” ທັດຢານາ ເພເອົາ (Tatyana Payoute) ນັກສຶກສາຊາວອາເມລິກາໃນມະຫາວິທະຍາໄລແພດອັນຮຸຍ ກ່າວ.
ພາຍຫລັງຢາແຜນຈີນຖືກບັນຈຸລົງໃນຖົງນ້ອຍໆ ຈະຖືກກະຈາຍໄປຕາມໂຮງໝໍຕ່າງໆ ເພື່ອນຳໄປໃຊ້ປິ່ນປົວຜູ້ຕິດເຊື້ອຕໍ່ໄປ.
