ລາວມີຜູ້ຕິດເຊື້ອໂຄວິດ -19 ເພີ່ມອີກ 3 ເປັນ 6 ກໍລະນີແລ້ວ

ທ່ານ ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ, ໄດ້ຖະແຫລງຂ່າວຕໍ່ສື່ມວນຊົນວ່າ: ມື້ວານນີ້(ວັນທີ 26 ມີນາ), ສູນວິເຄາະລະບາດວິທະຍາ ໄດ້ກວດພົບຜູ້ຕິດເຊື້ອໂກວິດ-19 ຕື່ມອີກ 3 ກໍລະນີ ຄື: ເພດຊາຍ ອາຍຸ 42 ປີ ຢູ່ບ້ານ ປ່ອງຄຳ ນະຄອນຫລວງພະບາງ ແລະ ເພດຊາຍ ອາຍຸ 52 ປີ ຢູ່ບ້ານ ວິຊຸນຫລວງພະແຂວງ, ໂດຍເປັນຄົນຂັບບລົດໃຫ້ກຸ່ມທົວ ຂອງໄກນຳທ່ຽວ ທີ່ພານັກທ່ອງທ່ຽວເອີຣົບ ໄປທ່ຽວຫລາຍແຫ່ງກ່ອນໜ້ານີ້ ແລະ ອີກເພດຊາຍ ອາຍຸ 41 ປີ ຢູ່ບ້ານ ຈຳປາ ເມືອງ ສີໂຄດຕະບອງ ນະຄອນຫລວງວຽງຈັນ ເປັນຜູ້ສຳພັດໃກ້ສິດ ກັບ ກໍລະນີຜູ້ຕິດເຊື້ອ ລາຍທີ 3 ທີ່ເປັນ ນັກທຸລະກິດ ຢູ່ບ້ານ ຫ້ວຍຫ້ອມ ເມືອງ ສີໂຄດຕະບອງ, ຫນ້າເປັນຫ່ວງພຽງ3ວັນ ຢູ່ລາວເຮົາ ມີຜູ້ຕິດເຊື້ອເພີ່ມເປັນ 6 ຄົນແລ້ວ.
ທ່ານຮອງລັດຖະມົນຕີກະຊວງດັ່ງກ່າວໃຫ້ຮູ້ວ່າ: ການແຜ່ລະບາດຂອງເຊື້ອໂຄວິດ-19 ຢູ່ ລາວ, ມີທ່າອ່ຽງເພີ່ມຂື້ນ ແລະ ສ່ວນໃຫຍ່ແມ່ນການຕິດເຊື້ອຈາກຄົນພາຍໃນປະເທດ, ລັດຖະບານ ກໍມີຄວາມວິຕົກວ່າ: ການແຜ່ເຊື້ອດັ່ງກ່າວອາດຈະແຜ່ລາມຫລາຍຂື້ນ, ເນື່ອງຈາກອາການຜູ້ຕິດເຊື້ອນີ້ບໍ່ສະແດງອອກແຕ່ຕົ້ນ ແລະ ແຜ່ລາມໃສ່ຜູ້ທີ່ພົວພັນໃກ້ສິດ, ຂະນະດຽວກັນ ບາງບຸກຄົນເອງກໍຍັງບໍ່ເອົາໃຈໃສ່ໃນການສະກັດກັ້ນ ຫລື ຈຳກັດບໍລິເວນໃນເຮືອນຊານຂອງຕົນຕາມຫລັກການການແພດຢ່າງເຂັ່ງຄັດເປັນເວລາ 14 ວັນ, ຈິ່ງເຮັດໃຫ້ການຄວບຄຸມ ແລະ ຊອກຫາຜູ້ຕິດເຊື້ອຫຍຸ້ງຍາກ.
ມາຮອດປັດຈຸບັນ ກະຊວງ ສາທາລະນະສຸກໄດກວດວິເຄາະເຊື້ອ ທັງໝົດ 181 ກໍລະນີ, ໃນນີ້ພົບຜູ້ຕິດເຊື້ອ 6 ກໍລະນີ ແລະ ມີການຄົ້ນຫາຜູ້ສຳພັດໃກ້ຊິດກັບຜູ້ຕິດເຊື້ອ ທັງໝົດ 189 ຄົນ, ສຳຫລັບຜູ້ຕິດເຊື້ອ ສາມຄົນທີ່ນອນປິ່ນປົວຢູ່ໂຮງໝໍມິດຕະພາບ ແມ່ນມີອາການຊົງຕົວຂັ້ນເບົາບາງ ແລະ ໄດ້ຮັບການປິ່ນປົວຕາມຫລັກວິຊາການ, ສ່ວນສອງຄົນທີ່ນອນຢູ່ໂຮງໝໍ ຫລວງພະບາງ ກໍມີອາການຊົງຕົວເຊັ່ນກັນ.
ຜູ້ລາຍງານໃຫ້ຮູ້ອີກວ່າ: ການຕິດຕາມກໍລະນີສຳພັດ, ໃຫ້ຊິດ ກັບຜູ້ຕິດເຊື້ອດັ່ງກ່າວ ຈະໄດ້ແຈ້ງໃຫ້ພາກສ່ວນກ່ຽວຂ້ອງ ແລະ ອຳນາດການປົກຄອງ ຊ່ວຍແນະນຳໃຫ້ປະຕິບັດຕາມມາດຕະການ ຈຳກັດບໍລິເວນຕົນເອງຢ່າງເຂັ້ມງວດ, ຖ້າມີຫຍັງສົງໃສໃຫ້ລາຍງານສາຍດ່ວນ 166 ເພື່ອຂໍຄຳແນະນຳ, ສຳລັບບັນດາແຮງງານລາວທີ່ເດີນທາງມາຈາກປະເທດໄທ ແມ່ນໄດ້ຕິດຕາມຢ່າງໃກ້ສິດ, ໃນນັ້ນ ມີ 18 ຄົນ ທີ່ມີອາການໄຂ້ ຈຶ່ງໄດ້ເກັບຕົວຢ່າງມາກວດ ແລະ ບໍ່ພົບເຊື້ອ.

error: Alert: Content is protected !!