ສຸດຍອດນັກຮົບ “ຊຸດຂາວ” ລາວ ສ້າງຜົນງານອີກແລ້ວ

- 59 - ສຸດຍອດນັກຮົບ “ຊຸດຂາວ” ລາວ ສ້າງຜົນງານອີກແລ້ວ
- Untitled design - ສຸດຍອດນັກຮົບ “ຊຸດຂາວ” ລາວ ສ້າງຜົນງານອີກແລ້ວ

ໂດຍ: ລູກເມືອງພວນ

ດີໃຈ!ຈະຫາສິ່ງໃດມາປຽບບໍ່ໄດ້, ໃນເມື່ອໄດ້ຍິນຂ່າວວ່າ ນັກຮົບ “ຊຸດຂາວ” ລາວສ້າງຜົນງານອີກຄັ້ງ, ນັ້ນກໍຄືປິ່ນປົວຜູ້ຕິດເຊື້ອໂຄວິດ-19 ຫາຍດີ ອີກ 1 ຄົນ, ຍົກຕົວເລກຜູ້ປິ່ນປົວດີຂຶ້ນເປັນ 2 ຄົນ ຈາກ 19 ຄົນຕິດເຊື້ອໃນປັດຈຸບັນ, ນັ້ນກໍເທົ່າກັບວ່າ ໃນຂະນະນີ້ມີຜູ້ຕິດເຊື້ອຍັງເຫຼືອພຽງ 17 ຄົນເທົ່ານັ້ນ ທີ່ກຳລັງນອນປິ່ນປົວຢູ່ໂຮງໝໍ ແລະ ສຸດທີ່ດີໃຈ 4 ວັນຕິດຕໍ່ກັນແລ້ວ ລາວບໍ່ພົບຜູ້ຕິດເຊື້ອລາຍໃໝ່.

ຕອນບ່າຍຂອງມື້ນີ້ ວັນທີ 16 ເມສາ ຄະນະສະເພາະກີດປ້ອງກັນ, ຕ້ານ, ສະກັດກັ້ນ ແລະ ຄວບຄຸມພະຍາດໂຄວິດ-19 ໄດ້ຖະແຫຼງຢ່າງເປັນທາງການວ່າ ມື້ນີ້ໄດ້ມີຜູ້ຕິດເຊື້ອໂຄວິດ-19 ອີກ 1 ຄົນໄດ້ຮັບການປິ່ນປົວຫາຍດີ ແລະ ໄດ້ອອກໂຮງໝໍແລ້ວ. ຊຶ່ງເຂົາເປັນນັກສຶກສາລາວເພດຍິງ, ອາຍຸ 20 ປີ, ມາຈາກປະເທດອັງກິດ ຢູ່ບ້ານຊ້າງຄູ້, ເມືອງໄຊທານີ ນະຄອນຫຼວງວຽງຈັນ. ເຂົ້າຮັບປິ່ນປົວຢູ່ໂຮງໝໍມິດຕະພາບ (150 ຕຽງ) ແຕ່ວັນທີ 7 ເມສາ 2020, ກໍລະນີຜູ້ທີ 14.

ອີກເທື່ອໜຶ່ງ, ຄົນລາວທັງຊາດໃຜໆ ກໍຊື່ນຊົມຕໍ່ຜົນງານຂອງວົງການແພດລາວ ຈົນນໍ້າຕາຊຶມ ແລະ ດີໃຈນຳນ້ອງນັກສຶກສາເຂົາຄົນນີ້ເປັນຢ່າງຍິ່ງ.

ແພດໝໍລາວກໍມີຄວາມຮູ້ ຄວາມສາມາດພໍໆກັນກັບອາລິຍະນາໆປະເທດ. ພຽງແຕ່ວ່າລາວເຮົາເປັນປະເທດນ້ອຍດ້ອຍພັດທະນາ ຂາດງົບປະມານໃນການສົ່ງເສີມຈັດຊື້ສິ່ງຂອງວັດຖຸອຸປະກອນ ແລະ ຢຸກຢາຊະນິດດີເທົ່ນນັ້ນ.

ຄົນລາວເຮົາຈົ່ງພູມໃຈໃນສິ່ງທີ່ຄົນລາວເຮັດໄດ້ ໂດຍສະເພາະແມ່ນວົງການແພດລາວ ໄດ້ສ້າງຜົນງານອັນໂດດເດັ່ນທີ່ເປັນໜ້າເອກອ້າງຕໍ່ທະນົງໃຈຕໍ່ຊາວໂລກວ່າ ເຖິງແມ່ນລາວຈະເປັນປະເທດນ້ອຍດ້ອຍພັດທະນາກໍຕາມແຕ່ກໍໄດ້ປະກອບສ່ວນອັນຍິ່ງໃຫ່ຍເຂົ້າໃນຂະບວນວິວັດລວມຂອງໂລກໃນການຕ້ານໂຄວິດ-19 ໃນຄັ້ງນີ້, ຊຶ່ງມີຫຼາຍປະເທດທີ່ກ້າວໜ້າ ແລະ ຈະເລີນກວ່າເຮົາຕັ້ງຫຼາຍເທົ່າ ກໍຍັງບໍ່ສາມາດເອົາຢູ່ ແລະ ລຸກລາມບານປາຍຢ່າງຮ້າຍແຮງກວ່າປະເທດເຮົາ.

- Wave100S AD to Website 2020 0 - ສຸດຍອດນັກຮົບ “ຊຸດຂາວ” ລາວ ສ້າງຜົນງານອີກແລ້ວ

ອັນໜຶ່ງກໍເນື່ອງມາຈາກລັດຖະບານລາວໄດ້ໃຫ້ຄວາມສຳຄັນໃນການຕ້ານພະຍາດລະບາດໃນຄັ້ງນີ້ເປັນພິເສດ. ເຖິງແມ່ນລາວເຮົາຈະມີມາດຕະການຄວບຄຸມພະຍາດຊ້າກວ່າຫຼາຍປະເທດທີ່ເພີ່ນມີຜູ້ຕິດເຊື້ອກ່ອນເຮົາກໍຕາມ, ແຕ່ລັດຖະບານລາວມີຄວາມເຂັ້ມງວດເດັດຂາດແຕ່ຫົວທີ, ຊຶ່ງມີຫຼາຍປະເທດກໍມີມາດຕະການແບບດຽວກັນ ແຕ່ການຈັດຕັ້ງປະຕິບັດ ແລະ ຄວາມຕື່ນຕົວຂອງປະຊາຊົນໃນການສະໜັບສະໜູນ, ໃຫ້ການຮ່ວມໄມ້ຮ່ວມມືກັບລັດຖະບານນັ້ນແມ່ນມີຄວາມແຕກຕ່າງກັນ. ສ່ວນລາວເຮົາເຫັນວ່າ ປະຊາຊົນມີຄວາມຕື່ນຕົວ ແລະ ເຊື່ອຟັງລັດຖະບານໄດ້ດີ, ພໍແຕ່ມີຄຳສັ່ງຂອງລັດຖະບານອອກມາ, ທຸກຄົນກໍພ້ອມໃຈກັນປະຕິບັດຢ່າງເຂັ້ມງວດ.

ດັ່ງການເຮັດສຳຫຼວດຂອງ ສະຖາບັນທີ່ສຶກສາດ້ານນະໂຍບາຍສາທາລະນະມະຫາວິທະຍາໄລ ອ໊ອກສຟ໊ອດ ຂອງລາຊະອານາຈັກ ອັງກິດ ໄດ້ເຮັດການສຳຫຼວດມາດຕະການເຂັ້ມງວດຕໍ່ການສະກັດກັ້ນໂຄວິດ-19 ໃນ 122 ພື້ນທີ່ໃນທົ່ວໂລກຜົນປາກົດວ່າ ປະເທດທີ່ມີມາດຕະການເຂັ້ມງວດທີ່ສຸດໃນ ອາຊຽນໄດ້ແກ່ ຫວຽດນາມ ແລະ ລາວ.

ລັດຖະບານລາວເລີ່ມປະກາດພາວະສຸກເສີນແຕ່ວັນທີ່ 29 ມີນາ ຜ່ານມາ ຖືວ່າຊ້າກວ່າຫຼາຍປະເທດໃນອາຊຽນ ແຕ່ລາວມີຄວາມເຂັ້ມງວດເດັດຂາດ ຈຶ່ງສາມາດສະກັດກັ້ນການແຜ່ລະບາດຂອງເຊື້ອໄວຣັດໄດ້ດີ ມີພຽງ 19 ກໍລະນີ, ຖືວ່າໜ້ອຍກ່ວາໝູ່ໃນປະເທດອາຊຽນ.

ຂໍຊົມເຊີຍນັກຮົບ ຊຸດຂາວ ລາວ, ຊົມເຊີຍລັດຖະບານລາວທີ່ໃຫ້ຄວາມສຳຄັນຕໍ່ການຕ້ານ ແລະ ສະກັດກັ້ນພະຍາດໂຄວິດ-19 ໄດ້ຢ່າງເປັນຮູບປະທຳ. ເມື່ອປະເມີນເບິ່ງສະຖານະການຂອງການລະບາດຂອງພະຍາດຢູ່ພາຍໃນປະເທດເຮົາແລ້ວ, ລັດຖະບານຍັງເຫັນວ່າມີຄວາມຈຳເປັນທີ່ຈະຕ້ອງໄດ້ຄຸມເຂັ້ມການຈັດຕັ້ງປະຕິບັດ ຄຳສັ່ງເລກທີ່ 06 ຂອງລັດຖະບານອອກໄປອີກຈົນເຖິງວັນທີ 3 ພຶດສະພາ, ຖ້າຫາກມີການປ່ຽນແປງຈຶ່ງຈະແຈ້ງຕາມທີຫຼັງຕື່ມ, ທັງນີ້ກໍເພື່ອຄວາມປອດໄພ ແລະ ຢັບຢັ້ງການແຜ່ລະບາດທີ່ຈະຮ້າຍແຮງໄປກວ່ານີ້ຢູ່ປະເທດເຮົາ.

- WhatsApp Image 2020 05 27 at 5 - ສຸດຍອດນັກຮົບ “ຊຸດຂາວ” ລາວ ສ້າງຜົນງານອີກແລ້ວ
- WhatsApp Image 2020 05 27 at 5 - ສຸດຍອດນັກຮົບ “ຊຸດຂາວ” ລາວ ສ້າງຜົນງານອີກແລ້ວ
  • 1097 Posts
  • 0 Comments
iLike/LPN/20
error: Alert: ເນື້ອຫາຂ່າວມີລິຂະສິດ !!