ເປີດວາງສະແດງສິນຄ້າອາຊີໃຕ້-ອາຊີຕາເວັນອອກສ່ຽງໃຕ້ທີ່ນະຄອນຄຸນໝິງ

- advert banner 728 90 728x90 - ເປີດວາງສະແດງສິນຄ້າອາຊີໃຕ້-ອາຊີຕາເວັນອອກສ່ຽງໃຕ້ທີ່ນະຄອນຄຸນໝິງ

ງານວາງສະແດງອາຊີໃຕ້-ອາຊີຕາເວັນອອກສ່ຽງໃຕ້ ແລະ ກອງປະຊຸມສົ່ງເສີມການລົງທຶນ 2017 ໄດ້ເປີດຂຶ້ນຢ່າງເປັນທາງການໃນວັນທີ 12 ມິຖຸນານີ້ທີ່ຄຸນມິງ ສປຈີນ, ໂດຍມີບັນດາປະເທດໃນຂົງເຂດອາຊີໃຕ້-ອາຊີຕາເວັນອອກສ່ຽງໃຕ້ເຂົ້າຮ່ວມທັງໝົດ 56 ປະເທດ, ຄະນະຜູ້ແທນ ສປປ ລາວນຳໂດຍທ່ານ ຄຳລຽນ ພົນເສນາ ຮອງລັດຖະມົນຕີກະຊວງແຜນການ ແລະ ການລົງທຶນ.

- new3 - ເປີດວາງສະແດງສິນຄ້າອາຊີໃຕ້-ອາຊີຕາເວັນອອກສ່ຽງໃຕ້ທີ່ນະຄອນຄຸນໝິງ

ທ່ານ ຄຳລຽນ ພົນເສນາ ກ່າວວ່າ: ງານວາງສະແດງສິນຄ້າດັ່ງກ່າວແມ່ນມີຄວາມສຳຄັນຕໍ່ການເຊື່ອມໂຍງເສດຖະກິດຂອງຈີນ ໂດຍສະເພາະແມ່ນ ແຂວງຢຸນນານກັບເສດຖະກິດພາກພື້ນ ແລະ ອາຊີອາຄະເນຕາມນະໂຍບາຍກ້າວອອກໄປສູ່ໂລກ ກໍຄືນະໂຍບາຍໜຶ່ງແລວທາງໜຶ່ງເສັ້ນທາງຂອງລັດຖະບານຈີນໄດ້ວາງອອກ. ນອກຈາກນີ້ງານວາງສະແດງດັ່ງກ່າວຍັງເປັນເວທີໜຶ່ງທີ່ສຳຄັນສຳລັບການເພີ່ມທະວີການຮ່ວມມືດ້ານເສດຖະກິດການຄ້າລະຫວ່າງ ລາວ-ຈີນ, ໂດຍສະເພາະລາວ ແລະ ແຂວງຢຸນນານທີ່ມີຊາຍແດນຕິດຈອດກັນ, ການຮ່ວມມືດ້ານຕ່າງໆກັບບັນດາແຂວງພາກເໜືອຂອງລາວໃນຜ່ານມາ ເຮັດໃຫ້ມູນຄ່າການຄ້າຂອງລາວ ແລະ ແຂວງຢຸນນານບັນລຸຫລາຍກວ່າ 1 ຕື້ໂດລາສະຫະລັດ, ກວມເອົາ 40% ຂອງການຄ້າລາວ-ຈີນ, ໂດຍມີບໍລິສັດ ຈາກແຂວງຢຸນນານເຂົ້າມາລົງທຶນໃນຂະແໜງການຕ່າງໆຢູ່ລາວ 219 ບໍລິສັດ, ລວມມູນຄ່າ 1,98 ຕື້ໂດລາສະຫະລັດ ແລະ ຍັງສືບຕໍ່ເພີ່ມທະວີການຮ່ວມມືສອງຝ່າຍໃນດ້ານການຄ້າ-ການລົງທຶນໃຫ້ນັບມື້ກວ້າງຂວາງ.

ງານວາງສະແດງດັ່ງກ່າວ, ປະກອບມີ 18 ຈຸດໃຫຍ່ ກວມເອົາ 8.000 ຮ້ານ ເຊິ່ງປະກອບມີສິນຄ້າຫັດຖະກຳແຜ່ນແພ ແລະ ເຄື່ອງນຸ່ງຫົ່ມ, ແຮ່ທາດ, ການຢາ, ອຸປະກອນການແພດ, ເຄື່ອງກໍ່ສ້າງ ແລະ ອຸປະກອນຕົບແຕ່ງພາຍໃນ, ເຄື່ອງກົນຈັກ ແລະ ອາໄຫລ່, ເຄື່ອງອຸປະກອນທາງດ້ານເອເລັກໂທນິກ, ເຄື່ອງປະດັບ, ເຄື່ອງຫັດຖະກຳ ແລະ ໂຄສະນາການທ່ອງທ່ຽວ. ໃນນີ້, ສປປ ລາວ ໄດ້ສ້າງຮ້ານວາງສະແດງແຫ່ງຊາດລາວ ປະກອບດ້ວຍຮູບພາບສະແດງໃຫ້ເຫັນເຖິງ ສາຍພົວພັນ ລະ ຫວ່າງສອງຊາດ ລາວ-ຈີນ, ທຳມະຊາດ, ປູສະນີຍະສະຖານອັນສວຍງາມ, ວິຖີຊີວິດ ທີ່ຕິດພັນກັບເຂົ້າ, ວາງສະແດງເຂົ້າ ແລະ ສາທິດການປຸງແຕ່ງເຂົ້າ ໃຫ້ແຂກທີ່ມາທ່ຽວຊົມມງານໄດ້ລອງຊິມລົດຊາດເຂົ້າ ທີ່ເປັນເອກະລັກຂອງລາວ, ໂດຍມີບໍລິສັດຫ້າງຮ້ານທຸລະກິດຂອງລາວ ເຂົ້າຮ່ວມຈຳນວນທັງໝົດ 22 ບໍລິສັດ, ມີ 59 ຮ້ານວາງສະແດງ, ເຊິ່ງໄດ້ຜ່ານການເລືອກເຟັ້ນເອົາຜະລິດຕະພັນ ແລະ ສິນຄ້າທີ່ເປັນເອກະລັກຂອງລາວ ຫລາຍຊະນິດທີ່ເປັນທີ່ຍອມຮັບ ແລະ ເໝາະສົມກັບຜູ້ທີ່ມາທ່ຽວຊົມໃນງານໄດ້ສຳຜັດ ແລະ ຊື້ໄດ້. ງານວາງສະແດງດັ່ງກ່າວຈະດຳເນີນເປັນເວລາ 7 ວັນ ເລີ່ມແຕ່ວັນທີ 12-18 ມິຖຸນາ ເປັນຕົ້ນໄປ.

- lattana 1 - ເປີດວາງສະແດງສິນຄ້າອາຊີໃຕ້-ອາຊີຕາເວັນອອກສ່ຽງໃຕ້ທີ່ນະຄອນຄຸນໝິງ
error: Content is protected !!