ປະທານ ​ໂຮ່ຈີ​ມິນ ຍັງ​ຍືນ​ຍົງ​ໃນ​ພາລະກິດ​ປະຕິວັດ​ສາມ​ຊາດ​ອິນ​ດູ​ຈີນ

ປະທານ ​ໂຮ່ຈີ​ມິນ ຍັງ​ຍືນ​ຍົງ​ໃນ​ພາລະກິດ​ປະຕິວັດ​ສາມ​ຊາດ​ອິນ​ດູ​ຈີນ - Untitled design - ປະທານ ​ໂຮ່ຈີ​ມິນ ຍັງ​ຍືນ​ຍົງ​ໃນ​ພາລະກິດ​ປະຕິວັດ​ສາມ​ຊາດ​ອິນ​ດູ​ຈີນ

ໂດຍ: ທິດ​ກໍ່າ

ກົດເພື່ອຟັງຂ່າວ

ກົດເພື່ອຟັງຂ່າວ

ວັນ​ທີ 19 ພຶດສະພາ 2020 ທີ່​ຫາ​ກໍ​ຜ່ານ​ພົ້ນ​ໄປ​ບໍ່ພໍ​ເທົ່າ​​ໃດ​ວັນ​ມາ​ນີ້ ​ແມ່ນ​ກົງ​ກັບ​ວັນ​ເກີດ​ຂອງ​ປະທານ ​ໂຮ່ຈີ​ມິນ ຄົບຮອບ 130 ປີ​ພໍດີ (19/5/1890-19/5/2020). ປະທານ ​ໂຮ່ຈີ​ມິນ ​ເປັນ​ນັກ​ກອມ​ມູນິດ​ສາກົນ​ກຳມະ​ຊີບ, ນັກຄົ້ນຄວ້າ, ຄົ້ນຄິດ, ນັກ​ປະຕິວັດ, ນັກ​ປົກຄອງ​ຜູ້ດີ​ເດັ່ນ, ນັກ​ການ​ທະຫານ, ການ​ເມືອງ, ​ເປັນ​ຜູ້ນຳ​ທີ່​ຍິ່ງ​ໃຫຍ່ ​ແລະ ຄວາມ​ເປັນ​ແບບຢ່າງ​ທີ່​ຫາ​ໄດ້​ຍາກ. ພາລະກິດ​ຂອງ​ປະທານ ​ໂຮ່ຈີ​ມິນ ບໍ່​ພຽງ​ແຕ່​ໄດ້​ຕິດ​ພັນ​ກັບ​ການ​ປະຕິວັດ​ຫວຽດນາມ​ພຽງ​ຢ່າງ​ດຽວ, ​ແຕ່​ຍັງ​ຕິດ​ພັນ​ກັບ​ພາລະກິດ​ການ​ປະຕິວັດ​ສາມ​ຊາດ​ອິນດູຈີນ ​ແລະ ການ​ປະຕິວັດ​ຂອງ​ໂລກ. ອັນ​ສາ​ເຫດ​ກໍ​ຍ້ອນ​ວ່າ​ໃນ​ເວລາ​ຍັງ​ໜຸ່ມ​ແໜ້ນ​ນັ້ນ, ​ເພິ່ນ​ໄດ້​ໄປ​ຊອກ​ຫາ​ເສັ້ນທາງ​ປົດ​ປ່ອຍ​ຊາດ​ອອກ​ຈາກ​ການ​ເປັນ​ຫົວ​ເມືອງ​ຂຶ້ນຂອງ​ຈັກກະພັດ​ຝຣັ່ງທີ່​ເຂົ້າມາ​ບຸກລຸກ​ຮຸກ​ຮານ ​ແລະ ຍຶດຄອງ​ເອົາ​ສາມ​ປະ​ເທດ​ອິນດູຈີນ​ເປັນ​ຫົວ​ເມືອງ​ຂຶ້ນ. ການ​ໄປ​ຊອກ​ຫາ​ເສັ້ນທາງ​ປົດ​ປ່ອຍ​ຊາດ​ນັ້ນ, ​ເພິ່ນ​ໄດ້​ໄປ​ຫລາຍ​ປະ​ເທດ​ເຊັ່ນ: ຝຣັ່ງ, ອາ​ເມ​ລິ​ກາ, ອັງກິດ, ສະຫະພາບ​ໂຊ​ວຽດ ​ແລະ ຈີນ ​ແລ້ວ​ຈຶ່ງ​ໄດ້​ເຂົ້າມາ​ປັກ​ຫລັກ​ປັກ​ຖານ​ຢູ່​ພາກ​ເໜືອ​ຫວຽດນາມ ​ເພື່ອ​ນຳພາ​ປະຊາຊົນ​ບັນດາ​ເຜົ່າ​ໃນ​ສາມ​ປະ​ເທດ​ຄື: ຫວຽດນາມ, ລາວ ​ແລະ ກຳປູ​ເຈຍ ລຸກ​ຮື້ຂຶ້ນຕໍ່ສູ້​ກັບ​ຈັກກະພັດ​ທີ່​ມາ​ຮຸກ​ຮານ​ຈົນ​ເຮັດ​ໃຫ້​ສາມ​ປະເທດອິນດູຈີນມີເອກະລາດໃນປີ 1954 ​ແລະ ສາມາດ​ປົດ​ປ່ອຍ​ຊາດ​ອອກ​ຈາກ​ແອກ​ຄອບ​ຄອງ​ຂອງ​ຈັກກະພັດ​ໄດ້​ຢ່າງ​ສົມບູນ​ໃນ​ປີ 1975 ​ເປັນຕົ້ນ​ໄດ້​ປົດ​ປ່ອຍ​ພາກ​ໃຕ້​ຫວຽດນາມ, ລາວ ​ແລະ ກຳປູ​ເຈຍ.

ທິດ​ກໍ່າ ຍັງ​ບໍ່​ລືມ ​ແລະ ​ໄດ້​ຈົດ​ຈຳ​ມາ​ຕະຫລອດ​ວ່າ​ໃນຕົ້ນປີ 1980 ຕົນ​ເອງ​ໄດ້​​ໄປ​ສຶກສາຄົ້ນຄວ້າ​ຮໍ່າຮຽນ​ຢູ່​ປະ​ເທດ​ຫວຽດນາມ​ເປັນ​ເວລາ​ຫລາຍ​ປີ ​ໄດ້​ມີ​ໂອກາດ​ສຶກສາຄົ້ນຄວ້າ​ເຖິງ​ພາລະກິດ​ການ​ປະຕິວັດຫວຽດນາມ​ຕິດ​ພັນ​ກັບ​ການ​ປະຕິວັດ​ຊາດ​ປະຊາທິປະ​ໄຕ​ໃນ​ສາມ​ປະ​ເທດ​ອິນດູຈີນ ພາຍ​ໃຕ້​ການ​ຊີ້​ນຳ-ນຳພາ​ຂອງ​ປະທານ ​ໂຮ່ຈີ​ມິນ ກໍ​ຄື​ພັກ​ກອມ​ມູນິດ​ອິນດູຈີນ​ ສຸດ​ທີ່​ມີ​ຄວາມ​ເຫລື້ອມ​ໃສ, ​ເຫັນ​ໄດ້​ຄວາມ​ສາມາດ, ສະຫລາດ​ສ່ອງ​ໃສ, ສະ​ແດງ​ຄວາມ​ຮູ້​ບຸນຄຸນ​ຢ່າງ​ໃຫຍ່​ຫລວງ​ຕໍ່​ຜົນງານ​ອັນ​ຍິ່ງ​ໃຫຍ່, ຄຸນງາມຄວາມດີ​ຂອງ​ປະທານ ​ໂຮ່ຈີ​ມິນ ​ແລະ ພັກ​ກອມ​ມູນິດ​ອິນດູຈີນ​ທີ່​ໄດ້​ນຳພາ​ຕໍ່ສູ້​ປົດ​ປ່ອຍ​ເອົາ​ສາມ​ປະ​ເທດ​ຈົນ​ໄດ້​ຮັບ​ໄຊຊະນະ​ມາ​ເຖິງ​ທຸກ​ວັນ​ນີ້.

ບົນ​ເສັ້ນທາງ​ແຫ່ງ​ພາລະກິດ​ອັນ​ຍິ່ງ​ໃຫຍ່​ຍາວ​ໄກ ​ເພື່ອ​ໄປ​ຊອກ​ສະ​ແຫວ​ງ​ເສັ້ນທາງ​ປົດ​ປ່ອຍ​ຊາດ​ຂອງ​ປະທານ ​ໂຮ່ຈີ​ມິນ ​ແມ່ນ​ເລີ່​ມຈາກ​ການ​ເປັນກຳມະກອນ​ອາສາ​ສະໝັກ​ຈຸ​ຟືນ​ດັງ​ໄຟ​ໃສ່​ຈັກ​ກຳ​ປັ່ນ​ຂອງຝຣັ່ງ ​ເພື່ອ​ມຸ້ງ​ໜ້າ​ໄປ​ຫາ​ປະ​ເທດ​ທີ່​ມີ​ຄວາມ​ຈະ​ເລີ​ນ ​ແຕ່​ມີ​ການ​ກົດ​ຂີ່​ຂູດ​ຮີດ​ແຮງ​ງານ​ຂອງ​ພວກ​ນາຍທຶນ ຄື​ປະ​ເທດ​ຝຣັ່ງ ຈົນ​ເພິ່ນ​ໄດ້​ເຂົ້າຢູ່​ໃນ​ຂະ​ບວນການ​ກອມ​ມູນິດ​ສາກົນ. ຜ່ານ​ການ​ວິວັດ​​ໃນ​ຫລາຍ​ປີ ​ເພິ່ນ​ເປັນ​ຜູ້​ໜຶ່ງ​ທີ່​ໄດ້​ເຄື່ອນ​ໄຫວ​ຢ່າງ​ຕັ້ງໜ້າ, ​ແຂງ​ແຮງ​ໃນ​ການ​ຕ້ານ​ກັບ​ລະບອບ​ນາຍທຶນ. ຈາກ​ນັ້ນ​ເພິ່ນ​ກໍ​ໄດ້​ເດີນທາງ​ໄປ​ປະ​ເທດ​ອັງກິດ, ອາ​ເມ​ລິ​ກາ, ສະຫະພາບ​ໂຊ​ວຽດ ​ແລະ ຈີນ ​ແລ້ວ​ຈຶ່ງ​ໄດ້​ເຂົ້າມາ​ຈັ້ງທ່າ​ຢູ່​ລັງ​ປັກ​ບໍ​ທາງ​ພາກ​ເໜືອ​ຂອງ​ປະ​ເທດ​ຫວຽດນາມ ​ເພື່ອ​ຫາ​ວິທີ​ຊີ້​ນຳ​-ນຳພາ​ການ​ປະຕິວັດ​ປົດ​ປ່ອຍ​ຊາດ​ຫວຽດນາມ ກໍ​ຄື​ໃນ​ສາມ​ປະ​ເທດ​ອິນດູຈີນ.

ຜ່ານ​ການ​ເຄື່ອນ​ໄຫວ​ປະຕິວັດ​ມາ​ເປັນ​ເວລາ 10 ກວ່າ​ປີ, ພັກ​ກອມ​ມູນິດ​ອິນດູຈີນ​ໄດ້​ຮັບ​ການ​ສ້າງຕັ້ງຂຶ້ນ​ໃນ​ວັນ​ທີ 3 ກຸມພາ 1930. ພາຍຫລັງ​ພັກ​ກອມ​ມູນິດ​ອິນດູຈີນ​ໄດ້​ຮັບ​ການ​ສ້າງຕັ້ງຂຶ້ນ, ກະ​ແສ​ຟອງ​ແຫ່ງ​ຂະ​ບວນການ​ຕໍ່ສູ້​ປະຕິວັດ​ກໍ​ຍິ່ງ​ຝັ້ນ​ເຟືອນ ​ແລະ ຂະຫຍາຍ​ກວ້າງ​ອອກ​ຂຶ້ນສູ່​ລະດັບ​ສູງ ຈົນ​ເຮັດ​ໃຫ້​ພັກ​ກອມ​ມູນິດ​ອິນດູຈີນ​ຕ້ອງ​ແຍກ​ອອກ​ເປັນ​ສາມ​ພັກ​ຄື: ພັກ​ກອມ​ມູນິດ​ຫວຽດນາມ, ພັກ​ປະຊາຊົນ​ປະຕິວັດ​ລາວ ​ແລະ ພັກ​ປະຊາຊົນ​ກຳປູ​ເຈຍ ມາ​ເຖິງ​ທຸກ​ວັນ​ນີ້. ​ພາຍຫລັງ​ມີ​ການ​ແຍກ​ພັກ​ອອກ​ເປັນ​ສາມ​ພັກ​​ໃຜ​ມັນ​ ມາ​ໃນ​ວັນ​ທີ 22 ມີນາ 1955 ພັກ​ປະຊາຊົນ​ປະຕິວັດ​ລາວ​ກໍ​ໄດ້​ຮັບ​ການ​ສ້າງຕັ້ງຂຶ້ນຢ່າງ​ເປັນ​ທາງ​ການ.

ປະທານ ​ໂຮ່ຈີ​ມິນ ບໍ່​ພຽງ​ແຕ່​ເພິ່ນ​ເປັນຜູ້ນຳ​ທີ່​ປີ​ຊາ​ສາມາດ​ທາງ​ດ້ານ​ການ​ເມືອງ, ການ​ທະຫານ, ​ເພິ່ນ​ຍັງ​ເປັນ​ປັນຍາ​ຊົນ​ທີ່​ພຽບພ້ອມ​ໄປ​ດ້ວຍ​ຄວາມ​ຮູ້​ຄວາມ​ສາມາດ, ​ເພິ່ນ​ເປັນ​ຜູ້ນຳ​ທີ່​ຮອບ​ຮູ້​ໄດ້​ຫລາຍ​ພາສາ​ເຊັ່ນ: ຝຣັ່ງ, ອັງກິດ, ຈີນ ​ແລະ ພາສາຣັດ​ເຊຍ. ​ໃນ​ໂອກາດ​ວັນ​ລະນຶກ​ຄົບຮອບ 130 ປີ​ ​ແຫ່ງ​ວັນ​ກຳ​ເນີ​ດ ​ແລະ ​ເຕີບ​ໃຫຍ່​ຂອງ​ຜູ້ນຳ​ອັນ​ແສນ​ຮັກ​ຂອງ​ປວງ​ຊົນ​ຊາວ​ຫວຽດນາມ ກໍ​ຄື​ຂອງ​ປະຊາຊົນ​ບັນດາ​ເຜົ່າ​ໃນ​ສາມ​ປະ​ເທດ​ອິນດູຈີນ ຂໍ​ເທີ​ດທູນ​ຮູ້​ບຸນຄຸນ​ຕໍ່​ພາລະກິດ​ອັນ​ຍິ່ງ​ໃຫຍ່​ຂອງ​ປະທານ ​ໂຮ່ຈີ​ມິນ ຢ່າງ​ໃຫຍ່​ຫລວງ. ພາລະກິດ​ການ​ປະຕິວັດ​ຊາດ​ປະຊາທິປະ​ໄຕ​ໃນ​ສາມ​ຊາດ​ອິນດູຈີນ​ທີ່​ປະທານ ​ໂຮ່ຈີ​ມິນ ທີ່​ໄດ້​ສ້າງ​​ໄວ້​ນັ້ນຍັງ​ຄົງ​ຍືນ​ຍົງ​ກັບ​ພວກ​ເຮົາ​ຕະຫລອດ​ໄປ.

ປະທານ ​ໂຮ່ຈີ​ມິນ ຍັງ​ຍືນ​ຍົງ​ໃນ​ພາລະກິດ​ປະຕິວັດ​ສາມ​ຊາດ​ອິນ​ດູ​ຈີນ - Wave100S AD to Website 2020 0 - ປະທານ ​ໂຮ່ຈີ​ມິນ ຍັງ​ຍືນ​ຍົງ​ໃນ​ພາລະກິດ​ປະຕິວັດ​ສາມ​ຊາດ​ອິນ​ດູ​ຈີນ

ປະທານ ​ໂຮ່ຈີ​ມິນ ຍັງ​ຍືນ​ຍົງ​ໃນ​ພາລະກິດ​ປະຕິວັດ​ສາມ​ຊາດ​ອິນ​ດູ​ຈີນ - WhatsApp Image 2020 05 27 at 5 - ປະທານ ​ໂຮ່ຈີ​ມິນ ຍັງ​ຍືນ​ຍົງ​ໃນ​ພາລະກິດ​ປະຕິວັດ​ສາມ​ຊາດ​ອິນ​ດູ​ຈີນ
ປະທານ ​ໂຮ່ຈີ​ມິນ ຍັງ​ຍືນ​ຍົງ​ໃນ​ພາລະກິດ​ປະຕິວັດ​ສາມ​ຊາດ​ອິນ​ດູ​ຈີນ - WhatsApp Image 2020 05 27 at 5 - ປະທານ ​ໂຮ່ຈີ​ມິນ ຍັງ​ຍືນ​ຍົງ​ໃນ​ພາລະກິດ​ປະຕິວັດ​ສາມ​ຊາດ​ອິນ​ດູ​ຈີນ
  • 1097 Posts
  • 0 Comments
iLike/LPN/20
error: Alert: ເນື້ອຫາຂ່າວມີລິຂະສິດ !!