ຊີວິດທີ່ດີ ແລະ ມີຄວາມສຸກຕ້ອງປະກອບໄປດ້ວຍ 6 ສິ່ງນີ້

  ຈຸດສູງສຸດຂອງຊີວິດບໍ່ແມ່ນເງິນເດືອນ, ບໍ່ແມ່ນລົດເບັ້ນ, ບໍ່ແມ່ນເງິນຫລາຍຮ້ອຍລ້ານກີບ ຫລື ຍອດເງິນໃນທະນາຄານ ຫລື ແມ່ນແຕ່ເຮືອນ, ແຕ່ມັນແມ່ນການມີຊີວິດທີ່ດີ. ທ່ານອາດເຄີຍຖາມຕົນເອງວ່າສຳລັບທ່ານນັ້ນແມ່ນຫຍັງຄືຊີວິດທີ່ດີ ? ລາຍການທີ່ໄດ້ກໍຄົງຍາວຈົນບໍ່ມີບ່ອນສິ້ນສຸດ ແລະ ລາຍການທີ່ວ່າກໍຄົງລວມໄປເຖິງເລື່ອງຂອງຈິນວິນຍານ, ເສດຖະສາດ, ສຸຂະພາບ, ຄວາມສຳພັນ ແລະ ຄວາມບັນເທີງ.

     ແລ້ວສິ່ງໃດແມ່ນສິ່ງທີ່ເຮັດໃຫ້ເຮົາມີຊີວິດທີ່ດີ ແລະ ມີຄວາມສຸກໄດ້ ? ທ່ານ ຈິມ ໂຣນ ນັກເວົ້າ ແລະ ນັກສ້າງແຮງບັນດານໃຈຊາວອາເມລິກາ ໄດ້ເຮັດລາຍການມາ 6 ຂໍ້ສັ້ນໆ ໃນການເຮັດໃຫ້ຊີວິດເຮົາດີຂຶ້ນ ແລະ ມີຄວາມສຸກ ດັ່ງນີ້ :

1. ຜົນຜະລິດຂອງສິ່ງທີ່ທ່ານເຮັດ : ທ່ານຈະບໍ່ມີຄວາມສຸກໄດ້ເລີຍ ຫາກທ່ານບໍ່ລອງສ້າງສັນ ຫລື ເຮັດຫຍັງຂຶ້ນມາ, ເກມຂອງຊີວິດນີ້ແມ່ນ “ຢ່າຢຸດພັກ” ອາດພັກໄດ້ແດ່ ແຕ່ຢ່າດົນ ເພື່ອໃຫ້ແຂງແກ່ນພໍທີ່ຈະກັບໄປສ້າງສັນສິ່ງໃໝ່ໆໃນຊີວິດໄດ້ອີກຄັ້ງ ບົດຝຶກຫັດຂອງຊີວິດຄົນເຮົາກໍແມ່ນ ການທີ່ໄດ້ຮູ້ວ່າທ່ານສາມາດເຮັດຫຍັງກັບມັນໄດ້ແດ່ ແລະ ການລົງມືເຮັດຫຍັງດ້ວຍກຳລັງທີ່ທ່ານມີຈົນມັນອອກດອກຜົນງົດງາມ ແລະ ສ້າງຄວາມສຸກໃຫ້ກັບທ່ານໃນທ້າຍທີ່ສຸດ.
2. ໝູ່ທີ່ດີ : ມິດຕະພາບແມ່ນກຳລັງໃຈທີ່ຍິ່ງໃຫຍ່ໃນໂລກ. ດັ່ງນັ້ນ, ຢ່າປະຕິເສດການພັດທະນາມັນເລີຍ ເພາະບໍ່ມີສິ່ງໃດທີ່ຈະທຽບເທົ່າກັບມິດຕະພາບໄດ້ອີກແລ້ວ. ໝູ່ແມ່ນຄົນທີ່ຮູ້ຈັກທ່ານຫລາຍທີ່ສຸດ ແລະ ຍັງຄົງຮັກທ່ານ. ຈິມ ໂຣນ ກ່າວວ່າ : ລາວເຄີຍສູນເສຍໝູ່ຮັກໄປດ້ວຍໄວ 53 ປີ ຍ້ອນພະຍາດຫົວໃຈວາຍ ເນື່ອງຈາກໝູ່ຂອງລາວແມ່ນໜຶ່ງໃນໝູ່ຄົນພິເສດທີ່ສຸດໃນຊີວິດ ລາວຈຶ່ງເຄີຍກ່າວວ່າ ຫາກລາວຕິດຄຸກໃນຕ່າງປະເທດຈັກແຫ່ງໜຶ່ງຢ່າງບໍ່ເປັນທຳ ແລະ ໄດ້ຮັບອະນຸຍາດໃຫ້ໂທຫາໃຜໄດ້ໜຶ່ງຄົນ ໝູ່ຄົນນີ້ຈະເປັນຜູ້ທີ່ລາວເລືອກຈະໂທຫາເປັນຄົນທຳອິດ ເຫດຜົນກໍຄື ເພາະລາວເຊື່ອວ່າໝູ່ຄົນນັ້ນແນວໃດກໍຕ້ອງມາຊ່ວຍຢ່າງແນ່ນອນ ແລະ ນີ້ແມ່ນສິ່ງທີ່ໝູ່ແທ້ຈະເຮັດໃຫ້ກັນໄດ້. ນອກຈາກນີ້, ເຮົາທຸກຄົນລ້ວນມີໝູ່ທົ່ວໆໄປເຊັ່ນກັນ, ໝູ່ທີ່ທ່ານຈະໂທຫາເຂົາ ແລ້ວຕອບວ່າ “ຖ້າກັບມາກໍໂທມາເດີ້ ແລ້ວໄປຫາຫຍັງກິນນຳກັນ” ເຊິ່ງທ່ານຈຶ່ງຄວນມີທັງໝູ່ປະເພດນີ້ ແລະ ໝູ່ແທ້ໃນຊີວິດໄວ້ນຳ.
3. ວັດທະນະທຳທີ່ທ່ານຍຶດຖື : ພາສາ, ດົນຕີ, ຮີດຄອງປະເພດນີ, ເຄື່ອງແຕ່ງກາຍ ສິ່ງເຫລົ່ານີ້ແມ່ນສິ່ງສຳຄັນຍິ່ງທີ່ທ່ານຕ້ອງຮັກສາມັນເອົາໄວ້, ຄວາມເປັນເອກະລັກຂອງພວກເຮົາທຸກຄົນທີ່ເມື່ອຖືກຫລອມເຂົ້າດ້ວຍກັນສາມາດນຳມາເຊິ່ງພະລັງ, ອຳນາດ, ຄວາມສຸກ ແລະ ຄວາມຊອບທຳແກ່ໂລກໜ່ວຍນີ້.
4. ການມີປັນຍາ : ການມີປັນຍາຈະຊ່ວຍສ້າງຮາກຖານແກ່ຄອບຄົວ ເຊິ່ງຈະເປັນຮາກຖານໃນການສ້າງຊາດຕໍ່ໄປ, ຢ່າລືມທີ່ຈະຮຽນຮູ້, ຝຶກຝົນ ແລະ ໃຫ້ຄວາມຮູ້ແກ່ຜູ້ອື່ນຢູ່ສະເໝີ, ຢ່າລະເລີຍປັນຍາທີ່ເປັນສ່ວນໜຶ່ງຂອງໂຕຕົນທ່ານ ເພາະມັນແມ່ນສິ່ງທີ່ເຮັດໃຫ້ເຮົາເປັນເຮົາ ເຮັດໃຫ້ເຮົາຕ່າງຈາກສັດທັງຫລາຍ.
5. ການບໍ່ພາດໂອກາດດີໆ : ພໍ່ແມ່ຂອງ ຈິມ ໂຣນ ມັກສອນສະເໝີວ່າຈົ່ງຢ່າພາດໂອກາດໃດໆກໍຕາມ ບໍ່ວ່າຈະເປັນເກມ, ການສະແດງ, ຮູບເງົາ ຫລື ການເຕັ້ນ, ຈົ່ງໄປທຸກບ່ອນທີ່ທ່ານຈະໄປໄດ້, ຄອນເສີດ, ເຊຍກິລາບານເຕະ ຫລື ເຂົ້າໂບດ ຫລືບໍ່ກໍໄປໃສຈັກບ່ອນ ອອກໄປພົບໂລກ, ສຳຜັດປະສົບການໃໝ່ໆ ໃນຂະນະທີ່ທ່ານຍັງເຮັດໄດ້ ແລະ ຈົ່ງມີສຸຂະພາບຮ່າງກາຍແຂງແຮງ ຫາກທ່ານກິນດີຢູ່ດີ ທ່ານກໍຈະໄດ້ຮັບສິ່ງທີ່ດີ ສິ່ງດີໆຈະສະແດງອອກມາທາງໃບໜ້າ ແລະ ນຳ້ສຽງຂອງທ່ານ ທັງຍັງສົ່ງຜົນດີຕໍ່ຊີວິດສ່ວນໂຕ ແລະ ຊີວິດການເຮັດວຽກຂອງທ່ານ ເປັນພະລັງຊີວິດຢ່າງທີ່ບໍ່ມີສິ່ງໃດສາມາດໃຫ້ໄດ້.
6. ການໃຫ້ຄວາມສຳຄັນກັບຄອບຄົວ ແລະ ຄົນໃກ້ຊິດ : ຈົ່ງລົງທຶນລົງແຮງ ແລະ ໃຫ້ໃຈກັບພວກເຂົາ ແລ້ວພວກເຂົາຈະລົງທຶນລົງແຮງ ແລະ ໃຫ້ໃຈກັບມາ, ຈົ່ງຈຸດປະກາຍພວກເຂົາ ແລ້ວພວກເຂົາກໍຈະຈຸດປະກາຍໃຫ້ກັບທ່ານຄືນຄືກັນ. ຈົ່ງໃສ່ໃຈກັບທຸກເລື່ອງລາວ ບໍ່ວ່າຈະເປັນເລື່ອງເລັກໆນ້ອຍໃນພາຍໃນຄອບຄົວ ເພາະມັນຈະເຮັດໃຫ້ມື້ນັ້ນກາຍເປັນມື້ພິເສດຂອງຄອບຄົວໄດ້ແລ້ວ, ການແບ່ງປັນ, ການສະໜັບສະໜູນ, ການສະແດງຄວາມເປັນຫ່ວງເປັນໄຍຕໍ່ກັນຢ່າງສະໝໍ່າສະເໝີ ຈະກາຍເປັນຄຸນງາມຄວາມດີ ແລະ ສິ່ງມີຄຸນຄ່ານັ້ນມີຫລວງຫລາຍ ແຕ່ສິ່ງທີ່ຍິ່ງໃຫຍ່ທີ່ສຸດແມ່ນການທີ່ເຮົາເອົາໃຈໃສ່ຕໍ່ຜູ້ອື່ນ ແລະ ບໍ່ມີສິ່ງໃດແລ້ວທີ່ມີຄ່າຫລາຍກ່ວາຄວາມຮັກ. ດັ່ງນັ້ນ, ຈົ່ງຄຳນຶງຢູ່ສະເໝີເຖິງເປົ້າໝາຍທີ່ແທ້ຈິງ ແລະ ເຫດຜົນວ່າເປັນຫຍັງທ່ານຈຶ່ງເຮັດສິ່ງນີ້ຢູ່, ສຸດທ້າຍນີ້ ຫວັງວ່າທ່ານຈະມີຊີວິດທີ່ດີ ຊີວິດທີ່ມີຄວາມສຸກ ຊີວິດທີ່ນຳມາເຊິ່ງຜົນຜະລິດ ແລະ ລາງວັນດັ່ງທີ່ທ່ານປາຖະໜາ.