ສາທາເນັ້ນສືບຕໍ່ປະຕິບັດບາງມາດຕະການຜ່ອນຜັນ

ໃນວັນທີ 31 ສິງຫານີ້, ທ່ານ ​ພູທ​ອ​ນ ເມືອງ​ປາກ, ຮອງລັດຖະມົນກະຊວງສາທາລະນະສຸກ, ຫົວໜ້າກອງ​ເລ​ຂາຄະນະສະເພາະກິດ ໄດ້ຖະແຫລ່ງຂ່າວກ່ຽວກັບການສືບຕໍ່ປະຕິບັດບັນດາມາດຕະການຜ່ອນຜັນ, ມາດຕະການໃນການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດ ຂອງພະຍາດ COVID-19 ໃນໄລຍະແຕ່ ວັນທີ 1- 3 ກັນຍາ 2020 ເພື່ອສືບຕໍ່ເຂັ້ມງວດປະຕິບັດມາດຕະການປ້ອງກັນພະຍາດດັ່ງກ່າວ, ລັດຖະບານ ໄດ້ຕົກລົງ ແລະ ຊີ້ນໍາດັ່ງນີ້:

  • ເຫັນດີໃຫ້ສືບຕໍ່ປະຕິບັດບັນດາມາດຕະການຜ່ອນຜັນ, ມາດຕະການໃນການປ້ອງກັນ, ຄວບຄຸມ,ສະກັດກັ້ນ ແລະ ແກ້ໄຂການລະບາດຂອງພະຍາດCOVID-19ຄືກັນກັບມາດຕະການທີ່ໄດ້ປະຕິບັດໃນເດືອນສິງຫາ 2020 ຜ່ານມາຕາມທີ່ໄດ້ລະບຸໃນແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ສະບັບເລກທີ 806/ຫສນຍ, ລົງວັນທີ 29 ກໍລະກົດ 2020 ແລະ ສະບັບເລກທີ 838/ຫສນຍ, ລົງວັນທີ 07 ສິງຫາ 2020 ຢ່າງເຂັ້ມງວດ,ໃນນັ້ນ ສະເພາະມາດຕະການທີ່ສືບຕໍ່ໂຈະມີດັງນີ້:
  • ສືບຕໍ່ປິດບັນດາກິດຈະການຮ້ານບັນເທິງ, ຮ້ານຄາລາໂອເກະ ແລະ ຮ້ານເກມ. ສຳລັບບັນດາຮ້ານບັນເທິງ ແລະ ຮ້ານຄາລາໂອເກະ ໃຫ້ພາກສ່ວນກ່ຽວຂ້ອງ ສືບຕໍ່ຕິດຕາມ ແລະ ກວດກາ ຕາມຄຳສັ່ງຂອງລັດຖະບານ ຜ່ານມາ, ຖ້າເຫັນວ່າຍັງມີການລະເມີດ ໃຫ້ມີການກ່າວເຕືອນ, ຖ້າຍັງຝ່າຝືນກໍໃຫ້ດຳເນີນການຖອນໃບອະນຸຍາດຊົ່ວຄາວ.

  • ສືບ​ຕໍ່​ປິດດ່ານ​ປ​ະ​ເພ​ນີແລະດ່ານ​ທ້ອງ​ຖິ່​ນສຳ​ລັບ​ການ​ເຂົ້າ​-ອອກຂອງ​ບຸກ​ຄົນ​ທົ່ວ​ໄປແລະການຂົນ​ສົ່ງ​ສິນ​ຄ້າ, ຍົກ​ເວັ້ນບາງ​ດ່ານ​ປະ​ເພ​ນີຫຼືດ່ານ​ທ້ອງ​ຖິ່ນທີ່​ໄດ້​ຮັບ​ອະ​ນຸ​ຍາດຈາກ​ລັດ​ຖະ​ບ​ານ​ໃຫ້​ລົດ​ຂົນ​ສົ່ງ​ສິນ​ຄ້າເຂົ້າ-ອອກ​ ໄດ້. ສ່ວນດ່ານສາກົນ ສຶບຕໍ່ປິດສຳລັບການເຂົ້າ-ອອກຂອງບຸກຄົນທົ່ວໄປ, ຍົກເວັ້ນ ພົນລະເມືອງລາວ ແລະ ຊາວຕ່າງປະເທດ ທີ່ມີຄວາມຈຳເປັນຮີບດ່ວນໃນການເ​ດີນທາງເຂົ້າ-ອອກ ສປປ ລາວ ທີ່​ໄດ້​ຮັບອະນຸຍາດຈາກຄະນະສະເພາະກິດ. ສຳລັບການຂົນສົ່ງສິນຄ້າ ຜ່ານດ່ານສາ​ກົນແມ່ນສາມາດ​ເຂົ້າ-ອອກ​ໄດ້ຕາມປົກກະຕິ.

  • ສືບຕໍ່ໂຈະການອອກວີຊາທ່ອງ​ທ່ຽວ ແລະ ຢ້ຽມ​ຢາມ ສຳ​ລັບບຸກຄົນ ທີ່ເດີນທາງມາຈາກ ຫຼື ຜ່ານປະເທດ ທີ່ຍັງມີການລະບາດ ຂອງພະຍາດ COVID-19.ສຳ​ລັບນັກການທູດ, ພະ​ນັກ​ງານ​ອົງ​ການ​ຈັດ​ຕັ້ງ​ສາ​ກົນ, ຊ່ຽວຊານ, ນັກລົງທຶນ, ນັກທຸລະກິດ, ວິຊາການ ແລະ ແຮງງານຕ່າງປະເທດ ທີ່ມີຄວາມຈໍາເປັນ ແລະ ຮີບດ່ວນ ​ສາ​ມາດເຂົ້າມາປະຕິບັດວຽກງານ ຢູ່ສະຖານທູດ, ບັນດາກິດຈະການ ແລະ ໂຄງການຕ່າງໆ ໄດ້, ແຕ່ຕ້ອງຜ່ານ​ການ​ພິ​ຈາ​ລະ​ນາເຫັນ​ດີ​ຈາກຄະນະສະເພາະກິດ.
  • ໃຫ້ສືບຕໍ່ໂຈະຊົ່ວຄາວສຳລັບຍົນເຊົ່າເໝົາລຳລະຫວ່າງປະເທດກ່ອນ ແລະ ໃຫ້ຄະນະສະເພາະກິດ ສົມທົບກັບກົມການບິນພົນລະເຮືອນ ແລະ ພາກສ່ວນກ່ຽວຂ້ອງ ສືບຕໍ່ອອກມາດຕະການໃໝ່ ໃຫ້ລະອຽດ ແລະ ຮັດກຸມ ສະເໜີມາຍັງລັດຖະບານ ເພື່ອຂໍອະນຸມັດກ່ອນ ຈຶ່ງດຳເນີນການໄດ້.
  • ເຫັນດີໃຫ້ກຳນົດເອົາ ເວລາ 23:00 ໂມງ ຕາມດຳລັດ ສະບັບເລກທີ 315/ລບ, ລົງວັນທີ 02 ຕຸລາ 2017 ເປັນເວລາປິດຮ້ານອາຫານ ໂດຍໃຫ້ປະຕິບັດເປັນເອກະພາບໃນຂອບເຂດທົ່ວປະເທດ.ກ່ຽວກັບການປະຕິບັດບັນດາມາດຕະການປ້ອງກັນ, ຄວບຄຸມ ແລະ ສະກັດກັ້ນ ສຳລັບຮ້ານອາຫານ ໃນໄລຍະຜ່ານມາ ທີ່ຍັງມີບາງທ້ອງຖິ່ນ ປະຕິບັດບໍ່ເປັນເອກະພາບກັນນັ້ນ, ມອບໃຫ້ຄະນະສະເພາະກິດ ອອກຄຳແນະນຳສະເພາະ ໃຫ້ລະອຽດຕື່ມ.
  • ໃຫ້ກະຊວງປ້ອງກັນຄວາມສະຫງົບ ສົມທົບກັບອົງການປົກຄອງທ້ອງຖິ່ນ ສືບຕໍ່ເອົາໃຈໃສ່ຢ່າງເຂັ້ມງວດ ໃນການຕິດຕາມ, ກວດກາ ແລະ ຄຸ້ມຄອງ ຜູ້ລັກລອບເຂົ້າເມືອງ ທີ່ບໍ່ໄດ້ຜ່ານດ່ານຊາຍແດນ ມາຈຳກັດບໍລິເວນ ແລະ ເກັບຕົວຢ່າງໄປກວດຫາເຊື້ອພະຍາດ.
  • ມອບໃຫ້ຄະນະສະເພາະກິດ ເປັນໃຈກາງໃນການປະສານສົມທົບກັບພາກສ່ວນກ່ຽວຂ້ອງ ສືບຕໍ່ຕິດຕາມ ແລະ ກວດກາການປະຕິບັດບັນດາມາດຕະການຜ່ອນຜັນ, ມາດຕະການໃນການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດຂອງພະຍາດCOVID-19ຂອງບັນດາຂະແໜງການ ແລະ ທ້ອງຖິ່ນຢ່າງໃກ້ຊິດ, ກໍລະນີມີບັນຫາໃດເກີດຂຶ້ນໃໝ່ ກໍໃຫ້ຮີບຮ້ອນແກ້ໄຂ ໃຫ້ທັນການ, ຖ້າຈຳເປັນ ກໍໃຫ້ລາຍງານລັດຖະບານ ເພື່ອມີທິດຊີ້ນຳ.

 

No comments yet! You be the first to comment.

Leave a Reply

Your email address will not be published.

This site uses Akismet to reduce spam. Learn how your comment data is processed.

error: Alert: Content is protected !!