ສະຫລຸບບັນຫາໜ້າສົນໃຈທົ່ວໂລກ ວັນທີ 15 ກັນຍາ 2020
- ນັກວິທະຍາສາດໄດ້ປະກາດເຖິງການຄົ້ນພົບຄັ້ງໃຫຍ່ ກ່ຽວກັບຫລັກຖານຂອງແກັສທີ່ເອີ້ນວ່າ “ຟໍຟິນ” ໃນຊັ້ນບັນຍາກາດຂອງ “ດາວສຸກ” ເຊິ່ງເປັນແກັສທີ່ຮູ້ກັນວ່າຕ້ອງເປັນ “ສິ່ງມີຊີວິດ” ເທົ່ານັ້ນທີ່ສ້າງຂຶ້ນມາໄດ້.
ການປະກາດການຄົ້ນພົບໃນການວິໄຈຄັ້ງໃໝ່ຫລ້າສຸດນີ້ ໄດ້ເຮັດໃຫ້ຄົນທົ່ວໂລກເກີດຄວາມສົນໃຈໃນດາວເຄາະໜ່ວຍນີ້ອີກ ເຊິ່ງໃນອະດີດບາງຄັ້ງເຄີຍຖືກເອີ້ນວ່າ “ຝາແຝດຂອງໂລກ” ແຕ່ໄດ້ຖືກລືມໄປໃນພາຍຫລັງ ເນື່ອງຈາກພື້ນຜິວຂອງມັນຮ້ອນເກີນໄປສຳລັບຊີວິດ.
ເຖິງຢ່າງໃດກໍຕາມ, ການວິໄຈຫລ້າສຸດລະບຸວ່າ: ຖ້າຢູ່ເທິງຊັ້ນເມກຂອງດາວສຸກອາດຈະມີໂອກາດທີ່ຈະມີສິ່ງມີຊີວິດຢູ່ນັ້ນ.
ຖືເປັນເວລາຫລາຍທົດສະວັດແລ້ວ ທີ່ “ດາວອັງຄານ” ໄດ້ຮັບຄວາມສົນໃຈຈາກໂລກຫລາຍທີ່ສຸດ (ລວມທັງເງິນລົງທຶນເພື່ອການສຶກສາ) ໃນການຄົ້ນຫາສິ່ງມີຊີວິດນອກໂລກໃນລະບົບສຸລິຍະ ເຖິງວ່າ “ດາວສຸກ” ທີ່ຢູ່ໃກ້ກວ່າຈະມີຂະໜາດໃກ້ຄຽງກັບໂລກ ແຕ່ພື້ນຜິວຂອງມັນບໍ່ເອື້ອອຳນວຍຈະດຳລົງຊີວິດຢູ່.
ໂດຍພື້ນຜິວຂອງມັນມີອຸນຫະພູມສູງກວ່າທີ່ໃຊ້ໃນການຂ້າເຊື້ອພະຍາດສຳລັບອຸປະກອນທາງການແພດ, ແຕ່ຖ້າເບິ່ງເຖິງການອາໄສຢູ່ໃນຊັ້ນບັນຍາກາດຂອງມັນ ເຮົາອາດຈະໄດ້ເງື່ອນໄຂສະພາບແວດລ້ອມທີ່ເປັນມິດຂຶ້ນ.
ທີມວິໄຈ 2 ທີມ ນຳໂດຍ Sara Seager ແລະ Jane Greaves ໄດ້ຮ່ວມມືກັນເພື່ອສຶກສາລັກສະນະທົ່ວໄປທາງດາລາສາດ. ຂະນະທີ່ລາຍງານຂອງພວກເຂົາສະແດງຫລັກຖານຂອງແກັສຟໍຟິນ ເຊິ່ງເປັນແກັສທີ່ສາມາດຜະລິດໄດ້ໂດຍຈຸລິນຊີ ແລະ ນັກເຄມີໃນໂລກໃນປະລິມານໜ້ອຍ ແຕ່ຄົງທີ່.
ບັນຫາສຳຄັນຄື ເນື່ອງຈາກປົກກະຕິແລ້ວ ແກັສຟໍຟິນຈະສະຫລາຍໄປເອງໃນຊັ້ນບັນຍາກາດຂອງດາວສຸກ ແຕ່ການຄົ້ນພົບຫລ້າສຸດນີ້ໄດ້ຢືນຢັນແລ້ວວ່າ ແກັສດັງກ່າວຖືກສ້າງຂຶ້ນຢ່າງຕໍ່ເນື່ອງ ໂດຍບໍ່ຮູ້ແນ່ນອນວ່າສານປະຕິກິລິຍາເຄມີ ຫລື ສິ່ງມີຊີວິດອື່ນໃດ ທີ່ສາມາດສ້າງແກັສນີ້ຂຶ້ນມາຄືຈຸລິນຊີໃນໂລກໄດ້.
ແນ່ນອນວ່າປັດຈຸບັນນັ້ນຍັງບໍ່ມີອົງຄວາມຮູ້ ແລະ ກົນໄກໃດທີ່ມະນຸດເຮົາຮູ້ຈັກ ເພື່ອຈະໃຊ້ໃນການສ້າງແກັສດັ່ງກ່າວຂຶ້ນມາປາສະຈາກການມີຊີວິດ.
ແຕ່ຢ່າງໃດກໍຕາມ, ເລື່ອງທັງໝົດນີ້ຍັງບໍ່ສາມາດສະຫລຸບໄດ້ 100% ຫລື ເປັນພຽງຂໍ້ພິສູດໄດ້ວ່າດາວສຸກມີສິ່ງມີຊີວິດຢູ່ແທ້ ແລະ ໃນອະນາຄົດທີມງານພາກພື້ນດິນຈະພະຍາຍາມຄົ້ນຫາຟໍຟິນດ້ວຍຕົນເອງ ໂດຍໃຊ້ເຕັກນິກອື່ນໆ ແລະ ຈະມີການສຶກສາເບິ່ງວ່າສາມາດສັງເຄາະແກັສນີ້ຂຶ້ນມາໃນທາງພື້ນຖານ ໂດຍບໍ່ແມ່ນສິ່ງມີຊີວິດໄດ້ ຫລື ບໍ່.
ການຄົ້ນພົບຄັ້ງນີ້ຖືເປັນຂ່າວໃຫຍ່ທີ່ທ້າທາຍວົງການວິທະຍາສາດຫລາຍທີ່ສຸດຄັ້ງໜຶ່ງ.
- ພັກເສລີປະຊາທິປະໄຕຂອງຍີ່ປຸ່ນໄດ້ເລືອກທ່ານ Suga Yoshihide ໃຫ້ເປັນຜູ້ນຳຄົນໃໝ່ ແລະ ເປັນນາຍົກລັດຖະມົນຕີຄົນຕໍ່ໄປຂອງປະເທດ. ໄຊຊະນະຂອງທ່ານສິ້ນສຸດລົງແບບບໍ່ໜ້າແປກໃຈ ແລະ ທ່ານ Suga ໄດ້ທຳລາຍອະຄະຕິຈາກຄວາມຄຸມເຄືອທີ່ກ່າວວ່າທ່ານມາຈາກຄອບຄົວສາມັນທຳມະດາ ແລະ ຕະຫລອດໄລຍະເວລາຜ່ານມາກໍໃຊ້ອຳນາດສ່ວນໃຫຍ່ຂອງທ່ານຢູ່ເບື້ອງຫລັງໃນຖານະຫົວໜ້າເລຂາທິການຂອງຄະນະລັດຖະບານ ພາຍໃຕ້ການບໍລິຫານຂອງທ່ານ Abe Shinzo ນາຍົກລັດຖະມົນຕີຄົນປັດຈຸບັນທີ່ກຳລັງຈະລົງຈາກຕຳແໜ່ງໄປ.
- ເຈົ້າໜ້າທີ່ຂອງອິນເດຍກ່າວຫາວ່າຈີນໄດ້ວາງສາຍເຄເບິນໄຍແກ້ວນຳແສງຄວາມໄວສູງຢູ່ບໍລິເວນຊາຍແດນຂອງທັງ 2 ປະເທດຢູ່ພູເຂົາຫິມະໄລ. ຂະນະທີ່ມີການຍິງປືນເກີດຂຶ້ນຢູ່ບໍລິເວນ ເຊິ່ງເປັນຂໍ້ຂັດແຍ່ທີ່ຊື່ວ່າ “Iine of actual control” ໃນອາທິດຜ່ານມາ.
ເຖິງຢ່າງໃດກໍຕາມ, ຕອນນີ້ເຈົ້າໜ້າທີ່ຂອງຈີນ ແລະ ອິນເດຍໄດ້ເລີ່ມການເຈລະຈາລະດັບສູງ ເພື່ອຫລຸດຄວາມຮຸນແຮງຂອງຄວາມຂັດແຍ່ງລົງ ແລະ ປ້ອງກັນບໍ່ໃຫ້ເກີດການລຸກລາມ, ສ່ວນຄວາມກັງວົນໃນປັດຈຸບັນຄື ສາຍເຄເບິນທີ່ກອງທັບຈີນໄດ້ຕິດຕັ້ງເອົາໄວ້ ສາມາດຊ່ວຍໃຫ້ທະຫານສື່ສານກັບກອງຫລັງຂອງພວກເຂົາໄດ້ ເຊິ່ງອິນເດຍຢ້ານວ່າຈະເຮັດໃຫ້ເກີດການຄຸກຄາມຫລາຍຂຶ້ນຢູ່ບໍລິເວນຊາຍແດນ.
- ຜູ້ອຳນວຍການຝ່າຍພາກພື້ນເອີຣົບຂອງອົງການອະນາໄມໂລກ ກ່າວວ່າ ຄົນພາຍໃນພາກພື້ນຄວນມີຄວາມລະມັດລະວັງ ແລະ ຄວນຄິດສະເໝີວ່າ ຜູ້ເສຍຊີວິດຈາກ COVID-19 ຈະເພີ່ມຂຶ້ນໄປອີກໃນລະດູໃບໄມ້ຫລົ່ນ ຫລັງຈາກຜູ້ຕິດເຊື້ອເລີ່ມເພີ່ມສູງຂຶ້ນເມື່ອມໍ່ໆນີ້.
ໃນວັນທີ 13 ກັນຍາຜ່ານມາ, WHO ໄດ້ລາຍງານຜູ້ຕິດເຊື້ອໃໝ່ 307.000 ຄົນທົ່ວໂລກ ເຊິ່ງຖືເປັນສະຖິຕິແຕ່ລະມື້ສູງທີ່ສຸດນັບແຕ່ເກີດການລະບາດຂຶ້ນມາ ໂດຍອິນເດຍ, ເບຣຊິນ ແລະ ອາເມລິກາ ຍັງເປັນ 3 ປະເທດທີ່ມີການແຜ່ລະບາດຮຸນແຮງທີ່ສຸດ.
- Boris Johnson ນາຍົກລັດຖະມົນຕີຂອງອັງກິດ ໄດ້ເປີດການສະເໜີຄຳເຫັນຕໍ່ “ຮ່າງກົດໝາຍຕະຫລາດພາຍໃນ (internal-market bill)” ໃນລັດຖະສະພາ ເຊິ່ງຖ້າຮ່າງກົດໝາຍນີ້ຜ່ານໄປຈະເປັນການລຶບລ້າງສ່ວນໜຶ່ງຂອງຂໍ້ຕົກລົງ Brexit ທີ່ກ່ຽວຂ້ອງກັບການຄ້າລະຫວ່າງອັງກິດ ແລະ ສາທາລະນະລັດໄອແລນເໜືອ.
ບັນຫາຄືຮ່າງກົດໝາຍດັ່ງກ່າວນັ້ນເປັນການຝ່າຝືນກົດໝາຍສາກົນ ທີ່ຕົກລົງຮ່ວມກັນໄວ້ກັບ EU. ຂະນະທີ່ອະດີດນາຍົກລັດຖະມົນຕີຂອງປະເທດທີ່ຍັງມີຊີວິດຢູ່ທຸກຄົນກໍໄດ້ອອກມາວິພາກວິຈານການເຄື່ອນໄຫວຂອງລັດຖະບານຊຸດນີ້ຢ່າງໜັກ ເຖິງວ່າທູດທາງດ້ານເສລີພາບໃນການນັບຖືສາສະໜາຂອງ Johnson ກໍໄດ້ລາອອກ ເນື່ອງຈາກແຜນການດັ່ງກ່າວ.
- Steven Mnuchin ລັດຖະມົນຕີກະຊວງການເງິນຂອງອາເມລິກາ ກ່າວວ່າ ຝ່າຍບໍລິຫານຂອງທ່ານ ທຣຳ ຈະມີການທົບທວນຂໍ້ສະເໜີຈາກ Oracle ເພື່ອສ້າງ TikTok ໃຫ້ເປັນບໍລິສັດທີ່ມີສຳນັກງານໃຫຍ່ຢູ່ອາເມລິກາ.
ຂະນະດຽວກັນ ByteDance ເຊິ່ງເປັນເຈົ້າຂອງ TikTok ໄດ້ຕົກລົງຈະເຂົ້າຮ່ວມເປັນ “ຫຸ້ນສ່ວນທາງເຕັກນິກ” ກັບບໍລິສັດຊອບແວຍັກໃຫຍ່ຂອງອາເມລິກາ ແລະ ການທີ່ພວກເຂົາຈະປະສົບຄວາມຫລົ້ມເຫລວໃນການເຈລະຈາເພື່ອການຂາຍເຕັມຮູບ (Takeover) ຈຶ່ງເຮັດໃຫ້ແຮງກົດດັນຈາກຝ່າຍບໍລິຫານຂອງ ທຣຳ ກ່ຽວກັບຄວາມກັງວົນດ້ານຄວາມໝັ້ນຄົງຂອງປະເທດຍັງມີຢູ່.
- Alexander Lukashenko ປະທານາທິບໍດີຂອງປະເທດເບລາຣຸສ ໄດ້ແຍກຕົວອອກຈາກປະເທດຫລາຍຂຶ້ນ ໂດຍຫລ້າສຸດໄດ້ເດີນທາງໄປເມືອງ Sochi ໃນປະເທດຣັດເຊຍ ເພື່ອຕອບສະໜອງຄວາມຕ້ອງການຂອງປະທານາທິບໍດີ Vladimir Putin.
Lukashenko ຕ້ອງຜະເຊີນກັບການປະທ້ວງຢ່າງຕໍ່ເນື່ອງມາດົນກວ່າ 1 ເດືອນ ເຊິ່ງເປັນການຕອບໂຕ້ທີ່ລັດຖະບານໃຊ້ກຳລັງປາບປາມຢ່າງຮຸນແຮງຕໍ່ຜູ້ທີ່ເຫັນຕ່າງ. ຂະນະທີ່ຣັດເຊຍໜຸນຫລັງ Lukashenko ຢູ່.
ໃນກອງປະຊຸມຂອງທັງ 2 Putin ໄດ້ສະເໜີເງິນກູ້ 1,5 ພັນລ້ານໂດລາ ແກ່ປະເທດເບລາຣຸສ. ຂະນະທີ່ກອງທັບທະຫານພວກເຂົາຈະມີການຊ້ອມຮົບຮ່ວມລະຫວ່າງປະເທດຮ່ວມກັນ ໂດຍຈະເລີ່ມຂຶ້ນໃກ້ເມືອງ Brest ທາງຕາເວັນຕົກຂອງເບລາຣຸສ.
