ເຫັນ​ຈຸດ​ແຂງ​ແທງ​ຈຸດ​ອ່ອນ​ແລ້ວ​ຕ້ອງ​ແກ້

ເຫັນ​ຈຸດ​ແຂງ​ແທງ​ຈຸດ​ອ່ອນ​ແລ້ວ​ຕ້ອງ​ແກ້ - 555 50 - ເຫັນ​ຈຸດ​ແຂງ​ແທງ​ຈຸດ​ອ່ອນ​ແລ້ວ​ຕ້ອງ​ແກ້
ເຫັນ​ຈຸດ​ແຂງ​ແທງ​ຈຸດ​ອ່ອນ​ແລ້ວ​ຕ້ອງ​ແກ້ - Untitled design - ເຫັນ​ຈຸດ​ແຂງ​ແທງ​ຈຸດ​ອ່ອນ​ແລ້ວ​ຕ້ອງ​ແກ້

ໂດຍ: ທິດ​ກໍ່າ

​ໃນ​ວັນ​ທີ 10 ກັນຍາ​ທີ່​ຜ່ານ​ມາ, ທາງ​ສະມາຄົມ​ນັກ​ຂ່າວ​ແຫ່ງ ສປປ ລາວ ​ໄດ້​ຈັດ​ກອງ​ປະຊຸມ​ເພື່ອ​ຄົ້ນຄວ້າ​ປຶກສາ​ຫາລື​ທິດ​ຊີ້​ນຳ​ຂອງ​ທ່ານ​ນາຍົກລັດຖະມົນຕີ ທອງ​ລຸນ ສີ​ສຸ​ລິດ ທີ່​ວ່າ: ສື່​ມວນ​ຊົນ​ຕ້ອງ​ເປັນ “ຜູ້​ກ້າ​ປາກ​ອອກ​ແສງ, ຜູ້​ຮູ້​ແທງ​ຈິດ​ໃຈ, ຜູ້​ສະດຸ້ງ​ໄວ​ເມື່ອ​ໄດ້​ອ່ານ, ຜູ້​ຮູ້​ຜ່ານ​ອຸປະສັກ, ຜູ້​ທີ່​ຮັກ​ຄວາມ​ຈິງ, ຜູ້​ທີ່​ຍິງ​ຖືກ​ເປົ້າ” ​ໃນ​ການ​ສຳ​ມະ​ນາຄັ້ງນີ້ ພາຍ​ໃຕ້​ການ​ເປັນ​ປະທານ​ຂອງ​ທ່ານ ສະຫວັນ​ຄອນ ຣາຊມຸນຕີ ຮອງ​ລັດຖະມົນຕີ​ກະຊວງ​ຖະ​ແຫລ​ງຂ່າວ, ວັດທະນະທຳ ​ແລະ ທ່ອງ​ທ່ຽວ ທັງ​ເປັນ​ປະທານ​ສະມາຄົມ​ນັກ​ຂ່າວ​ແຫ່ງ ສປປ ລາວ. ຈຸດປະສົງ​ຫລັກໆ​ກໍ​ແມ່ນ​ເພື່ອ​ຄົ້ນຄວ້າ​ປຶກສາ​ຫາລື​ແລກປ່ຽນ​ຄຳ​ຄິດ​ຄຳ​ເຫັນ ​ແລະ ຊອກ​ວິທີ​ທາງ​ໃນ​ການຈັດຕັ້ງປະຕິບັດ​ທິດ​ທາງ​ແຜນ​ພັດທະນາ​ຄຸນ​ນະພາ​ບວຽກ​ງານ​ສື່​ມວນ​ຊົນ​ທີ່​ໄດ້​ສະ​ເໜີ​ໃນ​ງານ​ໂຮມ​ຊຸມນຸມ​ສະ​ເຫລີ​ມສະຫລອງ​ວັນ​ສື່​ມວນ​ຊົນ ​ແລະ ພິມ​ຈຳໜ່າຍ​ ຄົບຮອບ 70 ປີທີ່​ຜ່ານ​ມາ ​ແລະ ອັນ​ທີ່​ແນ່​ແທ້​ກໍ​ແມ່ນ​ເພື່ອ​ຫາ​ວິທີ​ອອກ​ຈາກ​ການ​ເຮັດ​ຂ່າວ​ແບບ​ເກົ່າ​ທີ່​ມີ​ເນື້ອ​ໃນ​ແຂງ​ກະດ້າງ ຮູບ​ແບບ​ກໍ​ແຫ້ງ​ກະ​ແດ້ງ ບໍ່​ມີ​ຊີວິດ​ຊີວາ, ບໍ່​ຊັກ​ຊວນ​ອວນ​ຕ້ານ​ຈາກ​ຜູ້​ເບິ່ງ, ຜູ້​ຊົມ​ທີ່​ຊົມ​ແລ້ວ​ກໍ​ຢາກ​ຊົມ​ອີກ.

ວົງ​ການ​ສື່​ມວນ​ຊົນ​ເຮົາ ​ໂດຍ​ລວມ​ແລ້ວ​ນັບ​ແຕ່​ໄລຍະ​ປະ​ເທດ​ຊາດ​ຂອງ​ພວກ​ເຮົາ​ໄດ້​ມີ​ການ​ປ່ຽນ​ແປງ​ໃໝ່​ມາ​ນີ້ ຕ້ອງ​ຍອມຮັບ​ວ່າ​ໄດ້​ມີ​ການ​ເຕີບ​ໃຫຍ່ ​ແລະ ຂະຫຍາຍຕົວ​ໄປ​ໄດ້​ດີ​ສົມຄວນ. ການ​ເຕີບ​ໃຫຍ່​ຂະຫຍາຍຕົວ​ນີ້ ​ແມ່ນ​ໄປ​ຕາມ​ຂະ​ບວນວິວັດ​ທີ່​ກ້າວໜ້າ​ຂອງ​ສັງຄົມ ​ແລະ ຂອງ​ໂລກ. ອັນ​ສາ​ເຫດ​ກໍ​ຍ້ອນ​ວ່າ​ຢູ່​ພາກພື້ນ ​ແລະ ​ໃນ​ໂລກ​ມີ​ການ​ເຊື່ອມ​ໂຍງ​ເຂົ້າກັນ​ໃນ​ຫລາຍ​ດ້ານ ບໍ່​ວ່າ​ໃນ​ດ້ານ​ການ​ເມືອງ, ​ເສດຖະກິດ-ສັງຄົມ ​ແລະ ວັດທະນະທຳ ຕະຫລອດ​ເຖິງ​ວຽກ​ງານ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ ຫລື ຄວາມ​ໝັ້ນຄົງ​ໃນ​ດ້ານ​ຕ່າງໆ. ການ​ເຊື່ອມ​ຕົວ​ເຂົ້າກັນ​ຂອງ​ແຕ່ລະ​ປະ​ເທດ ນັບ​ທັງ​ພາກພື້ນ ​ແລະ ​ໃນ​ໂລກ​ນັ້ນ ກໍ​ເພື່ອ​ຄວາມ​ຍືນ​ຍົງ​ຄົງ​ຕົວ ​ແລະ ຄວາມ​ເຂັ້ມ​ແຂງ​ຂອງ​ແຕ່ລະ​ປະ​ເທດ, ກຽມພ້ອມ​ຕອບ​ຕ້ານ, ຕອບ​ໂຕ້​ສິ່ງ​ທ້າ​ທາຍ​ຕ່າງໆ​ທີ່​ອາດ​ຈະ​ເກີດ​ຂຶ້ນຕໍ່​ມວນ​ມະນຸດ​ທີ່​ໄດ້​ອ​າ​ໄສ​ຢູ່​ໃນ​ໂລກ​​ໃບ​ນີ້. ສຳລັບ ສປປ ລາວ ຂອງ​ພວກ​ເຮົາ​ກໍ​ແມ່ນ​ໜຶ່ງ​ທີ່​ໄດ້​ເຂົ້າ​ເປັນ​ພາຄີ​ເກືອບ​ທຸກ​ອົງການ​ຈັດຕັ້ງ​ໃນ​ພາກພື້ນ ​ແລະ ​ໃນ​ໂລກ.

​ເພາະສະນັ້ນ ຕະຫລອດ​ໄລຍະ​ຫລາຍ​ສິບ​ປີຜ່ານມາ ປະ​ເທດ​ຊາດ​ຂອງ​ພວກ​ເຮົາ​ກໍ​ມີ​ການ​ປ່ຽນ​ແປງ​ໃໝ່​ຈາກ​ເງື່ອນ​ໄຂ​ອັນ​ເກົ່າ​ກ້າວ​ສູ່​ຂະ​ບວນວິວັດ​ທີ່​ກ້າວໜ້າ​ໃນ​ໂລກ ປຽບ​ເໝືອນ​ຈາກ​ຫລັງ​ມື​ເປັນ​ໜ້າ​ມື​ຢ່າງ​ກ້າວ​ກະ​ໂດດ​ຂັ້ນ. ໜຶ່ງ​ໃນ​ພາລະກິດ​ການ​ປ່ຽນ​ແປງ​ລະບົບ​ເສດຖະກິດ-ສັງຄົມ​ຂອງ​ປະ​ເທດ, ວຽກ​ງານ​ສື່​ມວນ​ຊົນ ​ແລະ ພິມ​ຈຳໜ່າຍ​ກໍ​ໄດ້​ຮັບ​ການ​ພັດທະນາ​ໃຫ້​ຂະຫຍາຍຕົວ​ໄປ​ຕາມ​ທິດ​ທາງ ​ແລະ ​ແຜນ​ນະ​ໂຍບາຍ​ຂອງ​ພັກ ​ແລະ ລັດຖະບານ​ວາງ​ອອກ ​ເປັນຕົ້ນໜັງສືພິມ, ວາລະສານ, ວິທະຍຸ, ​ໂທລະພາບ ​ແລະ ສື່​ສິ່ງ​ພິມ​ຕ່າງໆ ກໍ​ໄດ້​ເພີ່ມ​ຂຶ້ນທາງ​ປະລິມານ ​ແລະ ຄຸນ​ນະພາ​ບ. ນອກຈາກ​ນັ້ນ ສື່​ໃໝ່ ຫລື​ວ່າ ສື່​ອອນ​ລາຍ​ກໍ​ໄດ້​ປາກົດ​ຕົວ​ສະໜອງ​ຂໍ້​ມູນ​ຂ່າວສານ​ທີ່​ວ່ອງ​ໄວ​ທັນ​ໃຈ​ຕາມ​ກະ​ແສ​ໂລກ​ສະ​​ໄໝ​ໃໝ່ ​ແລະ ​ແຜ່​ລາມ​ຢ່າງ​ກວ້າງຂວາງ​ໃນ​ທົ່ວ​ປະ​ເທດ.

ເຫັນ​ຈຸດ​ແຂງ​ແທງ​ຈຸດ​ອ່ອນ​ແລ້ວ​ຕ້ອງ​ແກ້ - Wave100S AD to Website 2020 0 - ເຫັນ​ຈຸດ​ແຂງ​ແທງ​ຈຸດ​ອ່ອນ​ແລ້ວ​ຕ້ອງ​ແກ້

​ແຕ່​ວ່າ​ແນວ​ໃດ​ກໍ​ດີ, ອີງ​ໃສ່​ສະພາບ​ການ​ຂອງ​ໂລກ ​ແລະ ພາກພື້ນທີ່​ນັບ​ມື້ມີ​ການ​ປ່ຽນ​ແປງ​ກ້າວ​ໄປ​ຢ່າງ​​ໄວວາ, ການ​ພັດທະນາ​ຂອງ​ປະ​ເທດ​ກໍ​ພວມ​ມີ​ບັນຍາກາດ​ຄຶກຄັກ ພວມ​ກ້າວ​ໄປ​ຕາມ​ຍຸກ​ຕາມ​ສະ​ໄໝ​ ວົງ​ການ​ສື່​ມວນ​ຊົນ​ເຮົາ​ກໍ​ຕ້ອງ​ໄດ້​ປັບປຸງ​ແກ້​ໄຂ​ຕົນ​ເອງ​ທາງ​ດ້ານ​ຮູບ​ການ, ວິທີ​ການ​ອອກ​ຂ່າວ​ ຕະຫລອດ​ຮອດ​ການ​ສະໜອງ​ຂໍ້​ມູນ​ຂ່າວສານ​ຕ້ອງ​ອຸດົມສົມບູນ, ຮັ່ງມີ, ທັງ​ວ່ອງ​ໄວ​ທັນ​ໃຈ ​ເພື່ອ​ຕອບ​ສະໜອງ​ໃຫ້​ຜູ້​ບໍລິ​ໂພ​ກ​ໃນ​ທົ່ວ​ສັງຄົມ​ມີ​ຫລາກ​ຫລາຍ​ສີສັນ, ທັນ​ກັບ​ເຫດການ ​ແລະ ສອດຄ່ອງ​ກັບ​ສະພາບ​ຕົວ​ຈິງ​ຢ່າງ​ກົງ​ໄປ​ກົງ​ມາ, ສົມ​ກັບ​ຄຳ​ເວົ້າຂອງ​ທ່ານ​ນາຍົກ​ທີ່​ວ່າ: “ສື່​ມວນ​ຊົນ​ຕ້ອງ​ເປັນ​ຜູ້​ກ້າ​ປາກ​ອອກ​ແສງ, ຜູ້​ຮູ້​ແທງ​ຈິດ​ໃຈ, ຜູ້​ສະດຸ້ງ​ໄວ​ເມື່ອ​ໄດ້​ອ່ານ, ຜູ້​ຮູ້​ຜ່ານ​ອຸປະສັກ, ຜູ້​ທີ່​ຮັກ​ຄວາມ​ຈິງ, ຜູ້​ທີ່​ຍິງ​ຖືກ​ເປົ້າ” ຢ່າງ​ແທ້​ຈິງ.

​ເຖິງ​ຢ່າງ​ໃດ​ກໍ​ດີ, ຕາມ​ທັດສະນະ​ຂອງ​ ທິດ​ກໍ່າ ວ່າ ທຸກ​ສິ່ງ​ທຸກ​ຢ່າງ​ກວ່າ​ຈະ​ເດີນ​ໜ້າ, ຖອຍຫລັງ ຫລື ຢ້ຳ​ເທົ້າມັນ​ກໍ​ຂຶ້ນກັບ​ຄົນ​ເປັນ​ຜູ້​ເຮັດ, ຢາກ​ອອກ​ຂ່າວ​ຄາວ​ຊ້າ ຫລື ​ໄວ​ກໍ​ແມ່ນ​ຄົນ, ຢາກ​ໃຫ້​ວົງ​ການ​ສື່​ມີ​ສີສັນ​ທີ່​ຫລາກ​ຫລາຍ, ​ເນື້​ອ​ໃນ, ຮູບ​ການ​ທີ່​ອຸດົມສົມບູນ​ກໍ​ແມ່ນ​ຄົນ​ເປັນ​ຜູ້​ເຮັດ. ​ໃນ​ປັດຈຸບັນ ວົງ​ການ​ສື່​ຂອງ​ພວກ​ເຮົາ​ໄດ້​ມີ​ນັກ​ຂຽນ​ນັກ​ຂ່າວ​ທີ່​ດີ, ທີ່​ເກັ່ງ, ມີ​ທັກ​ສະ, ຄວາມ​ຮູ້​ຄວາມ​ສາມາດ​ຫລວງຫລາຍ​ສົມຄວນ, ​ແຕ່​ເມື່ອ​ຂຽນ​ບົດ​ຂຽນ​ຂ່າວ​ລົງ​ໄປ​ແລ້ວ ບາງ​ຄັ້ງພັດ​ບໍ່​ຖືກ​ໃຈ​ໂຕ, ບໍ່ຕັດສິນ​ບັນຫາ​ໃຫ້​ໄວ, ​ແກ່​ຍາວ​ປະປ່ອຍ​ໃຫ້​ຊັກ​ຊ້ານັ້ນກໍ​ແມ່ນ​ຄົນ. ຕະຫລອດ​ການ​ເຮັດ​ຂ່າວ​ຕ່າງໆ ວ່າ​ມີ​ແຕ່​ຂ່າວ​ກອງ​ປະຊຸມກໍ​ເໝືອນ​ກັນ​ກໍ​ເພາະ​ຄົນ​ເປັນ​ຜູ້​ເຮັດ, ​ເວົ້າ​ແຈ້ງ​ທຸກ​ຢ່າງ​ກໍ​ຄື​ເວົ້າ​ແລ້ວ​ຕ້ອງ​ເຮັດ, ​ເຮັດ​ຫລາຍ​ກວ່າ​ເວົ້າມີ​ຄວາມ​ຮັບຜິດຊອບ​ສູງ​ຕໍ່​ພາລະ​ໜ້າ​ທີ່ ​ແລະ ການຈັດຕັ້ງ​ໄດ້​ມອບ​ໝາຍ​ອີ່ຫລີ. ສ່ວນວ່າ​ດ້ານ​ທຶນຮອນ ​ແລະ ສິ່ງ​ເອື້ອອຳນວຍ​ຕ່າງໆ​ນັ້ນ ​ເຖິງ​ວ່າ​ພວກ​ເຮົາ​ຍັງ​ດ້ອຍ​ພັດທະນາ, ຫຍຸ້ງຍາກ​ແດ່ ມັນ​ກໍ​ພໍ​ກິນ​ພໍ​ໃຊ້​ຢູ່ ​ເປັນຕົ້ນດ້ານ​ທຶນຮອນ ​ແລະ ພື້ນຖານ​ວັດຖຸ​ເຕັກນິກ. ​ແຕ່​ທຸກ​ສິ່ງ​ທຸກ​ຢ່າງ​ມັນ​ຄ່າ​ນຳ​ຄົນ​ຜູ້​ເຮັດ​ກັບ​ຜົນ​ປະ​ໂຫຍ​ດມັນ​ຕິດ​ພັນ​ມັນ​ກໍ​ເລີຍ​ອືດ​ອາດ​ປານ​ດຶງ​ຂາ​ເຕົ່າ, ຍິ່ງ​ໄປ​ກວ່າ​ນັ້ນ ​ໄກ່​ເຫັນ​ຕີນ​ງູ, ງູ​ກໍ​ເຫັນ​ຕີນ​ໄກ່, ຢ້ານ​ຫລາຍ ກ້າຫານ​ໜ້ອຍ ມັນ​ກໍ​ກາຍ​ເປັນ​ຄື​ໂສ້​ບໍ່​ເຄັ່ງ​ປ່ອຍ​ໄປ​ຕາມ​ມີ​ຕາມ​ເກີດ, ຕາມ​ຍະຖາ​ກຳ ​ແລະ ການ​ເວລາ​ເຫັນ​ແຕ່​ອັນ​ເກົ່າ​ບໍ່​ກ້າ​ເອົາ​ອັນ​ໃໝ່ ລໍຖ້າ​ແຕ່​ຂັ້ນ​ເທິງ​ສັ່ງ​ຈຶ່ງ​ເຮັດ ຫລື ​ເຮັດ​ກໍ​ຕ້ອງ​ມີນ້ຳຍ້ອຍ​ຫອຍ​ຈຶ່ງ​ຫ້າວ.

ເຫັນ​ຈຸດ​ແຂງ​ແທງ​ຈຸດ​ອ່ອນ​ແລ້ວ​ຕ້ອງ​ແກ້ - WhatsApp Image 2020 05 27 at 5 - ເຫັນ​ຈຸດ​ແຂງ​ແທງ​ຈຸດ​ອ່ອນ​ແລ້ວ​ຕ້ອງ​ແກ້
ເຫັນ​ຈຸດ​ແຂງ​ແທງ​ຈຸດ​ອ່ອນ​ແລ້ວ​ຕ້ອງ​ແກ້ - WhatsApp Image 2020 05 27 at 5 - ເຫັນ​ຈຸດ​ແຂງ​ແທງ​ຈຸດ​ອ່ອນ​ແລ້ວ​ຕ້ອງ​ແກ້
error: Alert: ເນື້ອຫາຂ່າວມີລິຂະສິດ !!