ຈະລາຈອນນະຄອນຫລວງລົງກວດກາຜູ້ຂັບຂີ່ລະເມີດລະບຽບ
ເຈົ້າໜ້າທີ່ຈະລາຈອນນະຄອນຫລວງວຽງຈັນ ໃຫ້ຮູ້ວ່າ: ໃນວັນທີ 27 ມິຖຸນາ ນີ້, ກໍາລັງເຈົ້າໜ້າທີ່ຂອງຕົນສົມທົບກັບເຈົ້າໜ້າທີ່ຈະລາຈອນໃນ 5 ຕົວເມືອງ ໄດ້ລົງກວດການັກຂັບຂີ່ທີ່ລະເມີດກົດລະບຽບຈະລາຈອນ ເປັນຕົ້ນ: ລົດດັດແປງສະພາບ, ບໍ່ໃສ່ໝວກກັນກະທົບ, ລົດບໍ່ຕິດປ້າຍທະບຽນ ແລະ ລົດຈອດຢຽບທາງມ້າລາຍ, ໂດຍຈັດຕັ້ງປະຕິບັດຢູ່ສີ່ແຍກໄຟອໍານາດຫລັກ 6, ເຂດເສັ້ນທາງ ດົງນາທອງ, ເສັ້ນທາງ 450 ປີ, ເສັ້ນທາງບ້ານໜອງທາ, ເສັ້ນທາງບ້ານຄຳສະຫວາດ, ເສັ້ນທາງ T4 ບ້ານໂພນປ່າເປົ້າ ແລະ ອື່ນໆ.
ທ່ານພັນໂທ ບຸນມາກ ສູນດາໄລ ຮອງຫົວໜ້າພະແນກຈະລາຈອນນະຄອນ ຫລວງ ໃຫ້ຮູ້ວ່າ: ການລົງກວດກາດັ່ງກ່າວແມ່ນປະຕິບັດຕາມຄຳສັ່ງຂອງທ່ານນາຍົກລັດຖະມົນຕີວ່າດ້ວຍການແກ້ໄຂປະກົດການຫຍໍ້ທໍ້ໃນສັງຄົມ ແລະ ຄຳສັ່ງຂອງລັດຖະມົນຕີກະຊວງປ້ອງກັນຄວາມສະຫງົບວ່າດ້ວຍການເພີ່ມທະວີວຽກງານສະກັດກັ້ນ ແລະ ແກ້ໄຂປະກົດການຫຍໍ້ທໍ້ຕ່າງໆຢູ່ໃນສັງຄົມ ກໍຄືແຜນການແກ້ໄຂປະກົດການຫຍໍ້ທໍ້ຢູ່ນະຄອນຫລວງວຽງຈັນ, ຊຶ່ງຈະມີການກວດກາປະຈຳອາທິດທັງໃນຕອນເຊົ້າ ແລະ ຕອນຄໍ່າ, ທັງນີ້ເພື່ອແນໃສ່ແກ້ໄຂບັນດາປາກົດການຫຍໍ້ທໍ້ທາງສັງຄົມ ເປັນຕົ້ນ: ກຸ່ມແກ້ງຂີ່ລົດກວນເມືອງ, ລັກຊັບ-ຊິງຊັບ, ຄ້າຂາຍຢາເສບຕິດ ແລະ ອື່ນໆ.
ຮອງຫົວໜ້າພະແນກຕຳຫລວດຈະລາຈອນນະຄອນຫລວງ ໃຫ້ຮູ້ວ່າ: ປັດຈຸບັນມີນັກຂັບຂີ່ຈໍານວນບໍ່ໜ້ອຍລະເມີດລະບຽບຈະລາຈອນ, ຊຶ່ງມັນສະແດງໃຫ້ເຫັນຈາກການລົງກວດກາໃນອາທິດຜ່ານມາສາມາດພົບເຫັນຜູ້ລະເມີດລະບຽບຈະລາຈອນຫລາຍກວ່າ 80 ກໍລະນີ, ໃນນີ້ໄດ້ດໍາເນີນການສຶກສາອົບຮົມກ່າວເຕືອນ 18 ກໍລະນີ, ກັກເອກະສານລົດຕ່າງໆຈຳນວນ 66 ໃບ, ກັກລົດໄດ້ 14 ຄັນ, ໃນນີ້ລົດດັດແປງສະພາບ 2 ຄັນ, ລົດບໍ່ມີເອກະສານ 10 ຄັນ ແລະ ລົດບໍ່ຕິດປ້າຍທະບຽນ 2 ຄັນ ແລະ ອາທິດຜ່ານມາທົ່ວນະຄອນລວງວຽງຈັນມີອຸປະຕິເຫດເກີດຂຶ້ນ 28 ກໍລະນີ ແລະ ມີຜູ້ເສຍຊີວິດ 4 ຄົນ.
