ສສຊ ເຫັນພ້ອມຕໍ່ການເອົາໃຈໃສ່ຕິດຕາມກວດກາການບໍລິການຮ້ານບັນເທີງ ແລະ ກິນດື່ມເຂົ້າສູ່ລະບຽບ
ບັນດາສະມາຊິກສະພາແຫ່ງຊາດ (ສສຊ) ໄດ້ສະແດງຄວາມຍ້ອງຍໍຊົມເຊີຍມາຍັງຄະນະປະຈຳສະພາແຫ່ງຊາດ ກໍຄືພາກສ່ວນທີ່ກ່ຽວຂ້ອງໃນການຄຸ້ມຄອງການບໍລິການຮ້ານບັນເທີງ ແລະ ຮ້ານກິນດື່ມ ເຊິ່ງເປັນບັນຫາທີ່ມີຄວາມຈຳເປັນຕ້ອງໄດ້ຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດຕາມກົດໝາຍແທ້.
ທ່ານ ຊົມພູ ດວງສະຫວັນ ປະທານກໍາມາທິການວັດທະນະທໍາ-ສັງຄົມ ຕາງໜ້າຄະນະປະຈຳສະພາແຫ່ງຊາດ ໄດ້ນຳສະເໜີຕໍ່ກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VIII ໃນວັນທີ 2 ພະຈິກນີ້ວ່າ: ເຖິງແນວໃດກໍຕາມ, ກໍສະເໜີໃຫ້ພາກສ່ວນກ່ຽວຂ້ອງເອົາໃຈໃສ່ບາງບັນຫາທີ່ຍັງເປັນປະກົດການຫຍໍ້ທໍ້ທາງສັງຄົມທີ່ໄດ້ສົ່ງຜົນກະທົບທາງລົບ ແລະ ຖ່ວງດຶງການພັດທະນາເສດຖະກິດ-ສັງຄົມ ເປັນຕົ້ນການຕັ້ງຮ້ານແບບຊະຊາຍ, ການນຳໃຊ້ປ້າຍທີ່ບໍ່ຖືກຕ້ອງຕາມລະບຽບ, ການຫລິ້ນກິນຟຸມເຟືອຍ, ເປັນບ່ອນມົ້ວສຸມຢາເສບຕິດ, ຄ້າປະເວນີ, ຄ້າມະນຸດ, ຫລິ້ນການພະນັນ, ກໍ່ກວນອາລະອາດຕີກັນ, ປຸ້ນຈີ້, ຊີງຊັບ, ສ້າງສຽງລົບກວນເນື່ອງນັນ. ຂະນະດຽວກັນ ກໍມີການນຳໃຊ້ແຮງງານເດັກ, ການແຕ່ງກາຍບໍ່ຖືກຕາມຮີດຄອງປະເພນີ ແລະ ຈອດລົດຊະຊາຍທີ່ສ້າງຄວາມກີດຂວາງໃນການຈໍລະຈອນ ແລະ ເກີດອຸບັດຕິເຫດຕາມທ້ອງຖະໜົນເພີ່ມຂຶ້ນ ແລະ ອື່ນໆ.
ປັດຈຸບັນ, ທົ່ວປະເທດມີຮ້ານກິນດື່ມທັງໝົດ 3.885 ຮ້ານ ແລະ ບັນເທີງ 244 ຮ້ານ ເຊິ່ງທຸລະກິດດັ່ງກ່າວໄດ້ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ, ຕິດພັນກັບການສົ່ງເສີມການທ່ອງທ່ຽວ ແລະ ການບໍລິການສັງຄົມສະດວກສະບາຍຂຶ້ນ, ພ້ອມສ້າງວຽກເຮັດງານທຳ, ສ້າງລາຍຮັບໃຫ້ປະຊາຊົນທາງກົງ ແລະ ທາງອ້ອມເປັນຈຳນວນບໍ່ໜ້ອຍໃນແຕ່ລະປີ.
