ສ້າງຂະບວນການສັກຢາກັນພະຍາດສັດໃຫ້ຟົດຟື້ນ

(ເນື່ອງໃນໂອກາດວັນສັກຢາກັນພະຍາດສັດແຫ່ງຊາດ)

ກະຊວງກະສິກຳ ແລະ ປ່າໄມ້ ໄດ້ອອກຄຳສັ່ງເລກທີ 2026/ກປ, ລົງວັນທີ 2 ພະຈິກນີ້ ​ເພື່ອສ້າງຂະບວນການສັກຢາກັນພະຍາດສັດ​ໃຫ້​ມີ​ບັນຍາກາດ​ຟົດຟື້ນ ເນື່ອງໃນໂອກາດວັນສັກຢາກັນພະຍາດສັດດັ່ງກ່າວ ເພື່ອປ້ອງກັນ ​ແລະ ສືບຕໍ່ຍູ້ແຮງວຽກງານກັນພະຍາດສັດໃຫ້ມີ​ປະສິດທິ​ຜົນ ແນໃສ່ຫລຸດຜ່ອນຄວາມສ່ຽງ ແລະ ຜົນກະທົບທີ່ອາດເກີດຂຶ້ນຕໍ່ສັດລ້ຽງ ລວມທັງເປັນການປູກຈິດສຳນຶກ ແລະ ສ້າງຂະບວນການສັກຢາກັນພະຍາດສັດໃນທົ່ວປວງຊົນໃຫ້ກວ້າງຂວາງຟົດຟື້ນກວ່າ​ເກົ່າ.

ປັດຈຸບັນ, ອັດຕາການສັກຢາກັນພະຍາດສັດໄດ້ເພີ່ມຂຶ້ນຢ່າງຕໍ່ເນື່ອງ ໂດຍສະເພາະສັດລ້ຽງແບບເປັນຟາມ ສັກໄດ້ເກືອບ 100%, ສັດລ້ຽງອ້ອມຊານເມືອງ ແລະ ເຂດຊົນນະບົດ ໄດ້ຫລາຍກວ່າ 60% ແລະ ເຂດຫ່າງໄກສອກຫລີກໄດ້ຫລາຍກວ່າ 30% ຢູ່ໃນລະດັບທີ່ດີຂຶ້ນ, ລ້ຽງສັດແຕ່ລະຊະນິດກໍມີການຂະຫຍາຍຕົວຢ່າງສະໝໍ່າສະເໝີ. ແຕ່ເຖິງຢ່າງໃດກໍຕາມ, ພະຍາດສັດກໍຍັງມີການລະບາດຂຶ້ນຢູ່ທົ່ວໄປ ໂດຍສະເພາະໃນປີ 2020 ນີ້ ໄດ້ພົບພະຍາດອະຫິວາໝູອາຟຣິກາ ແລະ ພະຍາດປາກເປື່ອຍລົງເລັບ ຊຶ່ງຖືເປັນໄພຂົ່ມຂູ່ ແລະ ສົ່ງຜົນກະທົບໂດຍກົງຕໍ່ການລ້ຽງສັດຂອງປະຊາຊົນ, ຜູ້ປະກອບການ ແລະ ລັດຖະບານຕ້ອງສູນເສຍງົບປະມານເຂົ້າໃນການເຝົ້າລະວັງ, ສະກັດກັ້ນ ແລະ ໂຕ້ຕອບພະຍາດທີ່ເກີດຂຶ້ນຢ່າງຫລວງຫລາຍ.

ດັ່ງນັ້ນ, ​ໃນ​ໂອກາດ​ວັນ​ສຳຄັນ​ນີ້ ໃຫ້ກົມລ້ຽງສັດ ແລະ ການປະມົງ ເປັນເຈົ້າການປະສານສົມທົບກັບພະແນກກະສິກຳ ແລະ ປ່າໄມ້ຂັ້ນແຂວງ, ອົງການປົກຄອງທ້ອງຖິ່ນແຕ່ລະຂັ້ນ ສືບຕໍ່ໂຄສະນາເຜີຍແຜ່ກົດໝາຍ, ດໍາລັດ, ຄໍາສັ່ງ, ຂໍ້ຕົກລົງ ແລະ ແຈ້ງການຕ່າງໆ ທີ່ຕິດພັນກັບການລ້ຽງສັດ ແລະ ສັດຕະວະແພດໃຫ້ແກ່ພະນັກງານ-ລັດຖະກອນ, ທະຫານ, ຕໍາຫລວດ, ຜູ້ປະກອບການ, ຊາວກະສິກອນ ຕະຫລອດຮອດພໍ່ແມ່ປະຊາຊົນດ້ວຍຫລາຍຮູບແບບ ເປັນຕົ້ນໂຄສະນາຜ່ານສື່ມວນຊົນຕ່າງໆ ໂດຍຍົກໃຫ້ເຫັນຄວາມສໍາຄັນຂອງການເຝົ້າລະວັງ, ປ້ອງກັນ ແລະ ຕ້ານພະຍາດສັດ ລວມທັງຄວາມເສຍຫາຍທີ່ເກີດຈາກການຖືເບົາຕໍ່ວຽກງານສັກຢາກັນພະຍາດສັດ ແລະ ຕັ້ງໜ້າປະຕິບັດຕາມທິດນໍາທີ່ວ່າ: “ການກັນພະຍາດສັດເປັນໜ້າທີ່ຂອງທົ່ວປວງຊົນ” ​ແລະ ​ເຮັດ​ໃຫ້​ຂະ​ບວນການ​ສັກ​ຢາ​ກັນ​ພະຍາດ​ສັດ​ຄັ້ງນີ້​ບັນລຸ​ໄດ້ 90% ຂອງຝູງສັດ ເພື່ອເປັນຕົວແບບໃນການປ້ອງກັນ ແລະ ຮັກສາສຸຂະພາບສັດລ້ຽງໃຫ້ດີ​ຂຶ້ນ.