ຣັດເຊຍເຜີຍຜົນການທົດລອງ ວັກຊີນຕ້ານໂຄວິດ-19 Sputnik V ມີປະສິດທິພາບສູງເຖິງ 92%
ກອງທຶນ Russian Direct Investment Fund (RDIF) ທີ່ໃຫ້ການສະໜັບສະໜູນການພັດທະນາ ແລະ ຄິດຄົ້ນວັກຊີນຕ້ານໂຄວິດ-19 Sputnik V ຂອງຣັດເຊຍ ເປີດເຜີຍຜົນການທົດລອງເບື້ອງຕົ້ນໃນໄລຍະທີ 3 ວ່າ: ວັກຊີນດັ່ງກ່າວມີປະສິດທິພາບໃນການຕ້ານໄວຣັສໂຄວິດ-19 ໄດ້ສູງເຖິງ 92% ໂດຍມີຜູ້ທີ່ໄດ້ຮັບວັກຊີນໂດສທຳອິດປະມານ 20.000 ຄົນ. ຂະນະທີ່ມີຜູ້ທີ່ໄດ້ຮັບວັກຊີນໂດສທີ 2 ແລ້ວປະມານ 16.000 ຄົນ.
ການເປີດເຜີຍປະສິດທິພາບຂອງວັກຊີນຕ້ານໂຄວິດ-19 ດັ່ງກ່າວ ມີຂຶ້ນຫລັງຈາກ Pfizer-BioNTech ໄດ້ເປີດເຜີຍເລື່ອງປະສິດທິພາບຂອງວັກຊີນຕ້ານໂຄວິດ-19 ຂອງຕົນເອງໃນວັນທີ 9 ພະຈິກຜ່ານມາ ແລະ ພົບວ່າມີປະສິດທິພາບສູງເຖິງ 90%. ແຕ່ເຖິງຢ່າງໃດກໍຕາມ, ຜົນການທົດລອງວັກຊີນຂອງ Pfizer-BioNTech ເກັບຂໍ້ມູນຈາກຜູ້ຕິດເຊື້ອໂຄວິດ-19 ຫລາຍກວ່າ 90 ຄົນ. ຂະນະທີ່ວັກຊີນ Sputnik V ຂອງຣັດເຊຍເກັບຂໍ້ມູນຈາກຜູ້ຕິດເຊື້ອໂຄວິດ-19 ພຽງ 20 ຄົນ.
ອີກທັງຜູ້ທີ່ໄດ້ຮັບວັກຊີນ Pfizer-BioNTech ໂດສທີ 2 ມີສູງເຖິງ 38.955 ຄົນແລ້ວ ແລະ ຍັງເປັນວັກຊີນຕ້ານໂຄວິດ-19 ຄົນລະຊະນິດກັນ ໂດຍວັກຊີນຂອງ Pfizer-BioNTech ເປັນການພັດທະນາວັກຊີນໂດຍໃຊ້ຈຸລັງຂອງໄວຣັສ (Genetic Vaccines) ຄື mRNA. ຂະນະທີ່ວັກຊີນຂອງຣັດເຊຍໃຊ້ໄວຣັສທີ່ເຮັດໃຫ້ອ່ອນລົງແລ້ວບໍ່ເຮັດໃຫ້ເກີດພະຍາດ ມາຕັດຕໍ່ໃສ່ສານພັນທຸກຳຂອງໄວຣັສໂຄໂຣນາລົງໄປ ເພື່ອກະຕຸ້ນໃຫ້ຮ່າງກາຍສ້າງພູມຄຸ້ມກັນ (Viral Vector Vaccines).
ກອງທຶນ RDIF ຍັງເປີດເຜີຍອີກວ່າ: ປັດຈຸບັນຍັງບໍ່ພົບຄວາມຜິດປົກກະຕິຮຸນແຮງທີ່ເກີດຂຶ້ນຈາກການຮັບວັກຊີນດັ່ງກ່າວ, ຄາດວ່າການທົດລອງໃນໄລຍະທີ 3 ນີ້ ຈະເດີນໜ້າສຶກສາຄົ້ນຄວ້າຕໍ່ໄປອີກປະມານ 6 ເດືອນ ແລະ ຈະໄດ້ໃຊ້ວັກຊີນເປັນວົງກວ້າງພາຍໃນປີ 2011 ເຖິງວ່າກ່ອນໜ້ານີ້ໃນໄລຍະເດືອນສິງຫາຜ່ານມາ ທາງການຣັດເຊຍຈະເຄີຍປະກາດອະນຸຍາດໃຫ້ໃຊ້ວັກຊີນດັ່ງກ່າວໃນວົງຈຳກັດ ເຖິງວ່າຈະຍັງບໍ່ສຳເລັດໃນຂັ້ນຕອນການທົດລອງໄລຍະທີ 3 ກໍຕາມ.
