ເສດຖະກິດຫວຽດນາມຍຸກໂຄວິດ-19 ເຕີບໃຫຍ່ສວນທາງທຸກປະເທດໃນອາຊຽນ
ການລະບາດຂອງໂຄວິດ-19 ເຮັດໃຫ້ເສດຖະກິດທົ່ວໂລກຫລຸດຖອຍ, ແຕ່ບໍ່ແມ່ນຫວຽດນາມ ທີ່ຄາດວ່າການເຕີບໃຫຍ່ທາງເສດຖະກິດໃນປີນີ້ອາດຈະຢູ່ໃນສະພາບບວກ ສວນທາງທຸກປະເທດໃນອາຊຽນ ແລະ ອາດຂຶ້ນເປັນປະເທດທີ່ມີການເຕີບໃຫຍ່ທາງເສດຖະກິດສູງທີ່ສຸດປະເທດໜຶ່ງໃນໂລກ ພາຍໃຕ້ວິກິດພະຍາດລະບາດ.
ເປັນຫຍັງ ຫວຽດນາມຈຶ່ງຜ່ານວິກິດຂຶ້ນມາໄດ້ ພວກເຮົາຈະອະທິບາຍສະຫລຸບເປັນ 4 ຂໍ້ດັ່ງນີ້:
- ກອງທຶນການເງິນສາກົນ (IMF) ຕີລາຄາວ່າ: ເສດຖະກິດຫວຽດນາມໃນປີນີ້ອາດຈະມີອັດຕາເຕີບໃຫຍ່ 2,4% ຈາກທີ່ເຄີຍຄາດຄະເນໄວ້ 1,6%. ພ້ອມທັງຕີລາຄາເສດຖະກິດປີໜ້າຂອງຫວຽດນາມອາດຈະເຕີບໃຫຍ່ເຖິງ 6,5% ຖ້າເສດຖະກິດພາຍໃນ ແລະ ຕ່າງປະເທດກັບມາເປັນປົກກະຕິ.
ຕົວເລກການເຕີບໃຫຍ່ທາງເສດຖະກິດຂອງ IMF ເຮັດໃຫ້ຫວຽດນາມອາດເປັນປະເທດດຽວໃນອາຊຽນທີ່ມີການເຕີບໃຫຍ່ທາງເສດຖະກິດໃນປີນີ້ ສວນທາງເສດຖະກິດຂອງສິງກະໂປ ແລະ ມາເລເຊຍທີ່ຄາດວ່າອາດຫລຸດລົງປະມານ 6%.
ນອກຈາກນີ້, ຕົວເລກຫລ້າສຸດຈາກ IMF ອາດເຮັດໃຫ້ຫວຽດນາມກາຍເປັນປະເທດທີ່ມີການເຕີບໃຫຍ່ທາງເສດຖະກິດສູງທີ່ສຸດປະເທດໜຶ່ງໃນໂລກ ທ່າມກາງການລະບາດຂອງໂຄວິດ-19.
- ການເຕີບໃຫຍ່ສວນທາງຂອງຫວຽດນາມມີປັດໄຈຫລາຍຢ່າງກ່ຽວຂ້ອງ ອັນດັບທຳອິດ ການຄວບຄຸມໂຄວິດ-19 ໄດ້ຢ່າງວ່ອງໄວ ແລະ ທ່ວງທັນ ຈົນໄດ້ຮັບສຽງຍ້ອງຍໍຈາກບັນດາປະເທດ ໂດຍປັດຈຸບັນຫວຽດນາມມີຜູ້ຕິດເຊື້ອໂຄວິດ-19 ສະສົມ 1.300 ຄົນ, ມີຜູ້ເສຍຊີວິດ 35 ຄົນ, ຜູ້ຕິດເຊື້ອສ່ວນຫລາຍຫາຍດີແລ້ວ.
ສາເຫດທີ່ຫວຽດນາມຄວບຄຸມໂຄວິດ-19 ໄດ້ດີ ທັງທີ່ບໍ່ມີເຕັກໂນໂລຊີການແພດ ຫລື ລະບົບສາທາລະນະສຸກທີ່ເປັນເລີດ ເມື່ອທຽບໃສ່ປະເທດອື່ນ ມາຈາກຄວາມວ່ອງໄວໃນການອອກນະໂຍບາຍ ນັບແຕ່ການປິດຊາຍແດນກັບປະເທດຈີນບໍ່ດົນຫລັງພົບການລະບາດຂອງໂຄວິດ-19 ໃນຊ່ວງຕົ້ນປີຜ່ານມາ ລວມທັງມາດຕະການປິດເມືອງ ແລະ ກວດພະຍາດກຸ່ມສ່ຽງ ເຮັດໃຫ້ລະບົບເສດຖະກິດໃນປະເທດຂອງຫວຽດນາມກັບມາເປີດໄດ້ໄວ.
- ປັດໄຈທີ່ຕາມມາຄືການຍ້າຍຖານການຜະລິດຂອງບໍລິສັດເອກະຊົນຈາກຈີນເຂົ້າໄປຫວຽດນາມ ໂດຍປາກົດການນີ້ມີມາແຕ່ປີ 2007 ໂດຍເລີ່ມຈາກໂຮງງານທີ່ບໍ່ຕ້ອງໃຊ້ທັກສະແຮງງານຫລາຍເຊັ່ນ: ບັນດາໂຮງງານເສື້ອຜ້າ, ໂຮງງານເກີບທີ່ຍ້າຍອອກຈາກຈີນຫລັງຄ່າແຮງໃນປະເທດຈີນປັບສູງຂຶ້ນ.
ຈົນກະທັ້ງສະຖານະການລະຫວ່າງອາເມລິກາກັບຈີນທີ່ລຸກລາມເປັນສົງຄາມການຄ້າໃນຍຸກປະທານາທິບໍດີ ໂດນັລ ທຣຳ ຍິ່ງເຮັດໃຫ້ຫວຽດນາມເປັນຈຸດໝາຍໃໝ່ຂອງບໍລິສັດດ້ານເຕັກໂນໂລຊີລະດັບໂລກ ເຫັນໄດ້ຈາກແອັບເປິ້ນທີ່ປັດຈຸບັນຜະລິດຫູຟັງ Aiopods ໃນຫວຽດນາມ ລວມທັງຜູ້ຜະລິດອຸປະກອນໄອທີອື່ນໆເຊັ່ນ: ຊຳຊຸງ ແລະ ແອລຈີ ທີ່ໃຊ້ຫວຽດນາມເປັນຖານການຜະລິດ.
ທັງໝົດນີ້ຍັງບໍ່ລວມປັດໄຈທີ່ຫລາຍບໍລິສັດເລືອກຈະຍ້າຍໂຮງງານ ຫລື ຕັ້ງໂຮງງານສາຂາເພີ່ມໃນປະເທດຫວຽດນາມ ຈາກທີ່ເຄີຍຕັ້ງຢູ່ປະເທດຈີນພຽງຢ່າງດຽວ ເພື່ອເປັນການກະຈາຍຄວາມສ່ຽງຫລັງປະສົບບັນຫາບໍ່ສາມາດຜະລິດສິນຄ້າໄດ້ໃນຊ່ວງການລະບາດຂອງໂຄວິດ-19 ພາຍໃນປະເທດຈີນ.
- ທິດທາງອຸດສາຫະກຳຂອງຫວຽດນາມກຳລັງມຸ່ງສູ່ການເປັນຖານການຜະລິດສິນຄ້າເຕັກໂນໂລຊີ ເປັນໂອກາດທີ່ສົດໃສຂອງຫວຽດນາມໃນອະນາຄົດ, ແຕ່ສິ່ງທີ່ກຳລັງທ້າທາຍຫວຽດນາມ ຄືການພັດທະນາຊັບພະຍາກອນທີ່ມີຢູ່ໃຫ້ພ້ອມຮັບການລົງທຶນຄັ້ງໃຫຍ່ ໂດຍສະເພາະຊັບພະຍາກອນບຸກຄົນ.
Navigos Group ບໍລິສັດຈັດຫາງານລາຍໃຫຍ່ຂອງຫວຽດນາມ ລະບຸວ່າ: ບໍລິສັດເຕັກໂນໂລຊີໃນຫວຽດນາມສູງເຖິງ 71% ຢູ່ໃນສະພາບຂາດເຂີນພະນັກງານດ້ານໄອທີ. ເຊັ່ນດຽວກັບທ່ານ ທິງ ຫວຽນ CEO ບໍລິສັດທີ່ປຶກສາດ້ານຊອບແວໃນຫວຽດນາມ ຍອມຮັບວ່າ: ແຮງງານທີ່ມີທັກສະໃນຫວຽດນາມຍັງບໍ່ພຽງພໍກັບຄວາມຕ້ອງການຂອງຕະຫລາດ.
ສ່ວນອີກປັດໄຈທີ່ຖືກເບິ່ງວ່າ ເປັນຄວາມທ້າທາຍໃນອະນາຄົດ ຄືການທີ່ຂະແໜງອຸດສາຫະກຳໃນຫວຽດນາມຍັງບໍ່ສາມາດຜະລິດສິນຄ້າໄດ້ຢ່າງຄົບວົງຈອນ ໂດຍຍັງຕ້ອງອາໄສຊິ້ນສ່ວນອຸປະກອນນຳເຂົ້າຈາກປະເທດຈີນຈຳນວນຫລາຍ.
