ສະຫລອງອະນຸສາວະລີ ພຣະເຈົ້າໄຊຍະເຊດຖາທິຣາດ ທີ່ແຂວງອັດຕະປື

ພິທີມອບ-ຮັບ ແລະ ເປີດນຳໃຊ້ອະນຸສາວະລີ  ພຣະເຈົ້າໄຊຍະເຊດຖາທິຣາດ ມະຫາຣາດ ໄດ້ມີຂຶ້ນໃນວັນທີ 24 ມັງກອນນີ້, ພາຍຫລັງສໍາເລັດການກໍ່ສ້າງສົມບູນແລ້ວ ໂດຍການໃຫ້ກຽດເຂົ້າຮ່ວມຂອງ ທ່ານ ຈູມມະລີ ໄຊຍະສອນ ອະດີດເລຂາທິການໃຫຍ່ຄະນະບໍລິຫານງານສູນກາງພັກ, ອະດີດປະທານປະເທດ ພ້ອມດ້ວຍພັນລະຍາ ແລະ ມີ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ທັງເປັນປະທານຄະນະຊີ້ນຳລະດັບຊາດໂຄງການກໍ່ສ້າງອະນຸສາວະລີ ດັ່ງກ່າວ.

ອະນຸສາວະລີ ສຳຄັນນີ້ຕັ້ງຢູ່ບ້ານຫາດຊາຍຂາວ ເມືອງໄຊເສດຖາ ແຂວງອັດຕະປື ມີມູນຄ່າທັງໝົດ 37 ຕື້ກີບ ເພື່ອເປັນການຈາລຶກຄຸນງາມຄວາມດີ, ເຊີດຊູກຽດສັກສີຂອງວິລະມະ ຫາກະສັດອານາຈັກລາວລ້ານຊ້າງ, ຜູ້ຊົງມີຄວາມປີຊາສາມາດສະຫລາດແຫລມຄົມ ແລະ ອົງອາດກ້າຫານບໍ່ຍອມຈໍານົນ ໃນພິໄຊສົງຄາມ, ຊົງເປັນພຸດທະສາສະນິກກະຊົນອັນລໍ້າເລີດ ເປັນພຣະມະຫາກະສັດຜູ້ຊົງທໍາ ເບິ່ງກວ້າງມອງໄກ, ເປັນແບບຢ່າງອັນດີງາມໃນການປົກປັກຮັກສາ ແລະ ສ້າງສາພັດທະນາບ້ານເມືອງ, ສິລະປະວັດທະນະທໍາ, ຮີດຄອງປະເພນີອັນຈົບງາມຂອງຊາດລາວ ສະເໝືອນດັ່ງແວ່ນແຍງອັນໃສແຈ້ງແກ່ອານາປະຊາລາດ ຕັ້ງແຕ່ບັນພະການສືບມາຈົນເຖິງລູກຫລານ ນັບຫລາຍເຊັ່ນຄົນຈົນເຖິງທຸກວັນນີ້ ແລະ ຊົ່ວກາລະນານ.

ໂຄງການດັ່ງກ່າວປະກອບມີ 2 ໜ້າວຽກໃຫຍ່ຄື:  ຫລໍ່ຮູບປັ້ນພຣະເຈົ້າໄຊຍະເຊດຖາທິຣາດ ຊົງປະທັບຊ້າງ ເຜືອກມຸງຄຸນປະທານພອນ ເຊິ່ງຫລໍ່ດ້ວຍທອງເຫລືອງໜັກ 18 ໂຕນ ແລະ ວຽກກໍ່ສ້າງສະຖາປານິກ-ງານປະຕິມະກໍາລວດລາຍວິຈິດສິນຕ່າງໆ , ໂດຍໃຊ້ເວລາກໍ່ສ້າງມາເຖິງ 30 ເດືອນ.