ປກສ ແຂວງບໍລິຄຳໄຊ ຈັບຂະບວນຄ້າຢາເສບຕິດລາຍໃຫຍ່ ພ້ອມເຮໂຣອິນ 600 ແທ່ງ ແລະ ຢາບ້າ 4.000 ເມັດ

​ແຫ​ລ່ງຂ່າວ ປກສ ​​ແຂວງ​ບໍລິ​ຄຳ​ໄຊ ​ລາຍ​ງານ​ວ່າ: ວັນ​ທີ 7 ກຸມພາ 2021 ປກສ ​ແຂວງ​ບໍລິ​ຄຳ​ໄຊ ​ໄດ້​ສົມທົບ​ກັບ​ພາກສ່ວນ​ກ່ຽວຂ້ອງ​ເຂົ້າປິດ​ລ້ອມ​ເຮືອນ​ເປົ້າໝາຍ​ຄ້າຂາຍ​ຢາ​ເສບ​ຕິດ​ລາຍ​ໃຫຍ່ ຢູ່​ບ້ານ​ໂພນ​ເມືອງ​ນ້ອຍ ​​ເມືອງ​ຄຳ​ເກີດ ​ແຂວງ​ບໍລິ​ຄຳ​ໄຊ, ຜ່ານ​ການ​ກວດຄົ້ນ ພົບ​ເຮ​ໂຣອິນ 600 ​ແທ່ງ ນ້ຳໜັກ 231 ກິ​ໂລ ​ແລະ ຢາ​ບ້າ 4.000 ​ເມັດ ພ້ອມ​ກັກ​ຕົວ​ເປົ້າໝາຍ​ໄດ້ 4 ຄົນ ຊື່​ທ້າວ ​ເບຍ​ເຢ້ຊົ່ງ ອາຍຸ 57 ປີ (​ເຈົ້າຂອງ​ເຮືອນ), ທ້າວ ​ເຢ້ຊົ່ງ ອາຍຸ 34 ປີ, ທ້າວ ​ເນັ່ງ​ຊົ່ງ ອາຍຸ 27 ປີ ​ແລະ ທ້າວ ​ເຊ​ຊົ່ງ ອາຍຸ 21 ປີ ທັງ 4 ຄົນ​ຢູ່​ບ້ານ​ດຽວ​ກັນ.

ຜ່ານ​ການ​ສອບ​ສວນ ​ເບື້ອງຕົ້ນພວກ​ກ່ຽວ​ຮັບ​ສາລະພາບ​ວ່າ: ຢາ​ເສບ​ຕິດ​ດັ່ງກ່າວ​ແມ່ນ​ໄດ້​ຮັບ​ມາ​ຈາກ​ກຸ່ມ​ຮ່ວມ​ຂະ​ບວນການ​ຄ້າຂາຍ​ຢາ​ເສບ​ຕິດ​ນຳ​ກັນ ​ເພື່ອ​ກຽມ​ເອົາ​ຂາຍ​ໃຫ້​ຜູ້​ທີ່​ສັ່ງ​ຊື້​ໄປ​ປະ​ເທດ​ໃກ້​ຄຽງ ​ແຕ່​ມາ​ຖືກ​ຈັບ​ກ່ອນ.

ປັດຈຸບັນເຈົ້າໜ້າທີ່ພວມສືບຕໍ່ສອບສວນ-ສືບສວນ ເພື່ຶອຫາຜູ້ຮ່ວມຂະບວນການມາດຳເນີນຄະດີຕາມລະບຽບກົດໝາຍ.