ຍານ Perseverance ຂອງ NASA ລົງຈອດໃນດາວອັງຄານສຳເລັດ ກ່ອນເລີ່ມພາລະກິດຄົ້ນຫາຮ່ອງຮອຍສິ່ງມີຊີວິດ
ຍານສຳຫລວດ Perseverance ຂອງອົງການບໍລິຫານການບິນ ແລະ ອະວະກາດແຫ່ງຊາດ ຫລື NASA ລົງຈອດໃນພື້ນຜິວດາວອັງຄານຢ່າງປອດໄພ ຫລັງເດີນທາງ 470 ລ້ານກວ່າກິໂລແມັດ ລວມໄລຍະເວລາ 6 ເດືອນກວ່າ ພ້ອມສົ່ງຮູບຖ່າຍໃນດາວອັງຄານຊຸດທຳອິດກັບມາຫາໂລກ.
ສຳລັບພາລະກິດຂອງຍານ Perseverance ຄືການຄົ້ນຫາສັນຍານຂອງສິ່ງມີຊີວິດບູຮານ ໂດຍຈະມີການບັນທຶກສຽງໃນດາວອັງຄານເປັນຄັ້ງທຳອິດຂອງມະນຸດ.
ຈຸດທີ່ຍານລົງຈອດນັ້ນເປັນປ່ອງລຶກໃກ້ເສັ້ນສູນສູດຂອງດາວເຄາະທີ່ເອີ້ນວ່າ Jezero ເຊິ່ງຄາດວ່າເປັນແອ່ງທະເລສາບບູຮານເມື່ອ 3,9 ພັນລ້ານປີກ່ອນ ໂດຍຈະມີການຄົ້ນຫາໄມໂຄຣຟໍຊິວໃນຫີນ ແລະ ດິນຂອງດາວອັງຄານ ເຊິ່ງຍານໂຣເວີ Perseverance ຈະໃຊ້ເວລາ 2 ປີໃນການຂຸດເຈາະ ຈາກນັ້ນຈະນຳເອົາຕົວຢ່າງເດີນທາງກັບສູ່ໂລກພາຍໃນຕົ້ນທົດສະວັດ 2030.
