ໂຈະການບິນຂອງເຮືອບິນ “ໂບອິ້ງ 777” ເຮືອບິນລຸ້ນໄຟໄໝ້ກາງອາກາດ
ສາຍການບິນຢູໄນເຕັດ ແອລາຍ ລະບຸວ່າ: ປັດຈຸບັນໄດ້ໂຈະການຂຶ້ນບິນຂອງເຮືອບິນໂບອິ້ງ 777 ທັງໝົດ 24 ລຳ ຫລັງຈາກເຮືອບິນລຸ້ນດັ່ງກ່າວເກີດເຫດເຄື່ອງຈັກຢູ່ປີກຂວາໄຟໄໝ້ ຫລັງຈາກຂຶ້ນບິນໄດ້ບໍ່ດົນ, ແຕ່ເຄາະດີ ນັກບິນສາມາດນຳເອົາເຮືອບິນລົງຈອດສຸກເສີນໄດ້ທັນ ບໍ່ມີຜູ້ບາດເຈັບ ຫລື ເສຍຊີວິດ.
ຖ້ຽວບິນທີ່ເຄື່ອງຈັກໄຟໝ້ ມີຜູ້ໂດຍສານ 231 ຄົນ, ຈຸບິນ 10 ຄົນ ເກີດເຫດຂຶ້ນຂະນະທີ່ເຮືອບິນຂຶ້ນຈາກສະໜາມບິນເດນເວີ ໃນອາເມລິກາ ໄດ້ບໍ່ດົນ. ການໄໝ້ຂອງເຄື່ອງຈັກສ້າງຄວາມແຕກຕື່ນໃຫ້ຜູ້ໂດຍສານ ແລະ ຍັງເຮັດໃຫ້ຊາກເຮືອບິນຕົກລົງໄປໃນພື້ນດິນ ໃກ້ກັບເຂດທີ່ຢູ່ອາໄສ.
ຂະນະດຽວກັນ, ຍີ່ປຸ່ນໄດ້ສັ່ງໃຫ້ທຸກສາຍການບິນໂຈະການຂຶ້ນບິນຂອງໂບອິ້ງ 777 ທີ່ໃຊ້ເຄື່ອງຈັກ “ແພຣດ ແອນ ວິດນີ 4000” ແບບດຽວກັບລຸ້ນທີ່ມີບັນຫາ.
ສ່ວນບໍລິສັດ ໂບອິ້ງ ກ່າວສະໜັບສະໜູນການຕັດສິນໃຈຂອງຍີ່ປຸ່ນ. ຂະນະທີ່ບໍລິສັດໄດ້ກວດສອບເຮືອບິນລຸ້ນດັ່ງກ່າວ. ມີຂໍ້ມູນວ່າ: ປັດຈຸບັນທົ່ວໂລກໃຊ້ເຮືອບິນລຸ້ນນີ້ໃຫ້ບໍລິການປະມານ 69 ລຳ.
ສ່ວນອົງການບໍລິຫານການບິນແຫ່ງຊາດອາເມລິກາ ຫລື FAA ບອກວ່າ: ຢູ່ອາເມລິກາມີພຽງສາຍການບິນຢູໄນເຕັດ ແອລາຍ ທີ່ໃຊ້ເຮືອບິນລຸ້ນນີ້. ນອກນັ້ນ ເຮືອບິນລຸ້ນດັ່ງກ່າວໃຫ້ບໍລິການຢູ່ໃນຍີ່ປຸ່ນ ແລະ ສ.ເກົາຫລີ.
