ເກົາຫຼີເໜືອ ທົດລອງອາວຸດເປັນຄັ້ງທຳອິດ ພາຍຫລັງທີ່ ລັດຖະບານໄບເດັນ ຂອງອາເມລິກາຂຶ້ນກັບຕຳແໜ່ງ

ສຳນັກຂ່າວ ຊີເອັນບີຊີ ລາຍງານ ວັນທີ 24 ມີນານີ້ວ່າ ຕອນຄຳ່ມືດຂອງວັນທີ 23 ມີນາ ທີ່ນະຄອນພຽງຢາງໄດ້ຍິງລູກສອນໄຟ ຄາດວ່າເປັນລູກສອນໄຟລະດັບນ້ອຍ ຫຼື ອາດແມ່ນລູກສອນໄຟ ຕິດຫົວຮົບນຳວິຖີ ແຕ່ບໍ່ໄດ້ລະບຸລະອຽດວ່າ ຍິງຂຶ້ນຢູ່ໃສ ແລະ ມີຄວາມສຳເລັດແນວໃດ.

ສຳນັກຂ່າວ ຊີເອັນບີຊີ ໃຫ້ຮູ້ວ່າ ການຍິງທົດລອງລູກສອນໄຟຂອງ ເກົາຫຼີເໜືອ ມີຂຶ້ນໃນທ່າມກາງທີ່ ນະຄອນພຽງຢາງ ບໍ່ຫົວຊາກັບຄຳເຊື້ອເຊີນເຂົ້າຮ່ວມເຈລະຈາບັນຫາອາວຸດນິວເຄລຍໃນແຫຼມເກົາຫຼີ ຂອງວໍຊິງຕັນ ແລະ ໃນທ່າມກາງການຊ້ອມຮົບຄັ້ງໃຫຍ່ລະຫວ່າງສະຫະລັດກັບເກົາຫຼີໃຕ້.

ບັນດານັກສັງເກດການໃຫ້ຄຳເຫັນວ່າ ການຍິງທົດລອງອາວຸດຂອງເກົາຫຼີເໜືອ ຄັ້ງນີ້ ເຖິງແມ່ນຈະໜ້ອຍແຕ່ມັນກໍເປັນການບົ່ງບອກເຖິງ ປະທານາທິບໍດີ ໄບເດັນ ວ່າ ກອງທັບຂອງເກົາຫຼີເໜືອ ຈະມີການພັດທະນາຂຶ້ນເລື້ອຍໆ.

ຮອງລັດຖະມົນຕີກະຊວງການຕ່າງປະເທດຂອງ ເກົາຫຼີເໜືອ ທ່ານ Choe Son Hui ກ່າວເມື່ອວັນທີ 18 ມີນານີ້ວ່າ: “ພວກເຮົາປະກາດແລ້ວວ່າ ພວກເຮົາຈະບໍ່ພົບປະສົນທະນາກັບສະຫະລັດ ຈະແມ່ນຮູບການໃດກໍຕາມ, ເວັ້ນເສຍແຕ່ສະຫະລັດຫາກປະລະນະໂຍບາຍເປັນປໍລະປັກກັບ ເກົາຫຼີເໜືອ ເທົ່ານັ້ນ”