ກຳປູເຈຍຕັ້ງເປົ້າສັກວັກຊີນປ້ອງກັນໂຄວິດ-19 ໃຫ້ປະຊາຊົນ 1 ລ້ານໂດສຕໍ່ເດືອນ
ວັນທີ 29 ມີນາ, ທ່ານ ຮຸນເຊນ ນາຍົກລັດຖະມົນຕີກຳປູເຈຍ ເປີດເຜີຍວ່າ: ກຳປູເຈຍຕັ້ງເປົ້າໝາຍສັກວັກຊີນປ້ອງກັນພະຍາດຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ໃຫ້ປະຊາຊົນ 1 ລ້ານໂດສຕໍ່ເດືອນ.
ການດຳເນີນນີ້ມີຂຶ້ນຫລັງຈາກວັກຊີນປ້ອງກັນພະຍາດໂຄວິດ-19 ຊຸດໃໝ່ທີ່ກຳປູເຈຍສັ່ງຊື້ຈາກບໍລິສັດ Sinovac Biotech ຂອງຈີນ ແລະ ຖືກຂົນສົ່ງເຖິງປະເທດເມື່ອວັນທີ 26 ມີນາຜ່ານມາ.
ທັງນີ້, ກຳປູເຈຍເລີ່ມໂຄງການສັກວັກຊີນປ້ອງກັນພະຍາດໂຄວິດ-19 ເມື່ອວັນທີ 10 ກຸມພາຜ່ານມາ ໂດຍໄລ່ຮອດວັນທີ 28 ມີນາ ກຳປູເຈຍສັກວັກຊີນໃຫ້ປະຊາຊົນກຸ່ມສ່ຽງແລ້ວ 383.400 ຄົນ.
ທ່ານ ຮຸນເຊນ ກ່າວວ່າ: ກຳປູເຈຍວາງແຜນສັກວັກຊີນໃຫ້ປະຊາຊົນຢ່າງໜ້ອຍ 10 ລ້ານຄົນຈາກທັງໝົດ 16 ລ້ານຄົນ.
ວັນທີ 29 ມີນາ, ກະຊວງສາທາລະນະສຸກຂອງກຳປູເຈຍລະບຸວ່າ: ກຳປູເຈຍກວດພົບຜູ້ຕິດເຊື້ອໂຄວິດ-19 ສະສົມ 2.273 ຄົນ ໂດຍມີຜູ້ຫາຍດີ 1.172 ຄົນ ແລະ ເສຍຊີວິດ 11 ຄົນ.
ອ້າງອີງ: ສຳນັກຂ່າວຊິນຮົວ
