ສປປ ເກົາຫລີ ຈະບໍ່ເຂົ້າຮ່ວມແຂ່ງຂັນໂຕກຽວ ໂອລິມປິກ ໃນປີນີ້ ເນື່ອງຈາກຄວາມກັງວົນຕໍ່ວິກິດການແຜ່ລະບາດຂອງໂຄວິດ-19
ສປປ ເກົາຫລີ ຈະກາຍເປັນປະເທດທຳອິດທີ່ບໍ່ເຂົ້າຮ່ວມແຂ່ງຂັນໂອລິມປິກ ເນື່ອງຈາກວິກິດການແຜ່ລະບາດຂອງໂຄວິດ-19 ຫລັງຈາກສື່ກິລາທ້ອງຖິ່ນຂອງ ສປປ ເກົາຫລີ ລາຍງານວ່າ: ຈະບໍ່ເຂົ້າຮ່ວມແຂ່ງຂັນໂຕກຽວ ໂອລິມປິກ ໃນປີນີ້ ເນື່ອງຈາກຄວາມກັງວົນຕໍ່ວິກິດການແຜ່ລະບາດ.
ໂດຍຈາກລາຍງານຂອງສື່ຕ່າງປະເທດລະບຸວ່າ: ການຕັດສິນໃຈບໍ່ເຂົ້າຮ່ວມໂອລິມປິກຂອງ ສປປ ເກົາຫລີ ເກີດຂຶ້ນເມື່ອວັນທີ 25 ມີນາຜ່ານມາ ຈາກຄະນະກຳມະການໂອລິມປິກພາຍໃນປະເທດ ໂດຍໃຫ້ເຫດຜົນວ່າຕ້ອງການຈະປົກປ້ອງນັກກິລາໃນຊ່ວງວິກິດການແຜ່ລະບາດທົ່ວໂລກ.
ສຳລັບການແຂ່ງຂັນໂຕກຽວ ໂອລິມປິກ ທີ່ກຳລັງຈະແຂ່ງຂັນລະຫວ່າງວັນທີ 23 ກໍລະກົດ – 8 ສິງຫາປີນີ້ ຖືເປັນໜຶ່ງໃນໂອກາດສຳຄັນທີ່ທ່ານ ກິມຈອງອູນ ຜູ້ນຳ ສປປ ເກົາຫລີ ຈະສື່ສານທາງການທູດຜ່ານມະຫາກຳກິລາກັບປະເທດມະຫາອຳນາດຕ່າງໆ ໂດຍກ່ອນໜ້ານີ້ ປະທານາທິບໍດີ ມຸນແຈອິນ ຂອງ ສ.ເກົາຫລີ ໄດ້ໃຫ້ສຳພາດວ່າ: ຕ້ອງການໃຫ້ໂຕກຽວ ໂອລິມປິກ ເປັນຂົວເຊື່ອມການພົວພັນລະຫວ່າງ ສປປ ເກົາຫລີ – ສ.ເກົາຫລີ.
ແຕ່ທ່ານ ກິມຈອງອູນ ເຊິ່ງກ່ອນໜ້ານີ້ໄດ້ໃຊ້ມາດຕະການປ້ອງກັນການແຜ່ລະບາດຂອງໂຄວິດ-19 ຢ່າງເຂັ້ມງວດພາຍໃນປະເທດ, ຫລ້າສຸດມີລາຍງານວ່າ ສປປ ເກົາຫລີ ຈະບໍ່ເຂົ້າຮ່ວມການແຂ່ງຂັນໂອລິມປິກຢ່າງເປັນທາງການແລ້ວ.
ອ້າງອີງ: https://www.bloomberg.com/…/north-korea-says-it-ll-skip…
