ປີ​ໃໝ່​ຂໍ​ໃຫ້​ມີ​ໂຊກ​ມີ​ໄຊ​ຜ່ານ​ພົ້ນພະຍັນຕະລາຍ​ທັງ​ປວງ

- 6 1 - ປີ​ໃໝ່​ຂໍ​ໃຫ້​ມີ​ໂຊກ​ມີ​ໄຊ​ຜ່ານ​ພົ້ນພະຍັນຕະລາຍ​ທັງ​ປວງ
- Untitled design - ປີ​ໃໝ່​ຂໍ​ໃຫ້​ມີ​ໂຊກ​ມີ​ໄຊ​ຜ່ານ​ພົ້ນພະຍັນຕະລາຍ​ທັງ​ປວງ

ໂດຍ: ທິດ​ກໍ່າ

​ເທົ່າ​ທີ່​ໄດ້​ຕິດຕາມ​ສະຖານະ​ການບ້ານ​ເມືອງ​ມາ, ພໍ​ແຕ່​ກ້າວ​ເຂົ້າສູ່​ປີ 2021 ​ເປັນຕົ້ນມາ ປະ​ເທດ​ຊາດ​ຂອງ​ພວກ​ເຮົາ​ກໍ​ໄດ້​ຮັບ​ໂຊກ ​ແລະ ມີ​ໄຊຊະນະ​ຢ່າງ​ໃຫຍ່​ຫລວງ​ທາງ​ດ້ານ​ການ​ເມືອງ ນັບ​ທັງ​ເສດຖະກິດ-ສັງຄົມ​ກໍ​ໄດ້​ຮັບ​ການ​ພັດທະນາ​ຢ່າງ​ບໍ່​ຢຸດ​ຢັ້ງ. ສະ​ເພາະ​ທາງ​ດ້ານ​ການ​ເມືອງ ​ໃນ​ວັນ​ທີ 13 ຫາ ວັນ​ທີ 15 ມັງກອນ 2021 ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງທີ XI ຂອງ​ພັກ​ປະຊາຊົນ​ປະຕິວັດ​ລາວ​ກໍ​ໄດ້​ໄຂ​ຂຶ້ນຢ່າງ​ເປັນ​ທາງ​ການ ​ແລະ ສະຫງ່າ​ຜ່າ​ເຜີຍ. ຜົນສຳ​ເລັດ​ຂອງ​ກອງ​ປະຊຸມ​ໃຫຍ່​ຄັ້ງນີ້​ແມ່ນ​ໄດ້​ເລືອກ​ຕັ້ງ​ເອົາ​ສະຫາຍ ທອງ​ລຸນ ສີ​ສຸ​ລິດ ​ເປັນ​ເລຂາທິການ​ໃຫຍ່ ຄະນະ​ບໍລິຫານ​ງານ​ສູນ​ກາງ​ພັກປະຊາຊົນ​ປະຕິວັດ​ລາວ ສະ​ໄໝ​ທີ XI. ນອກຈາກ​ນັ້ນ ກໍ​ໄດ້​ເລືອກ​ຕັ້ງ​ເອົາ​ກົມ​ການ​ເມືອງ​ຈຳນວນ 13 ສະຫາຍ, ຄະນະ​ເລຂາທິການ​ສູນ​ກາງ​ພັກ 9 ສະຫາຍ, ກຳມະການ​ສູນ​ກາງ​ພັກ 71 ສະຫາຍ ​ແລະ ກຳມະການ​ສຳຮອງ​ສູນ​ກາງ​ພັກ 10 ສະຫາຍ. ກອງ​ປະຊຸມ​ໃຫຍ່​ຍັງ​ໄດ້​ເປັນ​ເອກະສັນ​ເລືອກ​ເອົາ ສະຫາຍ ບຸນ​ທອງ ຈິດ​ມະນີ ​ເປັນ​ຜູ້​ປະຈຳການ​ຄະນະ​ເລຂາທິການ​ສູນ​ກາງ​ພັກ, ​ເລືອກ​ເອົາ​ສະຫາຍ ຄຳ​ພັນ ພົມ​ມະ​ທັດ ​ເປັນ​ປະທານ​ກວດກາ​ສູນ​ກາງ​ພັກ. ອັນ​ທີ່​ພິ​ເສດ​ສຸດ​ກໍ​ແມ່ນ​ກອງ​ປະຊຸມ​ໄດ້​ລາຍ​ງານ​ການ​ເຄື່ອນ​ໄຫວ​ຂອງ​ພັກ​ໃນ 5 ປີ ຂອງ​ຄະນະ​ບໍລິຫານ​ງານ​ສູນ​ກາງ​ພັກ​ຄັ້ງທີ X ຜ່ານ​ມາ ​ແລະ ວາງ​ວິ​ໄສ​ທັດ​ການ​ເຄື່ອນ​ໄຫວ​ໃນ 5 ປີ​ຕໍ່ໜ້າ (2021-2025) ພ້ອມ​ທັງ​ມີ​ມະຕິ​ຄັ້ງທີ XI ຂອງ​ພັກ ​ເພື່ອ​ກຳນົດ​ທິດ​ທາງ​ເດີນ​ຂອງ​ພັກ​ຢ່າງ​ຄົບ​ຖ້ວນ​ສົມບູນ ​ແລະ ຈະ​ແຈ້ງ.

ພາຍຫລັງ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ​ຄັ້ງທີ XI ຂອງ​ພັກ​ໄດ້​ສຳ​ເລັດ​ເສັດ​ສິ້ນລົງ, ມາ​ໃນ​ວັນ​ທີ 22 ຫາ ວັນ​ທີ 26 ມີນາ 2021 ກອງ​ປະຊຸມ​ຄັ້ງປະຖົມ​ມະ​ລືກ​ຂອງ​ສະພາ​ແຫ່ງ​ຊາດ ຊຸດ​ທີ IX ກໍ​ໄດ້​ໄຂ​ຂຶ້ນຢ່າງ​ເປັນ​ທາງ​ການ ​ແລະ ສະຫງ່າ​ຜ່າ​ເຜີຍ. ຈາກ​ຜົນສຳ​ເລັດ​ຂອງ​ກອງ​ປະຊຸມ​ຄັ້ງນີ້ ກໍ​ໄດ້​ເລືອກ​ຕັ້ງ​ເອົາ​ທ່ານ ທອງ​ລຸນ ສີ​ສຸ​ລິດ ​ເປັນ​ປະທານ​ປະ​ເທດ, ​ເລືອກ​ຕັ້ງ​ເອົາ​ທ່ານ ພັນ​ຄຳ ວິພາ​ວັນ ​ເປັນ​ນາຍົກລັດຖະມົນຕີ ​ແລະ ​ເລືອກ​ເອົາ​ທ່ານ ​ໄຊ​ສົມ​ພອນ ພົມວິຫານ ​ເປັນ​ປະທານ​ສະພາ​ແຫ່ງ​ຊາດ ນັບ​ທັງ​ປະກອບ​ບຸກຄະລາ​ກອນ​ເຂົ້າ​ໃນ​ກົງຈັກ​ບໍລິຫານ​ຂອງ​ສະພາ​ແຫ່ງ​ຊາດ ​ແລະ ກົງຈັກ​ບໍລິຫານ​ຂອງ​ລັດຖະບານ​ຊຸດ​ທີ IX ຢ່າງ​ມາດຕະຖານ​ສົມບູນ ​ແລະ ຄົບ​ຖ້ວນ.

ນີ້​ຄື​ໝາກຜົນ ​ແລະ ​ໄຊຊະນະ​ແຫ່ງ​ການ​ເຄື່ອນ​ໄຫວ​ທາງ​ດ້ານ​ການ​ເມືອງ​ຂອງ​ພັກ ​ແລະ ລັດຖະບານ​ເຮົາ. ​ໂອກາດ​ກ້າວ​ເຂົ້າສູ່​ປີ​ໃໝ່​ສາກົນ 2021 ​ແລະ ກ້າວ​ສູ່​ປີ​ໃໝ່​ລາວ 2564 ຂອງ​ພັກ ກໍ​ຄື​ຂອງ​ຊາດ​ໃນ​ປີ 2021 ​ແລະ 5 ປີ​ຕໍ່ໜ້າ (2021-2025) ຂອງ​ຊາດ ​ແລະ ຂອງ​ພັກ. ອີກ​ປະການ​ໜຶ່ງ ​ໃນ​ປັດ​ໄຈ​ໃໝ່ໆ​ທີ່​ມີ​ການ​ປ່ຽນ​ແປງ​ໃນ​ກົງຈັກ​ບໍລິຫານ​ຂອງ​ພັກ ​ແລະ ຂອງ​ລັດ ກໍ​ຄື​ຂອງ​ຊາດ​ທີ່​ປະຊາຊົນ​ບັນດາ​ເຜົ່າ​ເຂົາ​ມີ​ຄວາມ​ພາກພູມ​ໃຈ​ທີ່​ສຸດ​ນັ້ນ ກໍ​ຄື​ໄດ້​ຜູ້ນຳ​ທີ່​ມີ​ຄວາມ​ຈົງ​ຮັກ​ພັກດີ​ຕໍ່​ຊາດ ​ແລະ ຕໍ່​ຜົນ​ປະ​ໂຫຍ​ດຂອງ​ປະຊາຊົນ​ຢ່າງ​ແທ້​ຈິງ ທັງ​ຈະ​ເປັນ​ຜູ້​ເຮັດ​ແທ້​ທຳ​ຈິງ ​ເພື່ອ​ຜົນ​ປະ​ໂຫຍ​ດຂອງ​ຊາດ ​ແລະ ຂອງ​ປະຊາຊົນ ​ເຊິ່ງ​ໃນ​ເບື້ອງຕົ້ນ​ແມ່ນ​ເຫັນ​ໄດ້​ຈາກ​ຄຳ​ເວົ້າ ​ແລະ ພຶດຕິ​ກຳ​ຕົວ​ຈິງ​ໃນ​ຜ່ານ​ມາ​ຂອງ​ສອງ​ທ່ານ​ທີ່​ເປັນ​ຜູ້ນຳ​ສູງ​ສຸດ​ຂອງ​ປະ​ເທດ. ​ໃນ​ໂອກາດ​ຮັບ​ຕຳ​ແໜ່​ງ​ໃໝ່ ທ່ານ​ປະທານ​ປະ​ເທດ ທອງ​ລຸນ ສີ​ສຸ​ລິດ ​ໄດ້​ກ່າວ​ວ່າ: “ຂ້າພະ​ເຈົ້າຈະ​ຈົງ​ຮັກ​ພັກດີ, ຊື່ສັດ, ບໍລິສຸດ​ຕໍ່​ປະ​ເທດ​ຊາດ ​ແລະ ຕໍ່​ປະຊາຊົນ​ບັນດາ​ເຜົ່າ, ຈະ​ຮ່ວມ​ກັນ​ກັບ​ການ​ນຳ​ຂອງ​ພັກ ​ແລະ ລັດ​ເຮັດ​ທຸກ​ສິ່ງ​ທຸກ​ຢ່າງ​ເພື່ອ​ສ້າງ​ເງື່ອນ​ໄຂ ​ແລະ ຮັບປະກັນ​ໃຫ້​ປະ​ເທດ​ຊາດ​ຂອງ​ພວກ​ເຮົາ​ມີ​ສະຖຽນ​ລະ​ພາບ, ມີ​ຄວາມ​ສະຫງົບ​ປອດ​ໄພ, ​ເສດຖະກິດ-ສັງຄົມ​ໄດ້​ຮັບ​ການ​ພັດທະນາ​ຢ່າງ​ບໍ່​ຢຸດ​ຢັ້ງ, ຍົກ​ລະດັບ​ຄຸນ​ນະພາ​ບຊີວິດ​ຂອງ​ປະຊາຊົນ​ໃຫ້​ນັບ​ມື້ສູງ​ຂຶ້ນ”. ສ່ວນ​ທ່ານ​ນາຍົກລັດຖະມົນຕີ ພັນ​ຄຳ ວິພາ​ວັນ ກໍ​ໄດ້​ກ່າວ​ວ່າ: “​ເພື່ອ​ຮັບປະກັນ ​ແລະ ປະຕິບັດ​ໜ້າ​ທີ່​ໃຫ້​ບັນລຸ​ຜົນສຳ​ເລັດ​ຕາມ​ຄາດໝາຍ​ທີ່​ວາງ​ໄວ້​ນັ້ນ, ຂ້າພະ​ເຈົ້າຂໍ​ນ້ອມ​ຮັບ​ເອົາ​ຄວາມ​ເຊື່ອ​ໝັ້ນ​ໄວ້​ວາງ​ໃຈ​ຂອງ​ບັນດາ​ທ່ານ​ສະມາຊິກ​ສະພາ​ແຫ່ງ​ຊາດ ກໍ​ຄື​ຄວາມ​ມຸ້ງ​ຫວັງ​ຂອງ​ປະຊາຊົນ​ບັນດາ​ເຜົ່າ​ທີ່​ຢາ​ກ​ໃຫ້​ລັດຖະບານ​ຊຸດ​ທີ IX ​ເປັນ​ລັດຖະບານ​ທີ່​ເວົ້າ​ແທ້​ທຳ​ຈິງ, ດຸ​ໝັ່ນ, ຊື່ສັດ, ປະຢັດ​ອົດທົນ ​ແລະ ​ເພື່ອ​ປະຊາຊົນ”. ນອກຈາກ​ນັ້ນ ກໍ​ຍັງ​ມີ​ປະ​ໂຫຍ​ກຄຳ​ເວົ້າອື່ນໆ​ທີ່​ສ້າງ​ຄວາມ​ຫວັງ​ໃຫ້​ປະຊາຊົນ​ບັນດາ​ເຜົ່າ​ໃນ​ທົ່ວ​ປະ​ເທດ. ປີ 2021 ກໍ​ຄື​ປີ​ໃໝ່​ລາວ 2564 ຂໍ​ໃຫ້​ປະ​ເທດ​ຊາດ​ອັນ​ແສນ​ຮັກ​ຂອງ​ພວກ​ເຮົາ​ມີ​ໂຊກ​ມີ​ໄຊ ​ແລະ ຜ່ານ​ພົ້ນພະຍັນຕະລາຍ​ທັງ​ປວງ​ດ້ວຍ​ເຖີດ !.

- Wave100S AD to Website 2020 0 - ປີ​ໃໝ່​ຂໍ​ໃຫ້​ມີ​ໂຊກ​ມີ​ໄຊ​ຜ່ານ​ພົ້ນພະຍັນຕະລາຍ​ທັງ​ປວງ

 

- WhatsApp Image 2020 05 27 at 5 - ປີ​ໃໝ່​ຂໍ​ໃຫ້​ມີ​ໂຊກ​ມີ​ໄຊ​ຜ່ານ​ພົ້ນພະຍັນຕະລາຍ​ທັງ​ປວງ
- WhatsApp Image 2020 05 27 at 5 - ປີ​ໃໝ່​ຂໍ​ໃຫ້​ມີ​ໂຊກ​ມີ​ໄຊ​ຜ່ານ​ພົ້ນພະຍັນຕະລາຍ​ທັງ​ປວງ
error: Alert: ເນື້ອຫາຂ່າວມີລິຂະສິດ !!