ຜູ້ທີ່ຈະສືບທອດປ່ຽນແທນ ນາຍົກລັດຖະມົນຕີ ສິງກະໂປ ປະກາດຖອນຕົວຢ່າງກະທັນຫັນ

ຂ່າວຕ່າງປະເທດ, ວັນທີ 9 ເມສານິີ້ ໃຫ້ຮູ້ວ່າທ່ານ ຮອງນາຍົກລັດຖະມົນຕີ ສິງກະໂປ Heng Swee Keat ຊຶ່ງຜູ້ທີ່ໄດ້ຮັບຂະໜານນາມວ່າ ຈະເປັນຜູ້ນັ່ງຕັ່ງນາຍົກລັດຖະມົນຕີ ປ່ຽນແທນ ທ່ານ Lee Hsien Loong ໄດ້ປະກາດວ່າ ຈະບໍ່ຮັບເອົາຕຳແໜ່ງເປັນຜູ້ນຳ ລຸ່ນທີ 4 ຂອງສິງກະໂປ ນັບແຕ່ວັນທີ 8 ເມສາເປັນຕົ້ນໄປ.

ທ່ານຮອງນາຍົກລັດຖະມົນຕີຄົນນີ້, ປີນີ້ມີອາຍຸ 60 ປີ, ຊຶ່ງມີຄວາມຫວັງວ່າຈະກາຍເປັນນາຍົກລັດຖະມົນຕີ ຄົນຕໍ່ໄປຂອງສິງກະໂປ ເພື່ອປ່ຽນແທນທ່ານ Lee Hsien Loong.

ທ່ານ Lee Hsien Loong ຄາດວ່າຈະນຳພາປະເທດສິງກະໃຫ້ໂປພົ້ນອອກຈາກການລະບາດຂອງໂຄວິດ-19 ໄດ້ແລ້ວ ກໍຈະມອບຄວາມຮັບຜິດຊອບໃຫ້ກັບລຸ່ນສືບທອດຕໍ່ໄປ.

ໃນຈົດໝາຍລາອອກໃນວັນທີ 8 ເມສາ ຂອງເຂົານັ້ນ ໄດ້ເວົ້າເຖິງບັນຫາໂຄວິດ-19 ແລະ ເວົ້າວ່າ ຕົນເອງບໍ່ມີເວລາທີ່ພຽງພໍທີ່ຈະເຮັດວຽກໃຫ້ກັບສິງກະໂປ. ທ່ານກ່າວວ່າ “ຖ້າລໍຖ້າໃຫ້ໂຄວິດ-19 ໝົດໄປ, ເຖິງເວລານັ້ນຂ້າພະເຈົ້າກໍຈະມີອາຍຸ 65 ປີແລ້ວ”. ທ່ານສົມທຽບການເປັນນາຍົກລັດຖະມົນຕີຂອງ 3 ທ່ານທີ່ຜ່ານມາ ລ້ວນແຕ່ເລີ່ມຕົ້ນຢູ່ໃນໄວອາຍຸເກືອບ 50 ປີ ເທົ່ານັ້ນ.

ສຳນັກຂ່າວ Channel News Asia (CNA) ໃຫ້ຮູ້ວ່າ ການປະກາດລາອອກຂອງທ່ານ Heng Swee Keat ໄດ້ສ້າງຄວາມຜິດຫວັງໃຫ້ກັບຊາວສິງກະໂປຫຼາຍຄົນ ແລະ ຍັງມີຄວາມເປັນຫວ່ງວ່າຈະສ້າງຜົນກະທົບຕໍ່ພາບພົດຂອງພັກ ປະຕິບັດການຂອງປະຊາຊົນ(PAP) ເປັນຢ່າງຍິ່ງ. ເຖິງຢ່າງໃດກໍຕາມ ທ່ານ Lee Hsien Loong ຍັງຢືນຢັນວ່າ ທ່ານ Heng Swee Keat ຍັງຈະເປັນຜູ້ຊ່ວຍວຽກນຳເບີ 1 ຂອງເລຂາທີການພັກ PAP, ໝາຍຄວາມວ່າເປັນຜູ້ຊ່ວຍວຽກຂອງ Lee Hsien Loong ໂດຍກົງ.