ນະຄອນຫລວງວຽງຈັນ ເຂັ້ມງວດຂຶ້ນການສັນຈອນເພີ່ມປ້ອງກັນການລະບາດຂອງພະຍາດໂຄວິດ-19

ພະແນກໂຍທາທິການ ແລະ ຂົນສົ່ງ (ຍທຂ), ນະຄອນຫລວງວຽງຈັນ ອອກແຈ້ງການ ເລກທີ 3051/ຍທຂ,ນວ, ວັນທີ 28 ເມສາ 2021 ເຖິງບັນດາບໍລິສັດ, ລັດວິສາຫະກິດ, ຫ້າງຮ້ານ,ພະນັກງານ, ທະຫານ, ຕຳຫລວດ ຕະຫລອດຮອດພໍ່ແມ່ປະຊາຊົນ ຜູ້ນຳໃຊ້ລົດໃຊ້ຖະໜົນໃນທົ່ວນະຄອນ ຫລວງວຽງຈັນ ເລື່ອງການຄວບຄຸມການຂົນສົ່ງຊົ່ວຄາວ ຂອງພາຫະນະລົດບັນທຸກຫີນແຮ່, ຊາຍ, ດິນທຸກປະເພດລວມທັງການຂົນສົ່ງວັດສະດຸກໍ່ສ້າງທົ່ວໄປທົ່ວໄປ ແລະ ເຄື່ອງອຸປະໂພກ, ບໍລິໂພກ ທີ່ຮັບຈາກສາງ ລວມທັງລົດບັນທຸກນ້ຳມັນ ພາຍໃນນະຄອນຫລວງວຽງຈັນ.

ເພື່ອເປັນການຈັດຕັ້ງຜັນຂະຫຍາຍ ຄໍາສັ່ງຂອງນາຍຍົກລັດຖະມົນຕີ, ຄຳສັ່ງແນະນຳຂອງເຈົ້າຄອງນະຄອນຫລວງວຽງຈັນ ແລະ ແຈ້ງການຂອງລັດຖະມົນຕີ ໃນການສະກັດກັ້ນ, ຄວບຄຸມກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19, ພະແນກ ຍທຂ ນະຄອນຫລວງວຽງຈັນ ແຈ້ງມາຍັງພາກສ່ວນກ່ຽວຂ້ອງຮັບຊາບດັ່ງນີ້:

1. ສໍາລັບພາຫະນະ ການຂົນສົ່ງສິນຄ້າພາຍໃນ ແລະ ລະຫວ່າງເມືອງຕໍ່ເມືອງ ບ້ານຕໍ່ບ້ານສາ ມາດດໍາເນີນປົກະຕິ ຫລື ໂຄງການເລັ່ງດ່ວນລວມທັງຫີນແຮ່, ຊາຍ, ດິນທຸກປະເພດ ແລະ ລົດຂົນສົ່ງນ້ຳ ມັນ ທີ່ແລ່ນຕາມສາຍທາງຂອບເຂດນະຄອນຫລວງວຽງຈັນ ແມ່ນສາມາດການຂົນສົ່ງປົກກະຕິໄດ້ ແຕ່ຈະຕ້ອງມີແຜນການຂົນສົ່ງ ກຳນົດເສັ້ນທາງແລ່ນລະອຽດ ໂດຍການແຈ້ງຈຳນວນພາຫະນະ ຊື່ຄົນຂັບລົດພ້ອມທັງມີມາດຕະການປ້ອງກັນ ແລະ ສະກັດກັ້ນພະຍາດໂຄວິດ-19 ຢ່າງລະອຽດ ເພື່ອສະເໜີຕໍ່ໜ່ວຍສະເພາະກິດ ຕ້ານພະຍາດໂຄວິດ 19 ຂອງແຕ່ລະເມືອງ ຕາມສາຍທາງທີ່ການຂົນສົ່ງແລ່ນຜ່ານ.

2. ບັນດາລົດຂົນສົ່ງສິນຄ້າເຄື່ອງອຸປະໂພກ, ບໍລິໂພກ ທີ່ຮັບຈາກສາງ ເພື່ອສົ່ງແຈກຢາຍສິນຄ້າໃນຂອບເຂດນະຄອນຫລວງວຽງຈັນນັ້ນ ກໍ່ຕ້ອງມີແຜນການຂົນສົ່ງແຕ່ກໍ່ຕ້ອງຫລຸດຖ້ຽວລົງ ແລະ ຈຳນວນພາຫະນະລົງ ຈາກຈຳນວນປົກກະຕິ ພ້ອມທັງກໍານົດເສັ້ນທາງແລ່ນລະອຽດ ໂດຍການແຈ້ງຈໍານວນພາ ຫະນະ, ຊື່ຄົນຂັບລົດ ພ້ອມທັງມີມາດຕະການປ້ອງກັນພະຍາດໂຄວິດ-19 ຢ່າງລະອຽດ ເພື່ອສະເໜີຕໍ່ໜ່ວຍສະເພາະກິດຂອງແຕ່ລະເມືອງ ຕາມສາຍທາງທີ່ການຂົນສົ່ງແລ່ນຜ່ານ.

3. ມອບໃຫ້ຂະແໜງຂົນສົ່ງ ພະແນກ ຍທຂ ນວ ແລະ ຫ້ອງການ ຍທຂ 9 ຕົວເມືອງ ຕິດຕາມການຈັດຕັ້ງປະຕິບັດຕໍ່ແຈ້ງການດັ່ງກ່າວ ແລະ ລາຍງານຄະນະພະແນກຮັບຊາບຢ່າງເປັນປົກກະຕິ.

4. ແຈ້ງການສະບັບນີ້ ແມ່ນໃຊ້ປ່ຽນແທນແຈ້ງການສະບັບເລກທີ 304/ຍທຂ.ນວ, ລົງວັນທີ 25 ເມສາ 2021. ດັ່ງນັ້ນ, ຈຶ່ງແຈ້ງມາຍັງທ່ານເພື່ອຮັບຊາບ ແລະ ພ້ອມກັນປະຕິບັດຕາມແຈ້ງການສະບັບນີ້ຢ່າງເຂັ້ມງວດ.