ໂມລນູພິຣາເວຍ ຢາຕ້ານໂຄວິດຊະນິດເມັດ ຄວາມຫວັງໃໝ່ທີ່ອາດຊ່ວຍຫລຸດຄວາມສ່ຽງ ໃນການນອນໂຮງໝໍ-ເສຍຊີວິດຈາກໂຄວິດ

ວັນທີ 1 ຕຸລາ, ສຳນັກຂ່າວຕ່າງປະເທດລາຍງານເຖິງສັນຍານທາງບວກຂອງການທົດລອງຢາຕ້ານໂຄວິດຊະນິດເມັດຄື “ໂມລນູພິຣາເວຍ” (Molnupiravir) ທີ່ພັດທະນາໂດຍບໍລິສັດດ້ານການຢາສັນຊາດອາເມລິກາ Merck & Co ເຊິ່ງເປັນທາງເລືອກ ແລະ ຄວາມຫວັງໃໝ່ທີ່ອາດຊ່ວຍຫລຸດຄວາມສ່ຽງໃນການນອນໂຮງໝໍ ແລະ ເສຍຊີວິດຈາກໂຄວິດລົງເຄິ່ງໜຶ່ງ ໂດຍສະເພາະໃນຜູ້ທີ່ອາດຈະມີຂໍ້ຈຳກັດບາງປະການໃນການເຂົ້າຮັບການສັກວັກຊີນ.

ໂດຍ Merck ສຶກສາ ແລະ ທົດລອງການໃຊ້ຢາຕ້ານໄວຣັສດັ່ງກ່າວໃນກຸ່ມຕົວຢ່າງລວມ 775 ຄົນ ມຸ່ງເນັ້ນໃສ່ຜູ້ທີ່ເຂົ້າປິ່ນປົວຢູ່ໂຮງໝໍ ຫລື ຜູ້ທີ່ເສຍຊີວິດຈາກການຕິດເຊື້ອໂຄວິດ ໂດຍພົບວ່າຜູ້ທີ່ໄດ້ຮັບຢາໂມລນູພິຣາເວຍວັນລະ 2 ຄັ້ງ ເປັນໄລຍະເວລາ 5 ວັນ ປະມານ 7,3% ເຂົ້າປິ່ນປົວໃນໂຮງໝໍ ແລະ ບໍ່ພົບຜູ້ເສຍຊີວິດຈາກໂຄວິດໃນກຸ່ມຕົວຢ່າງນີ້ຕະຫລອດການປິ່ນປົວ 29 ວັນ. ຂະນະທີ່ອີກກຸ່ມຕົວຢ່າງໜຶ່ງທີ່ໃຫ້ຢາຕົວະ (Placebo) ມີຜູ້ທີ່ເຂົ້າປິ່ນປົວໃນໂຮງໝໍ 14,1% ແລະ ມີຜູ້ເສຍຊີວິດຈາກໂຄວິດ 8 ຄົນ.

Merck ແລະ ຜູ້ຮ່ວມພັດທະນາຄື Ridgeback Biotherapeutics ລະບຸວ່າ: ພວກເຂົາກຳລັງຈະຍື່ນເລື່ອງຂໍອະນຸຍາດໃຊ້ຢາຕ້ານໂຄວິດຊະນິດເມັດນີ້ເປັນກໍລະນີສຸກເສີນໃນອີກ 2 ອາທິດຕໍ່ໜ້າ ຖ້າໄດ້ຮັບການອະນຸມັດຈາກອົງການອາຫານ ແລະ ຢາອາເມລິກາ. ໂມລນູພິຣາເວຍຈະເປັນຢາຕ້ານໂຄວິດຊະນິດເມັດຊະນິດທຳອິດທີ່ໄດ້ຮັບການຮັບຮອງຈາກທາງການອາເມລິກາ ແລະ ຈາກການເຜີຍຜົນສຳເລັດດັ່ງກ່າວ ເຮັດໃຫ້ລາຄາຫຸ້ນຂອງ Merck & Co ປັບຕົວສູງຂຶ້ນພຽງຂ້າມຄືນ.

ໂດຍຕັ້ງເປົ້າຈະຜະລິດໃຫ້ໄດ້ 10 ລ້ານຄໍພາຍໃນປີນີ້ ເຊິ່ງທາງການອາເມລິກາກຽມສັ່ງຈອງໂມລນູພິຣາເວຍແລ້ວ 1,7 ລ້ານຄໍ ຫລື ເປັນເງິນເກືອບ 1,2 ພັນລ້ານໂດລາ ແລະ ອາດສັ່ງຈອງເພີ່ມອີກ 3,5 ລ້ານຄໍ ຖ້າມີຄວາມຈຳເປັນ. ເບື້ອງຕົ້ນ Merck ໄດ້ເຮັດສັນຍາກັບຖານການຜະລິດຢາຫລາຍແຫ່ງໃນອິນເດຍຮຽບຮ້ອຍແລ້ວ ເພື່ອກະຈາຍຢາຕ້ານໂຄວິດຊະນິດເມັດຄືໂມລນູພິຣາເວຍໃຫ້ໄປເຖິງປະເທດທີ່ມີລາຍໄດ້ໜ້ອຍເຖິງປານກາງຕ່າງໆທີ່ອາດຈະຍັງມີບັນຫາດ້ານການເຂົ້າເຖິງວັກຊີນໂຄວິດ.

ທາງດ້ານ ດາເຣຍ ຮາຊູດາ ຮອງປະທານທີມຄົ້ນຄວ້າວິໄຈເລື່ອງພະຍາດລະບາດຂອງ Merck ຊີ້ວ່າ: “ຢາຕ້ານໄວຣັສນີ້ເໝາະສຳລັບຜູ້ທີ່ຍັງບໍ່ໄດ້ເຂົ້າຮັບການສັກວັກຊີນ ຫລື ຜູ້ທີ່ມີບັນຫາເລື່ອງພູມຕ້ານທານ. ພູມຕ້ານທານເກີດຂຶ້ນໜ້ອຍພາຍຫລັງເຂົ້າຮັບການສັກວັກຊີນໂຄວິດໄປແລ້ວ ນີ້ຈະເປັນເຄື່ອງມືທີ່ສຳຄັນໃນການຊ່ວຍຢຸດພະຍາດລະບາດຄັ້ງໃຫຍ່ນີ້” ເຊິ່ງມີຄວາມເຫັນໄປໃນທິດທາງທີ່ສອດຄ່ອງກັບ ປີເຕີ ຮໍບີ ອາຈານດ້ານພະຍາດລະບາດປະຈຳມະຫາວິທະຍາໄລອອກຟອດ ລະບຸວ່າ: “ຢາຕ້ານໄວຣັສຊະນິດເມັດທີ່ປອດໄພ ລາຄາຈັບບາຍໄດ້ ແລະ ມີປະສິດທິພາບ ຈະມີສ່ວນຊ່ວຍສ້າງຂໍ້ໄດ້ປຽບຄັ້ງສຳຄັນໃນການຕໍ່ສູ້ ແລະ ຮັບມືກັບວິກິດໂຄວິດ”.

ນອກຈາກນີ້, Merck & Co ທີ່ກຳລັງທົດລອງ ແລະ ພັດທະນາຢາຕ້ານໄວຣັສຊະນິດເມັດນີ້ແລ້ວ ຍັງມີອີກຫລາຍອົງກອນເຊັ່ນ: ຜູ້ພັດທະນາວັກຊີນໂຄວິດຄື Pfizer ເອງກໍກຳລັງສຶກສາຜົນລັບຂອງຢາຕ້ານໄວຣັສຊະນິດເມັດ 2 ຊະນິດເຊັ່ນດຽວກັນ ລວມທັງ Roche ບໍລິສັດດ້ານການຢາສັນຊາດສະວິດກຳລັງສຶກສາວິໄຈທາງເລືອກໃໝ່ໃນການຮັບມື ແລະ ປິ່ນປົວຜູ້ຕິດເຊື້ອໂຄວິດເຊັ່ນກັນ.

ອ້າງອີງ:

• https://www.reuters.com/business/healthcare-pharmaceuticals/mercks-covid-19-pill-cuts-risk-death-hospitalization-by-50-study-2021-10-01/
• https://www.bbc.com/news/health-58764440
• https://www.cnbc.com/2021/10/01/merck-to-seek-emergency-authorization-for-oral-covid-19-treatment.html