ກອງປະຊຸມຄົບຄະນະ ຄັ້ງທີ 3 ຂອງຄະນະບໍລິຫານງານສູນກາງພັກ ສະໄໝທີ XI ໄດ້ຕີລາຄາ 3 ບັນຫາ
ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 3 ສະໄໝທີ XI ໄດ້ດໍາເນີນແຕ່ວັນທີ 18 ຫາວັນທີ 22 ເດືອນຕຸລາ ປີ 2021 ທີ່ນະຄອນຫຼວງວຽງຈັນ ພາຍໃຕ້ການເປັນປະທານຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິ ຫານງານສູນກາງພັກ ປະຊາຊົນປະຕິວັດລາວ, ມີບັນດາສະຫາຍຄະນະບໍລິຫານງານສູນກາງພັກເຂົ້າ ຮ່ວມ, ໂດຍປະຕິບັດມາດຕະການປ້ອງກັນການແພ່ລະບາດຂອງພະຍາດໂຄວິດ-19 ຢ່າງເຂັ້ມງວດ.
ກອງປະຊຸມຄັ້ງນີ້, ໄດ້ສຸມໃສ່ກວດກາ, ຕີລາຄາສະພາບການຜັນຂະຫຍາຍ ແລະ ການຈັດຕັ້ງປະ ຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ມີດັ່ງນີ້:
1).ໄດ້ຕີລາຄາຄວາມຄືບໜ້າສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ,ແຜນ ງົບປະມານ ແລະ ແຜນເງິນຕາ ລວມທັງຄວາມຄືບໜ້າຂອງການແກ້ໄຂບັນຫາອັນຮີບດ່ວນຕ່າງໆ ໃນຂົງເຂດດັ່ງກ່າວ,ພ້ອມທັງພິຈາລະນາກໍານົດບັນດາ ມາດຕະການຈັດຕັ້ງປະຕິ ບັດ ໃນໄຕມາດສຸດທ້າຍ ປີ 2021 ແລະ ທິດທາງແຜນການ ໃນປີ 2022.
ກອງປະຊຸມ, ເຫັນວ່າເຖິງສະພາບແວດລ້ອມ ຢູ່ພາຍໃນ ແລະ ພາຍນອກ ມີຄວາມຫຍຸ້ງຍາກຫຼາຍປະການ, ແຕ່ສູນກາງພັກ ແລະ ບັນດາອົງການໃນລະບົບການເມືອງແຕ່ລະຂັ້ນ ໄດ້ເອົາໃຈໃສ່ນໍາພາຊີ້ນໍາການຈັດຕັ້ງປະຕິບັດແຜນການ ປະຈໍາປີ 2021 ດ້ວຍຄວາມເປັນເຈົ້າການ ແລະ ຮັບຜິດຊອບສູງ ໂດຍໄດ້ຫັນເຂົ້າສູ່ວຽກງານຕົວຈິງ ດ້ວຍການວາງນະໂຍບາຍທີ່ລະອຽດ, ຈະແຈ້ງ ແລະ ສອດຄ່ອງກັບສະພາບຕົວຈິງ, ອັນພົ້ນເດັ່ນແມ່ນໄດ້ຍົກລະ ດັບການແກ້ໄຂບັນຫາຄວາມຫຍຸ້ງຍາກດ້ານເສດ ຖະກິດ-ການເງິນ ແລະ ການແກ້ໄຂບັນຫາຢາເສບ ຕິດຂຶ້ນເປັນວາລະແຫ່ງຊາດ, ພ້ອມທັງໄດ້ສຸມໃສ່ຕ້ານ, ສະກັດກັ້ນ ແລະ ປ້ອງກັນການແຜ່ລະບາດຂອງພະຍາດໂຄວິດ-19 ຢ່າງຕັ້ງໜ້າ ເພື່ອຮັບປະ ກັນຊີວິດ ແລະ ສຸຂະພາບ ຂອງປະຊາຊົນ ກໍຄືແກ້ ໄຂຜົນກະທົບຕໍ່ການພັດທະນາເສດຖະກິດ- ສັງ ຄົມ, ຍ້ອນແນວນັ້ນ ຈຶ່ງສາມາດຮັບປະກັນສະຖຽນລະພາບທາງດ້ານການເມືອງໄວ້ໄດ້ຢ່າງໜັກແໜ້ນ, ການພັດທະນາເສດຖະກິດ-ສັງຄົມຢູ່ປະເທດເຮົາສືບຕໍ່ດໍາເນີນໄປຢ່າງຕໍ່ເນື່ອງ, ອັດຕາການເຕີບໂຕ ຂອງລວມຍອດຜະລິດຕະພັນພາຍໃນ (GDP) ຂະຫຍາຍຕົວໃນລະດັບ 2,8%. ໃນດ້ານຄົງຄ້າງທີ່ສູນກາງພັກ ເຫັນວ່າຕ້ອງໄດ້ສຸມໃສ່ແກ້ໄຂຢ່າງເອົາຈິງເອົາຈັງ ແລະ ເປັນລະບົບຄືື: ອັດຕາແລກປ່ຽນ, ອັດຕາເງິນເຟີ້, ຄ່າຄອງຊີບ, ບັນຫາໜີ້ສິນ, ເກັບລາຍຮັບງົບປະມານ, ການຄຸ້ມຄອງ-ຈັດຫາວຽກເຮັດງານທໍາບໍ່ໄດ້ຕາມແຜນ, ການຊຸກຍູ້ການສົ່ງ ເສີມການຜະລິດ ແລະອື່ນໆ.
ຈາກນັ້ນ, ກອງປະຊຸມສູນກາງພັກ ໄດ້ໃຫ້ທິດຊີ້ນໍາ ແລະ ມອບໝາຍໃຫ້ ລັດຖະບານ ກໍຄືຄະນະ ພັກ, ອົງການປົກຄອງແຕ່ລະຂັ້ນ ສືບຕໍ່ຊີ້ນໍາແກ້ໄຂບັນຫາຂໍ້ຄົງຄ້າງຕ່າງໆ ດ້ວຍຈິດໃຈບຸກທະລຸຢ່າງແຂງແຮງ ເພື່ອສ້າງພື້ນຖານອັນໜັກແໜ້ນໃຫ້ການ ແກ່ການສືບຕໍ່ຈັດຕັ້ງປະຕິບັດແຜນພັດທະນາເສດ ຖະກິດ-ສັງຄົມ, ແຜນງົບປະມານ, ແຜນເງິນຕາ ໃນໄຕມາດສຸດທ້າຍປີ 2021 ແລະ ວາງແຜນປະຈໍາປີ 2022 ບົນພື້ນຖານມະຕິ XI ຂອງພັກ ແລະ ແຜນ ການພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ຄຽງຄູ່ການຈັດຕັ້ງປະຕິບັດວາລະແຫ່ງຊາດ ໃຫ້ບັນລຸຕາມຄາດໝາຍວາງໄວ້.
2). ໄດ້ປຶກສາຫາລື ແລະ ຕີລາຄາ ຕໍ່ສະພາບການຂອງພາກພື້ນແລະສາກົນ ໂດຍສະເພາະຕໍ່ບາງບັນ ຫາທີ່ພົ້ນເດັ່ນໃນໄລຍະຫຼັງໆມານີ້ ແລະ ຕີລາ ຄາສະພາບການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ.ຄະນະບໍລິຫານງານສູນກາງພັກໄດ້ຢືນຢັນວ່າ:ສະພາບແວດລ້ອມພາກພື້ນ ແລະສາກົນສືບຕໍ່ຜັນແປໄປຢ່າງສະຫຼັບສັບ ຊ້ອນ, ເຄັ່ງຮ້ອນ ແລະ ມີຄວາມຫຼໍ່ແຫຼມໃນຫຼາຍດ້ານ; ໂລກກໍາລັງປະເຊີນໜ້າກັບການປ່ຽນແປງຢ່າງໃຫຍ່ຫຼວງເປັນຕົ້ນແມ່ນການເພີ່ມທະວີຂອງບັນຫາໂລກຮ້ອນ, ການແພ່ລະບາດຂອງພະຍາດໂຄວິດ-19 ທີ່ຍັງມີທ່າອຽງແກ່ຍາວ ແລະ ສ້າງຜົນກະທົບເປັນວົງກວ້າງຕໍ່ການດໍາລົງຊີວິດຂອງປະຊາ ຊົນຢູ່ທົ່ວທຸກມຸມໂລກ; ຂໍ້ຂັດແຍ່ງທາງດ້ານການເມືອງ, ເສດຖະກິດ, ການທະຫານ…ໄດ້ກາຍເປັນສິ່ງທ້າທາຍໃໝ່ຕໍ່ສັນຕິພາບ, ສະຖຽນລະພາບ ແລະ ຄວາມໝັ້ນຄົງຂອງໂລກ. ບັນຫາເຫຼົ່ານັ້ນ ລ້ວນແຕ່ສົ່ງຜົນສະທ້ອນທັງທາງກົງ ແລະ ທາງອ້ອມ ຕໍ່ປະເທດເຮົາ, ແຕ່ພາຍໃຕ້ການນໍາພາຂອງພັກ ແລະ ການຄຸ້ມຄອງ ຂອງລັດ, ຄວາມເປັນຫຼັກແຫຼ່ງແກ່ນສານ ຂອງກໍາລັງປ້ອງກັນຊາດ-ປ້ອງກັນຄວາມສະຫງົບ ແລະ ຄວາມເປັນເຈົ້າຂອງປະຊາ ຊົນລາວບັນດາເຜົ່າ ໃນການຈັດຕັ້ງປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານໄດ້ເຮັດໃຫ້ປະເທດຊາດ ສືບຕໍ່ຮັກສາໄດ້ສະຖຽນລະພາບທາງການເມືອງຢ່າງໜັກແໜ້ນ, ຄວາມສະຫງົບປອດໄພ ແລະເປັນລະບຽບ ຮຽບຮ້ອຍ ຂອງສັງຄົມໂດຍພື້ນຖານ, ສະກັດກັ້ນ, ຕີຖອຍທຸກການທຳລາຍມ້າງເພຂອງພວກຄົນບໍ່ດີ, ສ້າງເງື່ອນໄຂເອື້ອອຳນວຍໃຫ້ແກ່ການສ້າງສາພັດ ທະນາ ແລະ ສ້າງປະຖົມປັດໄຈດ້ານຕ່າງໆ ໃນການສືບຕໍ່ນໍາພາປະເທດຊາດກ້າວເດີນສູ່ຈຸດໝາຍສັງຄົມນິຍົມ.
ກອງປະຊຸມໄດ້ເປັນເອກະພາບສູງ ໃຫ້ທິດຊີ້ນໍາ ຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ວຽກງານຕ່າງປະເທດ ໃນເງື່ອນໄຂສະພາບ ການໃໝ່ຊຶ່ງຕ້ອງກຽມພ້ອມຮັບມືກັບສະພາບການ ຕ່າງໆຢ່າງເປັນລະບົບ ໂດຍຢຶດໝັ້ນ ແລະ ສືບຕໍ່ຈັດຕັ້ງປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານໃຫ້ເຂົ້າສູ່ລວງເລິກ, ສຸມໃສ່ກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ, ຕັ້ງໜ້າປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ, ແກ້ໄຂສະພາບຫຍໍ້ທໍ້ຕ່າງໆໃນສັງຄົມຢ່າງມີປະສິດທິຜົນ.
ພ້ອມກັນນັ້ນ, ກໍສືບຕໍ່ຢຶດໝັ້ນແນວທາງການຕ່າງປະເທດສັນຕິພາບ, ເອກະລາດ, ມິດຕະພາບ ແລະ ການຮ່ວມມື ເພື່ອພັດທະນາ, ຖືການທູດປ້ອງກັນເຫດ ແລະ ບຸກທະລຸ ເປັນທິດສໍາຄັນ ໂດຍເຊີດຊູຄວາມເປັນເອກະລາດແຫ່ງຊາດ, ເປັນເຈົ້າຕົນເອງ, ຕ່າງຝ່າຍຕ່າງມີຜົນປະໂຫຍດ, ບໍ່ແຊກແຊງກິດຈະ ການພາຍໃນ ຂອງກັນແລະກັນ, ປະກອບສ່ວນສໍາຄັນເຂົ້າໃນການປົກປັກຮັກສາສັນຕິພາບ, ສະຖຽນລະພາບ,ມິດຕະພາບ ແລະ ການຮ່ວມມື ເພື່ອການ ພັດທະນາຢູ່ພາກພື້ນ ແລະ ສາກົນ, ສ້າງເງື່ອນໄຂສະດວກ ແລະ ນໍາຜົນປະໂຫຍດຕົວຈິງມາໃຫ້ແກ່ການພັດທະນາປະເທດຊາດ.
3). ຄະນະບໍລິຫານງານສູນກາງພັກ ໄດ້ດໍາເນີນຊີວິດການເມືອງ ປະຈໍາປີ 2021 ເພື່ອສໍາຫຼວດ, ກວດກາຄືນ ການນໍາພາຊີ້ນໍາລວມຂອງຄະນະບໍລິ ຫານງານສູນກາງພັກ ແລະ ການເຄື່ອນໄຫວປະຕິ ບັດໜ້າທີ່ການເມືອງຂອງບັນດາສະຫາຍກໍາມະການສູນກາງພັກ ນັບແຕ່ກອງປະຊຸມໃຫຍ່ ຄັ້ງທີ XI ຂອງພັກ ໃນຕົ້ນປີ 2021 ເປັນຕົ້ນມາ ບົນຈິດໃຈສ້າງການຫັນປ່ຽນທີ່ແຂງແຮງ, ເລິກເຊິ່ງ ໃນການສໍາຫຼວດຄວາມຮັບຜິດຊອບການເມືອງ ໃນການນໍາພາຊີ້ນໍາການຜັນຂະຫຍາຍ ແລະ ຈັດຕັ້ງປະຕິ ບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ກໍຄືມະຕິ,ຄໍາສັ່ງຕ່າງໆຂອງສູນກາງພັກເຂົ້າສູ່ວຽກງານຕົວຈິງ,ພ້ອມທັງຊີ້ໃຫ້ເຫັນຈຸດອ່ອນ-ຂໍ້ຄົງຄ້າງ ແລະ ວາງທິດທາງປັບປຸງແກ້ໄຂໃນຕໍ່ໜ້າ.
ສະຫາຍ ເລຂາທິການໃຫຍ່ ຄະນະບໍລິຫານງານສູນກາງພັກ ມອບໃຫ້ບັນດາສະຫາຍໃນຄະນະບໍລິ ຫານງານສູນກາງພັກ ເດັດດ່ຽວຍົກສູງຄວາມສາມາດນໍາພາ ແລະ ຄວາມເປັນແບບຢ່າງນໍາໜ້າໃນການເພີ່ມທະວີການນໍາພາຊີ້ນໍາຜັນຂະຫຍາຍມະ ຕິ, ຄໍາສັ່ງຂອງສູນກາງພັກ ເຂົ້າສູ່ຕົວຈິງໃນຂົງເຂດວຽກງານຂອງຕົນ ເພື່ອສ້າງການຫັນປ່ຽນທີ່ແຂງ ແຮງ ແລະ ເລິກເຊິ່ງ, ຮອບດ້ານ; ຮຽກຮ້ອງມາຍັງອົງການຈັດຕັ້ງພັກ-ລັດ ທຸກຂັ້ນແລະທຸກພາກສ່ວນໃນສັງຄົມ ຈົ່ງເພີ່ມທະວີຄວາມສາມັກຄີເປັນປຶກ ແຜ່ນແໜ້ນໜາ,ຍົກສູງຄວາມຮັບຜິດຊອບ,ເສີມຂະຫຍາຍມູນເຊື້ອຮັກຊາດ, ກໍາແໜ້ນກາລະໂອ ກາດ, ເງື່ອນໄຂ ແລະ ປັດໄຈໃໝ່ຕາມການດໍາລົງຊີວິດປົກກະຕິແບບໃໝ່ພ້ອມກັນສຸມສະຕິປັນຍາຫົວຄິດປະດິດສ້າງເຂົ້າໃສ່ການແກ້ໄຂ ແລະ ຜ່ານຜ່າທຸກອຸປະສັກຄວາມຫຍຸ້ງຍາກດ້ານເສດຖະ ກິດ-ການເງິນ, ການແກ້ໄຂບັນຫາຢາເສບຕິດ ແລະ ປະກົດການຫຍໍ້ທໍ້ຕ່າງໆ, ເພີ່ມທະວີການປະຕິບັດມາດຕະການສະກັດກັ້ນ, ປ້ອງກັນ, ຄວບຄຸມ ແລະ ແກ້ໄຂການແຜ່ລະບາດ ຂອງພະຍາດໂຄວິດ-19, ຍູ້ຂະບວນການສ້າງສາພັດທະນາປະເທດຊາດໃຫ້ມີບາດກ້າວຫັນປ່ຽນ ແລະ ຂະຫຍາຍຕົວຢ່າງແຂງ ແຮງ.
ຂ່າວ-ພາບ: ຫ້ອງວ່າການສູນກາງພັກ
