ໄຟເຊີເຜີຍຜົນການທົດລອງໄລຍະ 3 ວັກຊີນເຂັມກະຕຸ້ນ ມີປະສິດທິພາບ ປ້ອງກັນໂຄວິດໄດ້ 95,6%

ໄຟເຊີ/ໄບໂອເອັນແທັກເຜີຍຜົນການທົດລອງໄລຍະ 3 ວັກຊີນເຂັມກະຕຸ້ນ ມີປະສິດທິພາບປ້ອງກັນໂຄວິດໄດ້ 95,6%.
ວັນທີ 22 ຕຸລາ 2021, ສຳນັກຂ່າວຕ່າງປະເທດລາຍງານວ່າ: ໄຟເຊີ ແລະ ໄບໂອເອັນແທັກ ຖະແຫລງຜົນການທົດລອງທາງຄລີນິກໄລຍະ 3 ກັບອາສາສະໝັກທີ່ສັກວັກຊີນຂອງບໍລິສັດເປັນວັກຊີນເຂັມກະຕຸ້ນ ພົບມີປະສິດທິພາບຟື້ນຟູການປ້ອງກັນໂຄວິດ-19 ເປັນທີ່ໜ້າພໍໃຈ.
ການທົດລອງດັ່ງກ່າວ ດຳເນີນການກັບກຸ່ມຕົວຢ່າງທີ່ມີອາຍຸ 16 ປີຂຶ້ນໄປຈຳນວນ 10.000 ຄົນ ເຊິ່ງໄດ້ຮັບວັກຊີນໄຟເຊີ/ໄບໂອເອັນແທັກເປັນວັກຊີນສອງເຂັມທຳອິດ ແລະ ເລີ່ມສັກວັກຊີນເຂັມກະຕຸ້ນຫ່າງຈາກເຂັມທີ 2 ເປັນໄລຍະເວລາສະເລ່ຍ 11 ເດືອນ ໂດຍສຸ່ມສັກວັກຊີນຂອງໄຟເຊີ ແລະ ຢາຂີ້ຕົວະ.
ຜົນການທົດລອງພົບວ່າ: ວັກຊີນເຂັມກະຕຸ້ນຂອງໄຟເຊີ/ໄບໂອເອັນແທັກມີປະສິດທິພາບປ້ອງກັນໂຄວິດ-19 ໄດ້ 95,6% ໃນໄລຍະທີ່ສາຍພັນເດວຕາກຳລັງລະບາດໜັກ ເມື່ອທຽບໃສ່ຜູ້ທີ່ຍັງບໍ່ໄດ້ຮັບວັກຊີນເຂັມກະຕຸ້ນ.
ໄຟເຊີລະບຸໃນຖະແຫລງການວ່າ: ບໍລິສັດຈະເລັ່ງຍື່ນຜົນການທົດລອງເບື້ອງຕົ້ນນີ້ໃຫ້ໜ່ວຍງານທີ່ກ່ຽວຂ້ອງໂດຍໄວທີ່ສຸດ.
ທັງນີ້, ຜົນການທົດລອງໄລຍະ 3 ຂອງໄຟເຊີ ຖືກເປີດເຜີຍອອກມາໜຶ່ງວັນຫລັງຈາກສຳນັກງານຄະນະກຳມະການອາຫານ ແລະ ຢາອາເມລິກາ (FDA) ອະນຸມັດວັກຊີນຂອງໂມເດິນາ ແລະ ຈອນສັນແອນຈອນສັນເປັນວັກຊີນເຂັມກະຕຸ້ນ ພ້ອມປະກາດເປີດທາງໃຫ້ຊາວອາເມລິກາສາມາດເລືອກສັກວັກຊີນເຂັມກະຕຸ້ນຂອງບໍລິສັດໃດກໍໄດ້ ບໍ່ຈຳເປັນຕ້ອງເປັນຍີ່ຫໍ້ດຽວກັບວັກຊີນສອງເຂັມທຳອິດ.
ກ່ອນໜ້ານີ້ FDA ໄດ້ອະນຸມັດສັກວັກຊີນປ້ອງກັນໂຄວິດ-19 ເຂັມກະຕຸ້ນຂອງໄຟເຊີ/ໄບໂອເອັນແທັກໃຫ້ປະຊາຊົນທີ່ມີອາຍຸ 65 ປີຂຶ້ນໄປ ຫລັງຈາກໄດ້ຮັບວັກຊີນຄົບໂດສແລ້ວຢ່າງໜ້ອຍ 6 ເດືອນ ລວມທັງຜູ້ທີ່ມີຄວາມສ່ຽງສູງ.
ອ້າງອີງ:
https://www.reuters.com/…/pfizer-biontech-report-high…/