ຜູ້ບໍລິຫານຊາວເກົາຫລີອາຍຸ 17 ປີ ເຈົ້າຂອງທຸລະກິດທີ່ມີຍອດຂາຍ 1,2 ລ້ານໂດລາໃນປີດຽວ

ຜູ້ບໍລິຫານຊາວເກົາຫລີອາຍຸ 17 ປີ ເຈົ້າຂອງທຸລະກິດທີ່ມີຍອດຂາຍ 1,2 ລ້ານໂດລາໃນປີດຽວ - 106937868 1630986036007 Screenshot 2021 09 07 at 114021 AM scaled - ຜູ້ບໍລິຫານຊາວເກົາຫລີອາຍຸ 17 ປີ ເຈົ້າຂອງທຸລະກິດທີ່ມີຍອດຂາຍ 1,2 ລ້ານໂດລາໃນປີດຽວ
ຜູ້ບໍລິຫານຊາວເກົາຫລີອາຍຸ 17 ປີ ເຈົ້າຂອງທຸລະກິດທີ່ມີຍອດຂາຍ 1,2 ລ້ານໂດລາໃນປີດຽວ - kitchen vibe - ຜູ້ບໍລິຫານຊາວເກົາຫລີອາຍຸ 17 ປີ ເຈົ້າຂອງທຸລະກິດທີ່ມີຍອດຂາຍ 1,2 ລ້ານໂດລາໃນປີດຽວ

ຈາກເດັກນ້ອຍທີ່ຖືກຂົ່ມເຫັງ ຕອນນີ້ກາຍເປັນຜູ້ບໍລິຫານອາຍຸ 17 ປີ ເຈົ້າຂອງຍີ່ຫໍ້ແຟຊັນຍອດຂາຍສູງເຖິງ 1,2 ລ້ານໂດລາໃນປີດຽວ ແລະ ທຸລະກິດສະມາດວອດອັກສອນເບວສຳລັບຜູ້ພິການທາງສາຍຕາກຳລັງໄປໄດ້ງົດງາມ.

ທ້າວ Sukone Hong ເຈົ້າຂອງທຸລະກິດຊາວ ສ.ເກົາຫລີ ອາຍຸພຽງ 17 ປີ ຖືກເວົ້າເຖິງຕາມສື່ຕ່າງປະເທດຫລາຍສຳນັກເມື່ອຍີ່ຫໍ້ແຟຊັນຂອງລາວມີຍອດຂາຍສູງເຖິງ 1,2 ລ້ານໂດລາສະຫະລັດໃນປີນີ້ ແລະ ຕອນນີ້ລາວໄດ້ເປີດຕົວສະມາດວອດອັກສອນເບວສຳລັບຜູ້ພິການທາງສາຍຕາ ທີ່ມີຄຳສັ່ງຊື້ຫລາຍພັນລາຍການ.

ຜູ້ບໍລິຫານຊາວເກົາຫລີອາຍຸ 17 ປີ ເຈົ້າຂອງທຸລະກິດທີ່ມີຍອດຂາຍ 1,2 ລ້ານໂດລາໃນປີດຽວ - Visit Laos Visit SALANA BOUTIQUE HOTEL - ຜູ້ບໍລິຫານຊາວເກົາຫລີອາຍຸ 17 ປີ ເຈົ້າຂອງທຸລະກິດທີ່ມີຍອດຂາຍ 1,2 ລ້ານໂດລາໃນປີດຽວ

Hong ເລົ່າວ່າ: ໃນຕອນທີ່ລາວຮຽນຢູ່ໂຮງຮຽນ, ລາວເຄີຍຖືກຂົ່ມເຫັງ ແລະ ຕົກເປັນເຫຍື່ອຂອງການຂົ່ມເຫັງຂອງໝູ່ເພື່ອນ. “ສຳລັບຂ້ອຍມັນຍາກທີ່ຈະມີສ່ວນຮ່ວມກັບໂຮງຮຽນ ແລະ ເຂົ້າກັບໝູ່ເພື່ອນຮ່ວມຫ້ອງ, ຂ້ອຍຖືກຂົ່ມເຫັງ ແລະ ຕ້ອງຫາສິ່ງທີ່ຈະສາມາດປ່ຽນຊີວິດຂ້ອຍໄດ້”.

Hong ເລີ່ມເຂົ້າສູ່ເສັ້ນທາງການເປັນເຈົ້າຂອງທຸລະກິດເມື່ອ 4 ປີກ່ອນ ຕອນຮຽນມັດທະຍົມຕົ້ນ ລາວເລີ່ມຂາຍເສື້ອຜ້າໃນ Naver ແພກຟອມອອນລາຍຂອງ ສ.ເກົາຫລີ ໂດຍມີລາຍໄດ້ເລີ່ມຕົ້ນ 150 ໂດລາສະຫະລັດ ຈຶ່ງເຮັດໃຫ້ລາວຕ້ອງຄິດປ່ຽນແປງກົນລະຍຸດ.

ຈາກເງິນສະໜັບສະໜູນຈາກຄອບຄົວຈຳນວນ 5.000 ໂດລາສະຫະລັດ ແລະ ໄດ້ຮັບການຊ່ວຍເຫລືອຈາກທຸລະກິດດ້ານການພິມແຫ່ງໜຶ່ງ ລາວຈຶ່ງເລີ່ມສ້າງເວັບໄຊຂາຍເສື້ອຜ້າຂອງຕົນເອງໃນຊື່ຍີ່ຫໍ້ Olaga ໂດຍສະເໜີຊຸດລຳລອງແບບ unisex ດ້ວຍການອອກແບບທີ່ລຽບງ່າຍ ແລະ ສະໜຸກສະໜານ ແລະ ຕ້ອງການສ້າງຈຸດຂາຍທີ່ບໍ່ຄືໃຜ.

ແຕ່ຫລັງຈາກເປີດຕົວອອກໄປແລ້ວ ທຸກຢ່າງງຽບເປັນອາທິດ ກ່ອນຈະຄ່ອຍໆມີອໍເດີ້ເຂົ້າມາໃນອາທິດຕໍ່ມາ. Hong ເຜີຍວ່າ: ເມື່ອລາວຕື່ນເຊົ້າມາພົບວ່າມີອໍເດີ້ເຂົ້າປະມານ 15 ລາຍການ ຕອນທ່ຽງ 50 ລາຍການ ແລະ ຕອນແລງອີກ 80 ລາຍການ ລວມແລ້ວອາທິດນັ້ນລາວຂາຍເສື້ອຜ້າໄດ້ປະມານ 300 ໂຕ.

3 ປີຜ່ານມາ, Olaga ໂດ່ງດັງໃນຕະຫລາດອາຊີ ແລະ ຢູ່ໃນອັນດັບຕົ້ນໆຂອງໝວດໝູ່ເສື້ອຍືດໃນເວັບໄຊ Style Share ດ້ວຍຍອດຂາຍ 1,2 ລ້ານໂດລາສະຫະລັດໃນໄລຍະເວລາ 1 ປີ.

ເຮັດໃຫ້ Hong ມີເງິນພໍທີ່ຈະສາມາດຈ້າງພະນັກງານໄດ້ 12 ຄົນ ແລະ ຈ່າຍຄືນໃຫ້ພໍ່ແມ່ສຳລັບຄ່າຮຽນຢູ່ໂຮງຮຽນນາໆຊາດ ໃນນະຄອນຫລວງໂຊນ ເຊິ່ງເປັນບ່ອນເຮັດໃຫ້ລາວເກີດແຮງບັນດານໃຈໃນການລົງທຶນ.

Hong ກ່າວວ່າ: ຕອນທຳອິດລາວຄິດພຽງວ່າທຸລະກິດເຮັດໃຫ້ລາວຫາເງິນໄດ້ຈຳນວນຫລາຍ, ແຕ່ຄູຂອງລາວແນະນຳວ່າ ລາວສາມາດໃຊ້ຄວາມຮູ້ ແລະ ປະສົບການທີ່ມີເພື່ອສ້າງທຸລະກິດທີ່ຈະສາມາດຊ່ວຍເຫລືອຜູ້ອື່ນໄດ້ ເຮັດໃຫ້ລາວຄິດ ແລະ ຕັດສິນໃຈຈະພັດທະນາ “ສະມາດວອດອັກສອນເບວ” ເພື່ອໃຫ້ຜູ້ພິການທາງສາຍຕາໄດ້ຮັບຂໍ້ມູນແບບຣຽວທາມ ເຊັ່ນຂໍ້ຄວາມຈາກສະມາດໂຟນ.

ແຕ່ຈາກຕົ້ນທຶນທີ່ສູງ ເຊິ່ງໂດຍທົ່ວໄປແລ້ວຈະສູງກວ່າ 300 ໂດລາສະຫະລັດ ອາດເຮັດໃຫ້ຜູ້ພິການຈຳນວນຫລາຍເຂົ້າເຖິງຜະລິດຕະພັນນີ້ບໍ່ໄດ້. Hong ເນັ້ນໜັກເຖິງຄວາມບໍ່ເທົ່າທຽມກັນ ແລະ ຕັດສິນໃຈວ່າຈະຕ້ອງມີທາງເລືອກອື່ນທີ່ເໝາະສົມກວ່າ.

ລາວຈຶ່ງອອກເດີນທາງເພື່ອສ້າງຄວາມເຂົ້າໃຈຕະຫລາດ ໂອ້ລົມກັບຜູ້ພິການທາງສາຍຕາເພື່ອຂໍຄຳແນະນຳ ແລະ ຂໍ້ສະເໜີໃນການພັດທະນາສະມາດວອດອັກສອນເບວ ໃຫ້ໄດ້ຜະລິດຕະພັນທີ່ເໝາະກັບຄວາມຕ້ອງການຂອງຜູ້ພິການທາງສາຍຕາຫລາຍຂຶ້ນ ແລະ ໂອ້ລົມກັບວິສະວະກອນເພື່ອຫາວິທີແກ້ໄຂ.

6 ເດືອນຕໍ່ມາ ສະມາດວອດອັກສອນເບວ Paradox Computers ລາຄາ 80 ໂດລາສະຫະລັດ ມີີຂອດຂາຍຫລາຍຮ້ອຍລາຍການ ແລະ ມີຄຳສັ່ງຊື້ລ່ວງໜ້າອີກ 3.000 ລາຍການ.

ເຖິງວ່າ Hong ຈະປະສົບຜົນສຳເລັດໃນເສັ້ນທາງການເປັນນັກທຸລະກິດ, ແຕ່ລາວຍັງມຸ່ງໝັ້ນຈະຮຽນໜັງສືຕໍ່ໄປ.

“ເມື່ອທຸລະກິດເຕີບໃຫຍ່ຢ່າງວ່ອງໄວ ຂ້ອຍເຄີຍມີຄວາມຄິດຈະບໍ່ຮຽນໜັງສືຕໍ່ແລ້ວ, ແຕ່ເມື່ອໄດ້ໂອ້ລົມກັບຜູ້ບໍລິຫານຫລາຍໆຄົນ ພວກເຂົາທຸກຄົນແນະນຳວ່າຂ້ອຍຄວນຮຽນຕໍ່ມະຫາວິທະຍາໄລ” Hong ກ່າວ.

ອ້າງອີງ:

https://nextshark.com/sukone-hong-south-korean-ceo-17/

ຜູ້ບໍລິຫານຊາວເກົາຫລີອາຍຸ 17 ປີ ເຈົ້າຂອງທຸລະກິດທີ່ມີຍອດຂາຍ 1,2 ລ້ານໂດລາໃນປີດຽວ - 3 - ຜູ້ບໍລິຫານຊາວເກົາຫລີອາຍຸ 17 ປີ ເຈົ້າຂອງທຸລະກິດທີ່ມີຍອດຂາຍ 1,2 ລ້ານໂດລາໃນປີດຽວ
ຜູ້ບໍລິຫານຊາວເກົາຫລີອາຍຸ 17 ປີ ເຈົ້າຂອງທຸລະກິດທີ່ມີຍອດຂາຍ 1,2 ລ້ານໂດລາໃນປີດຽວ - 5 - ຜູ້ບໍລິຫານຊາວເກົາຫລີອາຍຸ 17 ປີ ເຈົ້າຂອງທຸລະກິດທີ່ມີຍອດຂາຍ 1,2 ລ້ານໂດລາໃນປີດຽວ
ຜູ້ບໍລິຫານຊາວເກົາຫລີອາຍຸ 17 ປີ ເຈົ້າຂອງທຸລະກິດທີ່ມີຍອດຂາຍ 1,2 ລ້ານໂດລາໃນປີດຽວ - 4 - ຜູ້ບໍລິຫານຊາວເກົາຫລີອາຍຸ 17 ປີ ເຈົ້າຂອງທຸລະກິດທີ່ມີຍອດຂາຍ 1,2 ລ້ານໂດລາໃນປີດຽວ