UN ເປັນຫ່ວງອັບການິດສະຖານກາຍເປັນ “ນາຮົກເທິງເດິນ” ປະຊາຊົນ 23 ລ້ານຄົນ ອາດຜະເຊີນຄວາມອຶດຫິວໃນລະດູໜາວ
ໂຄງການອາຫານໂລກຂອງອົງການສະຫະປະຊາຊາດເປັນຫ່ວງຊາວອັບການິດສະຖານ 23 ລ້ານຄົນ ຕ້ອງຜະເຊີນຄວາມອຶດຫິວ ແລະ ຫິວໂຫຍ ໃນຊ່ວງລະດູໜາວທີ່ກຳລັງຈະມາເຖິງ ຫລັງນາໆຊາດຕັດການຊ່ວຍເຫລືອລັດຖະບານຕາລີບັນ.
ວັນທີ 8 ພະຈິກ 2021, ເວັບໄຊບີບີຊີເຜີຍແຜ່ບົດສຳພາດຜູ້ບໍລິຫານໂຄງການອາຫານໂລກ (WFP) ເຊິ່ງເປັນໂຄງການມອບການຊ່ວຍເຫລືອດ້ານອາຫານພາຍໃຕ້ອົງການສະຫະປະຊາຊາດ (UN) ລະບຸສະຖານະການຄວາມອຶດຫິວໃນອັບການິດສະຖານຈະຮ້າຍແຮງລົງຫລາຍກວ່າທີ່ເປັນຢູ່ໃນຊ່ວງລະດູໜາວ ເຊິ່ງເປັນຊ່ວງເວລາທີ່.
ສະຖານະການຄວາມອຶດຫິວໃນອັບການິດສະຖານຮ້າຍແຮງຫລັງຈາກກຸ່ມຕາລີບັນເຂົ້າຢຶດອຳນາດຈາກລັດຖະບານຂອງປະທານາທິບໍດີ ອັດຣາຟ ການີ ໃນເດືອນສິງຫາຜ່ານມາ ສົ່ງຜົນໃຫ້ປະເທດຕາເວັນຕົກຕັດການຊ່ວຍເຫລືອອັບການິດສະຖານນັບແຕ່ນັ້ນມາ ເນື່ອງຈາກບໍ່ຕ້ອງການຖືກເບິ່ງວ່າໃຫ້ການສະໜັບສະໜູນລະບອບການປົກຄອງທີ່ໄຮ້ມະນຸດສະທຳ.
ທ່ານ ເດວິດ ບີສລີ ຫົວໜ້າໂຄງການອາຫານໂລກ ເປີດເຜີຍຫລັງຈາກເດີນທາງຢ້ຽມຢາມນະຄອນຫລວງກາບູລ ໃນວັນທີ 7 ພະຈິກວ່າ: “ສະຖານະການໃນອັບການິດສະຖານຮ້າຍແຮງເກີນກວ່າຈະຈິນຕະນາການໄດ້ ເຮົາເບິ່ງວ່ານີ້ເປັນວິກິດດ້ານມະນຸດສະທຳຮ້າຍແຮງທີ່ສຸດໃນໂລກ”.
“ປະຊາຊົນ 95% ບໍ່ມີອາຫານພຽງພໍ ແລະ ຕອນນີ້ເຮົາກຳລັງຄິດວ່າຄົນອີກ 23 ລ້ານຄົນ ອາດຕ້ອງຜະເຊີນຄວາມອຶດຫິວ” ທ່ານ ບີສລີ ກ່າວ. “ອີກ 6 ເດືອນຕໍ່ໜ້າຈະເຂົ້າສູ່ຊ່ວງເວລາຫາຍະນະ ແລະ ນີ້ຈະກາຍເປັນນາຮົກເທິງດິນ”.
ນອກຈາກນີ້, ຫົວໜ້າ WFP ຍັງຮຽກຮ້ອງໃຫ້ຜູ້ນຳ ແລະ ມະຫາເສດຖີທົ່ວໂລກຫັນມາຊ່ວຍເຫລືອຜູ້ບໍລິສຸດໃນອັບການິດສະຖານຢ່າງຮີບດ່ວນ.
ອ້າງອີງ:
https://www.bbc.com/news/world-asia-59202880
