ສປປ ເກົາຫລີ ປ່ອຍພາບມຸມສູງ ລະບຸມາຈາກທົດລອງລູກສອນໄຟຫລ້າສຸດ

ສປປ ເກົາຫລີ ປ່ອຍພາບຖ່າຍຈາກອາກາດ ລະບຸມາຈາກການປ່ອຍລູກສອນໄຟຄັ້ງຫລ້າສຸດ ຊີ້ປະສົບຜົນສຳເລັດທີ່ສຸດໃນຮອບ 5 ປີຜ່ານມາ.

ວັນທີ 31 ມັງກອນ 2022, ສຳນັກຂ່າວ BBC ລາຍງານວ່າ: ສປປ ເກົາຫລີ ປ່ອຍພາບມຸມສູງສະແດງໃຫ້ເຫັນແຫລມເກົາຫລີ ແລະ ບໍລິເວນອ້ອມຮອບ ແລະ ໄດ້ຢືນຢັນວ່າມີການທົດລອງລູກສອນໄຟຊື່ ຮວາຊອງ-12 ເຊິ່ງເປັນລູກສອນໄຟແບບ ballistic ໄລຍະການຍິງຂະໜາດກາງ (IRBM) ແລະ ລະບຸວ່າມີກຳລັງພໍຈະຍິງຂ້າມໄລຍະໄກຫລາຍພັນກິໂລແມັດ ລວມທັງອານາເຂດຂອງເກາະກວມ ເຊິ່ງເປັນດິນແດນຂອງອາເມລິກາ.

ທັນທີທີ່ມີການທົດລອງລູກສອນໄຟດັ່ງກ່າວ, ທັງ ສ.ເກົາຫລີ ແລະ ຍີ່ປຸ່ນ ກໍສົ່ງແຈ້ງເຕືອນໃຫ້ນາໆຊາດທັນທີ ເຊື່ອວ່າໄລຍະການຍິງສົ່ງລູກສອນໄຟໄປໄດ້ເຖິງ 800 ກິໂລແມັດ ແລະ ຂຶ້ນສູງສູ່ຟ້າເຖິງ 2.000 ກິໂລແມັດ ກ່ອນຕົກລົງມາກາງທະເລນອກຊາຍຝັ່ງຍີ່ປຸ່ນ ເຊິ່ງປົກກະຕິແລ້ວລູກສອນໄຟສາມາດມີແຮງການຍິງໄດ້ໄກປະມານ 4.000 ກິໂລແມັດ.

ຕໍ່ມາລັດຖະບານ ສປປ ເກົາຫລີ ໄດ້ອອກມາຢືນຢັນຂ່າວດັ່ງກ່າວຜ່ານລາຍງານຂ່າວຜ່ານສະຖານີ KCNA ສະຖານີໂທລະພາບປະຈຳປະເທດ ກ່າວວ່າ: ທົດລອງການຍິງເພື່ອຢືນຢັນຄວາມແນ່ນອນ ແລະ ຕັ້ງໃຈເລັ່ງໃຫ້ລົງທະເລເພື່ອຮັກສາຄວາມປອດໄພຂອງປະເທດໃກ້ຄຽງ ແລະ ເຜີຍແຜ່ພາບທີ່ລະບຸວ່າມາຈາກກ້ອງທີ່ຕິດໄວ້ຢູ່ຫົວລູກສອນໄຟ.

ການທົດລອງຄັ້ງຫລ້າສຸດສ້າງຄວາມຕື່ນຕົວໃຫ້ສະມາຄົມໂລກ ເພາະໄລຍະຜ່ານມາບໍ່ດົນນີ້ ລັດຖະບານ ສປປ ເກົາຫລີ ທົດລອງລູກສອນໄຟຢ່າງຕໍ່ເນື່ອງ ຖືວ່າຖີ່ທີ່ສຸດເປັນປະຫວັດສາດ ສ້າງແຮງສຽດທານໃຫ້ອາເມລິກາ, ສ.ເກົາຫລີ, ຍີ່ປຸ່ນ ແລະ ປະເທດອື່ນໆ.

ກ່ອນໜ້ານີ້, ອົງການສະຫະປະຊາຊາດ ເຄີຍມີຄຳສັ່ງຫ້າມ ສປປ ເກົາຫລີ ທົດລອງລູກສອນໄຟ ແລະ ອາວຸດນິວເຄຼຍ ແລະ ໄດ້ວາງມາດຕະການຂວ້ຳບາດ, ແຕ່ ສປປ ເກົາຫລີ ຍັງປະຕິບັດຕົນຕາມເຄີຍຕະຫລອດມາ. ຂະນະທີ່ອາເມລິກາກ່າວວ່າ: ອາເມລິກາໄດ້ພະຍາຍາມຟື້ນຟູການເຈລະຈາກັບ ສປປ ເກົາຫລີ ຂຶ້ນມາອີກຮອບ ເພື່ອຫາຊ່ອງທາງສ້າງຂໍ້ຕົກລົງຮ່ວມກັນ.

ອ້າງອີງ:

https://www.bbc.com/news/world-asia-60193714