6 ວຽກສໍາຄັນທີ່ ນວ ຕ້ອງເອົາໃຈໃສ່ຜັນຂະຫຍາຍ 2 ວາລະແຫ່ງຊາດ
ການຜັນຂະຫຍາຍ 2 ວາລະແຫ່ງຊາດໃຫ້ເປັນຮູບປະທຳ ມີໝາກຜົນຢ່າງປະຈັກຕາ ໄດ້ເປັນໜ້າທີ່ ແລະ ຄວາມຮັບຜິດຊອບຕົ້ນຕໍຂອງພະນັກງານ ສະມາຊິກພັກ ແລະ ປະຊາຊົນບັນດາເຜົ່າທັງຢູ່ສູນກາງ ແລະທ້ອງຖິ່ນ. ຂະນະດຽວກັນກໍແມ່ນໜ້າທີ່ການເມືອງທີ່ຕ້ອງອຸທິດປັນຍາ, ຄວາມຮູ້, ຄວາມສາມາດ ປະຕິບັດ ໃຫ້ປາກົດຜົນເປັນຈິງ ເພື່ອສາມາດນຳຜົນປະໂຫຍດມາສູ່ປະເທດຊາດ ແລະ ປະຊາຊົນ. ສຳລັບ ນະຄອນ ຫລວງວຽງຈັນ ທີ່ເປັນສູນກາງຂອງລະບົບການເມືອງ-ການປົກຄອງ, ເສດຖະກິດ, ວັດທະນຳທຳ ຍິ່ງຕ້ອງຖືສຳຄັນປະຕິບັດ 2 ວາລະນີ້ ດັ່ງເມື່ອບໍ່ດົນນີ້, ທ່ານ ພັນຄໍາ ວິພາວັນ ນາຍົກລັດຖະມົນຕີ ໄດ້ເນັ້ນໃຫ້ຄະນະພັກ, ອົງການປົກຄອງນະຄອນຫລວງວຽງຈັນ ເລັ່ງໃສ່ 6 ວຽກຕົ້ນຕໍ ເປັນຕົ້ນ
- 1.ການນຳ ແລະ ປະຊາຊົນ ຕ້ອງເປັນເອກະພາບສູງໂດຍສະເພາະອົງການປົກຄອງຂັ້ນຕ່າງໆຈຶ່ງສາມາດ ຈັດຕັ້ງປະຕິບັດວາລະແຫ່ງຊາດ ໄດ້ດີ.
- 2.ຕ້ອງຮັບຜິດຊອບສູງ ຕ້ອງເປັນເຈົ້າການ ໂດຍການເຮັດແທ້ທຳຈິງ ເພື່ອສາມາດຕີຖອຍລັດທິຮູບການ ຕໍ່ການແກ້ໄຂບັນຫາ ຫລີກເວັ້ຍການລາຍງານແບບແກ້ຕົວ, ລາຍງານດອກໄມ້.
- 3.ຕ້ອງຈັດລຽງບຸລິມະສິດທີ່ຮີບດ່ວນ ເພື່ອປະຕິບັດກ່ອນ ເປັນຕົ້ນ ນະໂຍບາຍການປະຢັດ, ການຈຳກັດການຮົ່ວໄຫລຂອງລາຍຮັບງົບປະມານ ແລະ ຕ້ອງເຮັດກ່ອນແຂວງອື່ນໆ.
- 4.ຕ້ອງຍູ້ແຮງການຜະລິດພາຍໃນເພື່ອທົດແທນການນຳເຂົ້າໂດຍໃຫ້ສົມທົບກັບວິສາຫະກິດຂະໜາດນ້ອຍ ແລະ ກາງ ຍູ້ແຮງການຜະລິດທີ່ມີທ່າແຮງ, ວາງແຜນການຜະລິດ ພ້ອມຫັນຄ່ານິຍົມຈາກສັງຄົມບໍລິໂພກສູ່ສັງຄົມການຜະລິດ.
- ຕ້ອງສຸມໃສ່ຂຶ້ນທະບຽນແຮງງານ, ຈັດສັນແຮງງານ ແລະ ປັບປຸງສີມືແຮງງານ ໂດຍພະແນກພາຍໃນສົມທົບກັບກະຊວງແຮງງານ ແລະ ສະຫວັດດີການສັງຄົມ, ສະພາອຸດສາຫະກຳ ແລະ ການຄ້າ ຕ້ອງປະສານສົມທົບກັນຢ່າງຄັກແນ່.
- 6.ຕ້ອງປັບປຸງກົນໄກການບໍລິຫານລັດທັງຂັ້ນ ນວ, ເມືອງ ແລະ ບ້ານໃຫ້ເຂັ້ມແຂງ ເພື່ອສາມາດບຸກທະ ລຸທຸກວຽກງານ ຊຶ່ງສຳຄັນທີ່ສຸດຄືຂັ້ນບ້ານຕ້ອງໄດ້ຕິດຕາມຊຸກຍູ້ໃຫ້ຈັດຕັ້ງປະຕິບັດຢ່າງເອົາການເອົາງານ.
ນອກນີ້, ນາຍົກລັດຖະມົນຕີ ຍັງຊີ້ນຳການນໍາ ນວ, ເມືອງ ແລະ ນາຍບ້ານໆຕ່າງໆ ໃຫ້ເຂົ້າໃຈເລິກເຊິ່ງຕໍ່ 2 ວາລະແຫ່ງຊາດ ໂດຍການກຳໃຫ້ໄດ້ຄວາມໝາຍ, ຄວາມຈໍາເປັນ ແລະ ຈັດຕັ້ງປະຕິບັດໃຫ້ເປັນຈິງແນໃສ່ເຮັດໃຫ້ຄວາມຫຍຸ້ງຍາກດ້ານເສດຖະກິດ-ການເງິນເປັນຕົ້ນ ການຮົ່ວໄຫລຂອງລາຍຮັບງົບປະມານ ໃຫ້ຫລຸດຜ່ອນລົງ ແລະ ບັນຫາການຄ້າຂາຍຢາເສບຕິດ ກໍໃຫ້ຫລຸດລົງເຊັ່ນດຽວກັນ. ສຳລັບກົນໄກການ ຈັດຕັ້ງປະຕິບັດນັ້ນໃຫ້ຈັດຕັ້ງບັນຊາ-ຊີ້ນຳແບບບັ້ນຮົບ ຊຶ່ງ ນວ ເປັນໃຈກາງດ້ານຕ່າງໆຂອງຊາດ ຍ້ອນແນວນັ້ນ ຕ້ອງຊີ້ນຳບັນຊາ ຢ່າງມີກົນໄກຕາມ 3 ຫລັກການໃຫຍ່ຄື ຮັບປະກັນຄວາມເຂັ້ມງວດ-ເດັດຂາດ, ຮັບປະກັນຄວາມໂປ່ງໃສ ແລະ ຮັບປະກັນຫລັກການວິທະຍາສາດ-ວິຊາການ ພ້ອມທັງໃຫ້ປະຊາຊົນ ກໍຄືພາກສ່ວນກ່ຽວຂ້ອງ ເຂົ້າມາມີສ່ວນຮ່ວມຫລາຍຂຶ້ນ.
