ແຕ່ງຕັ້ງ ທ່ານ ຮສ. ປອ. ອຸດົມ ພອນຄຳເພັງ ເປັນອະທິການບໍດີ ມະຫາວິທະຍາໄລ ແຫ່ງຊາດ

ວັນທີ 11 ເມສາ 2022 ນີ້, ມະຫາວິທະຍາໄລແຫ່ງຊາດ (ມຊ) ໄດ້ຈັດພິທີປະກາດການແຕ່ງຕັ້ງຕຳແໜ່ງອະທິການບໍດີ ມຊ, ໂດຍການເຂົ້າຮ່ວມຂອງ​ ທ່ານ ຮສ. ປອ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະ​ ກິລາ, ມີ​ ທ່ານ ຮສ. ປອ. ອຸດົມ ພອນຄຳເພັງ ອະທິການບໍດີ ມຊ, ມີບັນດາທ່ານຮອງອະທິການບໍດີ, ຫົວໜ້າ-ຮອງຫົວໜ້າກົມ ກະຊວງສຶກສາທິການ ແລະກິລາ, ມີຄະນະບໍດີ, ຮອງຄະນະບໍດີ, ຫົວໜ້າຫ້ອງການ, ຮອງຫົວຫນ້າຫ້ອງການ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.

ໃນພິທີ ທ່ານ ອຸ່ນຄຳ ອວນສະຫວັນ ຮອງຫົວຫນ້າກົມຈັດຕັ້ງ ແລະ​ ພະນັກງານກະຊວງສຶກສາທິການ ແລະກິລາ ໄດ້ຂຶ້ນຜ່ານດຳລັດ ວ່າດ້ວຍການແຕ່ງຕັ້ງອະທິການບໍດີ ມຊ ສະບັບເລກທີ 110/ນຍ ລົງວັນທີ 23 ມີນາ 2022, ໂດຍແຕ່ງຕັ້ງ ທ່ານ ຮສ. ປອ. ອຸດົມ ພອນຄຳເພັງ ເປັນອະທິການບໍດີ ມຊ.

ໃນໂອກາດດັ່ງກ່າວ, ທ່ານ ຮສ. ປອ. ພຸດ ສິມມາລາວົງ ໄດ້ໃຫ້ກຽດມອບດຳລັດ ແລະ ໂອ້ລົມ ຕໍ່ທີ່ປະຊຸມ ຊຶ່ງທ່ານໄດ້ເນັ້ນໃຫ້ສ້າງ ແລະ​ ພັດທະນາ ມຊ ໃຫ້ກາຍເປັນບ່ອນຜະລິດ ຊັບພະຍາກອນມະນຸດທີ່ມີຄຸນນະພາບ, ສ້າງ ມຊ ໃຫ້ເປັນສູນຮຽນຮູ້ທີ່ທັນສະໄໝຮອບດ້ານ, ສ້າງ ມຊ ເປັນບ່ອນພັດທະນາບັນດິດຢ່າງມີຄຸນນະພາບ, ເອົາໃຈໃສ່ພັດທະນາ ມຊ ໃຫ້ກ້າວໜ້າ, ກ້າວໄກ ຫັນເອົາ ມຊ ເປັນບ່ອນກຸ້ມຕົນເອງທາງດ້ານການເງິນເທື່ອລະກ້າວ.