ວິທີປະຖົມພະຍາບານເບື້ອງຕົ້ນ ເມື່ອຖືກສັດມີພິດກັດ
ໃນຊ່ວງລະດູຝົນນີ້ ສິ່ງທີ່ມັກມາກັບນໍ້າແມ່ນສັດຕ່າງໆ ທີ່ອັນຕະລາຍ ແລະ ບໍ່ອັນຕະລາຍ ທີ່ອົບພະຍົບມາຢູ່ໃນເຮືອນຂອງເຮົາ ຫລື ຢູ່ຕາມບ່ອນທີ່ມີນໍ້າຂັງ ເຊິ່ງສ່ຽງຕໍ່ການເກີດອັນຕະລາຍຕໍ່ເຮົາເອງ ແລະ ຄົນໃນຄອບຄົວ ດັ່ງນັ້ນ ກ່ອນທີ່ຈະຖືກສັດທີ່ເຫລົ່ານັ້ນກັດ ຫລື ຕອດ ເຮົາມາເບິ່ງກັນວ່າມີສັດຫຍັງແນ່ ແລະ ຈະຮັບມືແນວໃດເມື່ອຖືກຕອດ ຫລື ກັດ ຈາກສັດທີ່ມີພິດ.
- ງູ
ເປັນສັດອັນຕະລາຍທີ່ມີພິດຮ້າຍແຮງອັນດັບຕົ້ນໆ ທີ່ມັກມາອາໄສຕາມເຮືອນຄົນ ເຊັ່ນ ຫ້ອງນໍ້າ, ຂື່ເຮືອນ, ກ້ອງຕູ້… ເປັນຕົ້ນແມ່ນ ງູເຫົ່າ, ງູສິງ, ງູຂຽວ, ງູເຫລືອມ…
ວິທີປະຖົມພະຍາບານເບື້ອງຕົ້ນເມື່ອຖືກງູກັດ
ເພື່ອສະກັດກັ້ນການແຜ່ກະຈາຍຂອງພິດງູກ່ອນທີ່ຈະເກີດພາວະແຊກຊ້ອນອື່ນໆຄວນປະຕິບັດດັ່ງນີ້:
- ພາຄົນເຈັບໄປໂຮງໝໍທີ່ໃກ້ທີ່ສຸດ ແລະ ຊາກງູທີ່ກັດໄປພ້ອມ (ຖ້າມີ) ຫລື ຈື່ຈໍາລັກສະນະຂອງຊະນິດງູ ເພື່ອການຮັກສາທີ່ຖືກຕ້ອງ.
- ລ້າງບາດແຜບໍລິເວນທີ່ຖືກງູກັດ ດ້ວຍນໍ້າສະອາດ, ຢາຂ້າເຊື້ອ, ເຫລົ້າ90.
- ພະຍາຍາມໃຫ້ບໍລິເວນທີ່ຖືກງູກັດ ໄດ້ຮັບການເຄື່ອນໄຫວໜ້ອຍທີ່ສຸດເຊັ່ນ ເອົາໄມ້ແປ້ນນ້ອຍໆ ມາດາມແລ້ວປິດບາດດ້ວຍຜ້າຄຽນ.
- ຫ້າມບໍ່ໃຫ້ດູດບໍລິເວນທີ່ຖືກກັດ ຕາມທີ່ເຮົາເຄີຍເຫັນໃນລະຄອນ ຫລື ຮູບເງົາຕ່າງໆ, ເພາະຈະເຮັດໃຫ້ບາດເປື້ອນ ແລະ ເກີດການຕິດເຊື້ອ.
- ຂີ້ເຂັບ
ຂີ້ເຂັບເປັນສັດມີພິດທີ່ມັກອາໄສຢູ່ບ່ອນທີ່ປຽກຊຸ່ມເຊັ່ນ ກອງໄມ້ທີ່ຕາຍແລ້ວ, ຮູດິນ, ກ້ອງກ້ອນຫີນໃຫຍ່… ເມື່ອລະດັບນໍ້າໃນບ່ອນທີ່ພວກມັນອາໄສຢູ່ສູງຂຶ້ນ ພວກມັນຈະອົບພະຍົບໄປບ່ອນຢູ່ອາໄສຂອງພວກເຮົາໄດ້ ດັ່ງນັ້ນ ຂີ້ເຂັບຈຶ່ງເປັນສັດມີພິດທີ່ພົບເຫັນໄດ້ຫລາຍເມື່ອເຂົ້າລະດູຝົນ.
ປົກກະຕິແລ້ວຖ້າຫາກຖືກຂີ້ເຂັບກັດຈະບໍ່ມີອາການຮູນແຮງເຖິງແກ່ຊີວິດ ຄວາມຮຸນແຮງແມ່ນຂຶ້ນກັບຈະໜາດຂອງຂີ້ເຂັບ, ສ່ວນຫລາຍແມ່ນຈະມີອາການປວດ, ບວມ, ຄັນ, ແສບຮ້ອນ ໃນບໍລິເວນທີ່ຖືກກັດ ແລະ ອາດຈະມີໄຂ້ພຽງເລັກໜ້ອຍ, ເຊິ່ງອາການຈະດີຂຶ້ນພາຍໃນ 24 ຊົ່ວໂມງ.
ວິທີປະຖົມພະຍາບານເບື້ອງຕົ້ນ
- ລ້າງບາດດ້ວຍນໍ້າສະອາດ.
- ປະຄົບນໍ້າເຢັນເພື່ອບັນເທົາອາການປວດ ເທື່ອລະ 10 ນາທີ.
- ບໍ່ຄວນເກົາ ບໍລິເວນທີ່ຖືກກັດ ເພື່ອບໍ່ໃຫ້ເກີດການຕິດເຊື້ອ.
- ໄປພົບແພດທັນທີ ເມື່ອມີອາການຮ້າຍແຮງເຊັ່ນ ມີຮອຍແດງ, ບວມ, ອາການເຈັບເພີ່ມຂຶ້ນ, ມີນໍ້າເຫລືອງບໍລິເວນທີ່ຖືກກັດ.
- ສໍາລັບຜູ້ທີ່ມີອາການແພ້ຮຸນແຮງເຊັ່ນ ໜ້າບວມ, ຫາຍໃຈລໍາບາກ, ແໜ້ນເອິກ, ວິນຫົວ, ປວດຮາກ, ຊ໋ອກໝົດສະຕິ ໃຫ້ຮີບພາໄປໂຮງໝໍໂດຍໄວ.
- ແມງງອດ
ແມງງອດເປັນສັດທີ່ມັກອາໄສຢູ່ໃນບ່ອນມືດ ແລະ ຊຸ່ມ ເຊັ່ນ ກ້ອງໃບໄມ້, ກ້ອງກ້ອນຫີນ ຫລື ຂຸດຮູຢູ່, ແມງງອດເປັນສັດທີ່ມີຂາ 4 ຄູ່ ຂາຄູ່ໜ້າມີລັກສະນະເປັນກ້າມໃຫຍ່ ສ່ວນຫາງມີລັກສະນະເປັນປ້ອງ ແລະ ປ້ອງສຸດທ້າຍຈະມີປາຍແຫລມທີ່ມີພິດຮ້າຍ. ອາການສ່ວນໃຫຍ່ຈະບໍ່ຮຸນແຮງ ເຊັ່ນ ປວດ, ບວມ, ແດງ, ຮ້ອນແສບໃນບໍລິເວນທີ່ຖືກຕອດ ແລະ ເຊົາໄປເອງ, ສ່ວນບາງຄົນທີ່ມີອາການຮຸນແຮງ ອາດມີຫົວໃຈເຕັ້ນໄວ, ຫາຍໃຈໄວ,ຄວາມດັນເລືອດສູງ, ປວດກ້າມຊີ້ນ.
ວິທີປະຖົມພະຍາບານເບື້ອງຕົ້ນ
- ລ້າງບາດທີ່ຖືກຕອດດ້ວຍນໍ້າສະອາດ.
- ປະຄົບເຢັນເທື່ອລະປະມານ 10 ນາທີ ເພື່ອບັນເທົາອາການບວມ.
- ຖ້າມີອາການປວດ ສາມາດກິນຢາແກ້ປວດໄດ້.
ໝາຍເຫດ: ຖ້າຫາກມີອາການທີ່ຮຸນແຮງຂຶ້ນ ຄວນຮີບໄປພົບແພດໂດຍໄວ.
- ແມງໄມ້ທີ່ມີພິດຕ່າງໆ
ແມງໄມ້ຫລາຍຊະນິດທີ່ມີເຫລັກໃນຄື ເຜິ້ງ, ຕໍ່, ແຕນ ເປັນຕົ້ນ ເມື່ອຖືກຕອດແລ້ວມັກຈະຝັງເຫລັກໄນໄວ້ ເຊິ່ງຢູ່ເຫລັກໄນຈະມີພິດແຕ່ບໍ່ຮ້າຍແຮງ ຈະມີອາການບວມ ແດງ ຄັນ ແລະ ປວດ ຈະປວດຫລາຍ ຫລື ໜ້ອຍແມ່ນຂຶ້ນກັບບລິເວນທີ່ຖືກຕອດ ແລະ ສະພາບຮ່າງກາຍຂອງແຕ່ລະບຸກຄົນ.
ວິທີປະຖົມພະຍາບານເບື້ອງຕົ້ນ
- ອະນາໄມບໍລິເວນທີ່ຖືກຕອດດ້ວຍນໍ້າສະອາດ ຖ້າມີເຫລັກໄນໃຫ້ດຶງອອກທັນທີ ເພື່ອຫລຸດປະລິມານພິດທີ່ເຂົ້າໄປໃນຮ່າງກາຍ.
- ໃຊ້ເລັບມື ຫລື ບັດແຂງ ຄ່ອຍໆຂູດເອົາຫລັກໄນອອກມາ ຫລີກລ່ຽງການໃຊ້ແໜບດຶງ ເນື່ອງຈາກມັນອາດຈະເຮັດໃຫ້ພິດຫລັ່ງອອກມາຫລາຍຂຶ້ນ.
- ສາມາດປະຄົບເຢັນໄດ້ເທື່ອລະ 10 ນາທີ ເພື່ອບັນເທົາອາການປວດບວມ.
- ຫລີກລ່ຽງການເກົາ ຫລື ແກະບໍລິເວນທີ່ຖືກຕອດ ເພື່ອຫລຸດຄວາມສ່ຽງຕໍ່ການຕິດເຊື້ອຊໍາເຮື້ອ.
- ສາມາດກິນ, ທາຢາ ຕ້ານສານຮິສຕາມີນ ແລະ ຢາທາປະເພດສະເຕຣອຍ ເພື່ອບັນເທົາອາການຄັນ ປວດແສບຮ້ອນ.
- ຖ້າມີອາການຮຸນແຮງເຊັ່ນ ຜິວໜັງບໍລິເວນນັ້ນມີຮອຍແດງ, ບວມ ຫລື ມີອາການປວດເພີ່ມຂຶ້ນ, ມີນໍ້າເຫລືອງບໍລິເວນທີ່ເປັນບາດ ຄວນໄປພົບແພດໂດຍໄວ.
- ບາງກໍລະນີທີ່ມີອາການແພ້ຮຸນແຮງຈະມີອາການເຊັ່ນ ໜ້າບວມ, ຫາຍໃຈຕິດຂັດ, ແໜ້ນເອິກ, ວິນຫົວ, ປວດຮາກ ຈົນເຖິງຂັ້ນຊ໋ອກບໍ່ມີສະຕິ.
- ສໍາລັບຜູ້ໃດຫາກຕ້ອງສໍາຜັດກັບແມງໄມ້ຢູ່ເລື້ອຍໆ ແລ້ວມີອາການແພ້ ຄວນມີຢາ Epinephrine ໄວ້ຕິດຕົວ ເພື່ອໃຊ້ໃນກໍລະນີສຸກເສີນ.
