ສສຊ ສະເໜີປັບປຸງບາງເນື້ອໃນບາງໝວດ ບາງມາດຕາ ຂອງກົດໝາຍວ່າດ້ວຍວິຈິດສິນ

ວາລະດຳເນີນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນວັນທີ 4 ກໍລະກົດ 2022 ນີ້ ທ່ານນາງ ທອງໃບ ໄຊຍະສານ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 14 ແຂວງສາລະວັນ ໄດ້ປະກອບຄຳເຫັນໃສ່ຮ່າງກົດໝາຍສະບັບດັ່ງກ່າວ ໂດຍທ່ານໄດ້ສະແດງຄວາມຊົມເຊີຍຕໍ່ລັດຖະບານ ກໍຄື ກະຊວງ, ຂະແໜງການ ທີ່ກ່ຽວຂ້ອງ ທີ່ໄດ້ສ້າງກົດໝາຍສະບັບນີ້ຂຶ້ນມາ, ພ້ອມທັງສະເໜີ ໃຫ້ປັບປຸງບາງຄຳສັບ, ບາງເນື້ອໃນ ຢູ່ມາດຕາທີ 21, 22 ແລະ ມາດຕາ 75 ເຊິ່ງມາດຕາທີ 21 ທີ່ໄດ້ກຳນົດເນື້ອໃນວ່າ ວິຈິດສິທ້ອງຖິ່ນ ແມ່ນຜົນງານດ້ານວິຈິດສິນທີ່ມີຄຸນຄ່າສູງ ແລະ ໂດດເດັ່ນ, ຫາຍາກ ໃນລະດັບທ້ອງຖິ່ນ ທາງດ້ານວັດທະນະທຳ, ປະຫວັດສາດ ເຊິ່ງສ້າງຂຶ້ນ ແລະ ຕັ້ງຢູ່ໃນທ້ອງຖິ່ນທີ່ກ່ຽວຂ້ອງ ເປັນຕົ້ນ ລວດລາຍສິລະປະວັດທະນະທຳ ກໍຄື ຫໍຫລັກບ້ານຫລັກເມືອງ ໂດຍທ່ານສະເໜີໃຫ້ຕື່ມບາງຄຳສັບໃສ່ປະໂຫຍດສຸດທ້າຍ ໂດຍຕື່ມຄຳວ່າ: ແລະ ສິລະປະວັນນະຄະດີ ທີ່ເປັນເອກະລັກຂອງທ້ອງຖິ່ນ, ດ້ວຍສີໄມ້ລາຍມືອັນປານີດຂອງປະຊາຊົນລາວບັນດາເຜົ່າ ໃນທ້ອງຖິ່ນ ທັງນີ້ ກໍເພື່ອສະແດງໃຫ້ເຫັນເຖິງສິລະປະວັນນະຄະດີທີ່ເປັນເອກະລັກຂອງທ້ອງຖິ່ນ ຂອງປະຊາຊົນລາວບັນດາເຜົ່າ ເປັນ ຕົ້ນ ຂັບລຳ, ເນື້ອຮ້ອງ, ທຳນອງເພັງ ແລະ ສຽງແຄນແດນຈຳປາ ລວມໄປເຖິງຫັດຖະກຳທີ່ເປັນເອກະລັດຂອງທ້ອງຖິນ ເປັນຕົ້ນ ການຕ່ຳຫູກທໍໄໝ, ຍິບປັກທັກແຊ່ວ ທີ່ໂດດເດັ່ນ ຢູ່ທ້ອງຖິ່ນ.

ສຳລັບມາດຕາທີ່ 22 ສະເໜີ ໃຫ້ກຳນົດຈະແຈ້ງຕື່ມວ່າ ວິຈິດສິນລະດັບຊາດມີອັນໃດແດ່ ເພື່ອສະດວກໃນການຈັດຕັ້ງປະຕິບັດ ໃນການຄຸ້ມຄອງ, ປົກປັກຮັກສາວິຈິດສິນ ໂດຍຕິດພັນກັບການຂຶ້ນທະບຽນ, ການສະເໜີຂຶ້ນທະບຽນ ກໍຄື ສອດຄ່ອງກັບມາດຕາທີ 27,28,29 ແລະ ມາດຕາທີ 42 ທີ່ເວົ້າເຖິງການບູລະນະ, ສ້ອມແປງ, ປະຕິສັງຂອນວິຈິດສິນ.