ຮຽກຮ້ອງໃຫ້ແຕ່ລະປະເທດ ໃຫ້ຄວາມສົນໃຈຕໍ່ຄວາມຕ້ອງການຂອງຊາວໜຸ່ມ

ວັນທີ 21 ກໍລະກົດ 2022 ຜ່ານມານີ້ ກອງປະຊຸມເວທີປຶກສາຫາລື ການພັດທະນາຊາວໜຸ່ມໂລກ (The World Youth Development Forum 2022) ໃນໃນຮູບແບບເຊິ່ງໜ້າ ແລະ ອອນລາຍ ພາຍໃຕ້ຫົວຂໍ້ “ເພື່ອອະນາຄົດຮ່ວມກັນ, ການສົ່ງເສີມພັດທະນາແບບຍືນຍົງຮ່ວມກັບຊາວໜຸ່ມ ແລະ ເພື່ອຊາວໜຸ່ມ” ໂດຍມີເຈົ້າໜ້າທີ່ຂັ້ນສູງ ແລະ ຜູ້ແທນຊາວໜຸ່ມຈາກຮ້ອຍກວ່າປະເທດເຂົ້າຮ່ວມ ເພື່ອປຶກຫາລືກ່ຽວກັບການພັດທະນາໂລກ ແລະ ການສະໜັບສະໜູນຄວາມພະຍາຍາມ ໃນການສົ່ງເສີມພັດທະນາຊາວໜຸ່ມໂລກ.

ທ່ານ ອັນໂຕນີໂອ ກູເຕເຣາ ເລຂາທິການໃຫຍ່ ອົງການສະຫະປະຊາຊາດ ໄດ້ກ່າວວ່າ: ກອງປະຊຸມຄັ້ງນີ້, ເປັນໂອກາດສໍາຄັນ ທີ່ໄດ້ນຳເອົາຊາວໜຸ່ມມາຮ່ວມກັນ ເພື່ອກຳນົດວິທີທາງແກ້ໄຂ ບັນຫາເຄັ່ງຮ້ອນຂອງໂລກ ພ້ອມຮຽກຮ້ອງໃຫ້ການນຳ ແລະ ບັນດາຜູ້ແທນທີ່ເຂົ້າຮ່ວມກອງປະຊຸມ ໃຫ້ຄວາມສຳຄັນຕໍ່ຄວາມຮຽກຮ້ອງຂອງຊາວໜຸ່ມ ກ່ຽວກັບການພັດທະນາ ແລະ ປ່ຽນແປງ, ໃນການເຊື່ອມຊຶມເອົາຄວາມຮຽກຮ້ອງຕ້ອງການຂອງເຂົາເຈົ້າ ເຂົ້າໃນວຽກງານການວາງແຜນດ້ານນະໂຍບາຍ, ການລົງທຶນ ແລະ ການສົ່ງເສີມ ເພື່ອໃຫ້ຊາວໜຸ່ມມີສ່ວນຮ່ວມໃນວຽກງານການເມືອງ, ເສດຖະກິດ ແລະ ສັງຄົມ.

ໂອກາດນີ້, ທ່ານ ສີຈິ້ນຜິງ ປະທານປະເທດຈີນ ໄດ້ຝາກສານສະແດງຄວາມຊົມ ເຊີຍ ເຖິງກອງປະຊຸມດັ່ງກ່າວວ່າ: ຊາວໜຸ່ມແມ່ນຕົວແທນຂອງຄວາມຫວັງ ແລະ ເປັນສະຖາປະນິກແຫ່ງອະນາຄົດ ແລະ ຈີນ ຖືຊາວໜຸ່ມເປັນຜູ້ຂັບເຄື່ອນ ການພັດທະນາສັງຄົມ ແລະ ຊຸກຍູ້ເຂົາເຈົ້າໃຫ້ນຳໃຊ້ຄວາມສາມາດຂອງຕົນ ເຂົ້າໃນການປະກອບສ່ວນສ້າງປະຊາຄົມ ຮ່ວມຊາຕາກຳດຽວກັນຂອງມະນຸດຊາດ ແລະ ອື່ນໆ.